Protestuesit mblidhen në shesh, policia në gjendje gatishmërie

Policia njofton se ka konfiskuar rreth 50 çanta të mbushura me koktej molotovi sot në mëngjes. Opozita po barrikadiohet në sheshin “Skënderbeu” për të protestuar kundër ratifikimit të Demarkacionit me Malin e Zi

Foto: Rel

Njësitë Speciale të Policisë së Kosovës, që nga orët e hershme të mëngjesit janë pozicionuar përballë ndërtesës së Qeverisë dhe Kuvendit të Kosovës, aty ku opozita ka paralajmëruar protesta të dhunshme kundër ratifikimit të marrëveshjes për demarkacion me Malin e Zi. Po ashtu Policia njofton se ka konfiskuar rreth 50 çanta të mbushura me koktej molotovi.

Protesta e paralajmëruar nga Lëvizja Vetëvendosje, lidhet me seancën e rregullt të Kuvendit të Kosovës që është paralajmëruar për orën 11.30. Në këtë seancë njëra nga pikat e rendit të ditës është ratifikimi i Marrëveshjes për Demarkacionin me Malin e Zi, i nënshkruar në Vjenë më 26 gusht 2016.

Sipas njoftimeve, Policia ka ndaluar edhe lëvizjet e qytetarëve në afërsi të ndërtesës së Kuvendit dhe ka filluar bllokimin e rrugëve dytësore, të cilat dërgojnë në sheshet e kryeqytetit.

Ndërkaq në lagjen Dardania në Prishtinë janë shpërndarë fletushka të cilat janë titulluar “Vetëvendosje, Vëllavrasja”. Zëdhënësja e Vetëvendosjes, Tinka Kurti, ka thënë se nuk janë në dijeni nëse ato janë shpërndarë edhe në ndonjë pjesë tjetër të qytetit.

Por, para se të mbahet mbledhja e Kuvendi të Kosovës, është zhvilluar një takim ndërmjet dy liderëve të partive të koalicionit, kryeministrit dhe kryetarit të LDK-së, Isa Mustafës dhe kryeparlamentarit dhe kryetarit të PDK-së, Kadri Veseli.ky takim e bën të dyshimtë nëse marrëveshja do të ratifikohet sot, pasi që edhe Lista Serbe ka paralajmëruar mospjesëmarrje në Kuvend.

Që marrëveshja të ratifikohet, sipas kushtetutës së Kosovës, duhet dy të tretat e deputetëve të Kuvendit, që i bije 80 nga 120 sa ka gjithsej parlamenti. Vetëm opozita i ka 31 deputetë, por ka edhe ligjvënës nga koalicioni që janë deklaruar kundër ratifikimit. E nëse në seancë nuk shkon as Lista Serbe me 11 deputetë, atëherë  marrëveshja dështon pasi që koalicioni nuk do të mundet t’i sigurojë as 70 vota.