Minatorët serbë të “Trepçës” protestojnë në veri të Kosovës

Rreth 300 punëtorë të “Trepçës” në veri të Kosovës kanë bllokuar rrugën rajonale Mitrovicë – Rashkë. Ata janë deklaruar kundër projektligjit për Trepçën që ka nxjerr  Kuvendi i Kosovës

Menjëherë pasi e morën lajmin se projektligji për Trepçën do të procedohen në Kuvendin e Kosovës për miratim, rreth 300 minatorë serbë nga veriu i Kosovës e bllokuan rrugën Mitrovicë- Leposaviq në vendin e quajtur Rudare. Ata u shprehen të pakënaqur që gjiganti metalurgjik “Trepça” edhe ligjërish t’i takoj institucioneve të Kosovës.

Sipas draftit final të projektligjit për Trepçën, ky gjigant do të mbetet pronë e Kosovës ndërsa më të zhvillimin e saj do të vendosin institucionet e shtetit. Por serbët po kërkojnë që kjo kompani kosovare e pasur me zink dhe plumb, të diskutohet në bisedimet Prishtinë-Beograd në Bruksel.

Megjithatë projektligji për Trepçën është finalizuar nga zyra e kryeparlamentarit KV një ditë para se ky i fundit ta vizitojë gjigantin metalurgjik dhe të ndajë me minatorët lajmin se Trepça do të shndërrohet nga ndërmarrje shoqërore në ndërmarrje publike. Deri më tani Trepça ka qenë nën administrimin e AKP-së (Agjencisë Kosovare të Privatizimit).

Në anën tjetër, minatorët serbë, të revoltuar kanë bllokuar rrugën që çon në drejtim të Rashkës. Ata mbanin në duar flamuj të Serbisë dhe të minatorëve, ndërsa atyre u prijnë  përfaqësuesit e administratës paralele të veriut të Kosovës që financohet nga Qeveria e Serbisë.

Punëtorët e “Trepçës” në veri kanë thënë se, nuk do  ta pranojnë ligjin, i cili sipas tyre do të sjellë deri tek ndërprerja e prodhimit dhe në këtë mënyrë do ta rrezikojë ekzistencën e punëtorëve dhe familjeve të tyre, citon Zëri.info.

Në anën tjetër, nëpërmes të një komunikate për medie, Sindikata e “Trepçës” në veri, si dhe menaxhmenti i kombinatit kanë propozuar që çështja e “Trepçës” të zgjidhet nëpërmes të dialogut në Bruksel.”…po tentohet, pa asnjë bazë juridike që Trepça të sillet nën kompetenca të Qeverisë së Kosovës, e më këtë ta sjell në pozitë krejtësisht të varur”, thuhet në një deklaratë të sindikalistëve dhe menaxhmenti i kombinatit “Trepça” në veri të vendit.

Aktualisht në ndërmarrjen “Trepça” punojnë mbi 2500 punëtor, 1500 janë në pjesën jugore të qytetit që banohet nga shqiptarët dhe rreth 1050 persona punojnë në pjesën veriore të kësaj ndërmarrje, të banuar me serbë. Të dyja njësitë, veri-jug, deri më tani janë administruar nga Agjencia Kosovare e Privatizimit.

Ndryshe, miniera e “Trepçës” është një kompleks i madh industrial. Dikur kjo kompani kishte 23 mijë punëtorë, ndërsa ishte njëra nga kompanitë më të mëdha në Jugosllavinë socialiste. Pas Luftës së dytë Botërore, “Trepça”, ka qenë një konglomerat me 40 miniera dhe fabrika, që shtrihen më së shumti në Kosovë, por gjithashtu edhe në Serbi dhe Mal të Zi.

Rezervat e përgjithshme minerale të të gjitha minierave të “Trepçës”, vlerësohen të jenë rreth 58 milionë tonë. E konvertuar në vlerë monetare me çmimet e sotme të tregut, kjo pasuri sillet prej 8-10 miliard euro.