Vllasi: Opozita po i bën argat Rusisë

Analisti politik, Azem Vllasi, e konsideron gabim të madh mosratifikimin e marrëveshjes për demarkacion me shtetin fqinj. Ai thotë se opozita me këtë qëndrim po i bënë argat Rusisë dhe Serbisë

Subjektet opozitare, Vetëvendosje, AAK dhe Nisma janë duke vepruar pro politikave serbe dhe ruse, sa i përket çështjes së vijës kufitare me Malin e Zi. Kështu ka deklaruar analisti politik, Azem Vllasi, i cili e konsideron si gabim të madh mosratifikimin e marrëveshjes për demarkacion me shtetin fqinj.

Vllasi më tutje ka folur edhe për bojkotimin që Lista Serbe gjatë seancës së djeshme për demarkacionin. Ai thotë se partia të cilën e udhëheq Slavko Simiq ka vetëm një detyrë; ta keqësoj situatën sa më shumë Kosovën.

“Listës “Srpksa” i konvenon me mbet çështja e kufirit me Mal të Zi si çështje e hapur sepse serbët së bashku me Rusinë janë duke bërë çmos me qit në ‘dy gunj’ Malin e Zi. Aty tani ka fërkime të brendshme edhe për këtë çështje të demarkacionit. Opozita pro-serbe, pro-ruse, po e shfrytëzon këtë çështje ashtu që opozita jonë është duke ia bërë një argatë të mirë Serbisë dhe Rusisë eventualisht me mujt Malin e Zi me qit në dy guje dhe me pengu rrugën në NATO”, ka thënë ai për IO.

Në Mal të Zi me 16 tetor pritet të mbahen zgjedhjet e përgjithshme, ndërsa, sipas Vllasit, forcat pro-ruse e serbe janë të interesuar që ta rrëzojnë Gjukanoviqin nga pushteti. Vllasi e konsideron këtë si një rrezik të marrëdhënieve ndërmjet Kosovës dhe Malit të Zi.

“Atëherë, ne, përpos Serbisë që e kemi në kufi si armik, do ta fitojmë edhe një kundërshtar që do të jetë aleat i Serbisë. Kështu skena jonë e brendshme politike kujdeset për interesat shtetërore”, shprehet ai.

Megjithatë, Vllasi thotë se pas dështimit të djeshëm të largimit nga pika e rendit të ditës, Qeveria Mustafa në kushte normale ishte dashur të jepte dorëheqje dhe vendi të shkonte në zgjedhje të jashtëzakonshme.