Lirohet mërgimtari i arrestuar nga policia serbe

I arrestuari Xhavit Sali Kolgeci, ka qenë ish i burgosur politik nga viti 1999-2002, i liruar nga Kryqi i Kuq Ndërkombëtar, e po ashtu i liruar me aktgjykim te Gjykatës së Nishit në vitin 2002

Mërgimtari nga Suhareka, Xhavit Sali Kolgeci, i cili u arrestua nga Policia Serbe në kufirin serb duke ardhur nga Sllovenia për Kosovë është liruar. Lajmi është konfirmuar nga Shefi i Kabinetit të Ministrit të Punëve të Jashtme, Bashmir Xhemaj, raporton albinfo.ch.

Xhemaj ka thënë se misioni diplomatik dhe në veçanti Ministri Enver Hoxhaj në momentin që kur e kanë marrë lajmin për arrestimin e tij ka kërkuar me urgjencë trajtimin e rastit.

Ai ka treguar se është arritur të mundësohet lirimi i shtetasit nga Kosova që jeton në Slloveni.

I arrestuari në fjalë, ka qenë ish i burgosur politik nga viti 1999-2002, i liruar nga Kryqi i Kuq Ndërkombëtar, e po ashtu i liruar me aktgjykim te Gjykatës së Nishit në vitin 2002.

Lajmin për arrestimin e tij e ka konfirmuar edhe vëllai i tij, Nezir Kolegeci, i cili ka thënë se kanë qenë të shokuar me arrestimin e Xhavitit, derisa ka shtuar se institucionet e Kosovës nuk i kanë dhënë aspak informacione.