Sulmohet ndërtesa e Parlamentit të Kosovës

Ndërtesa e Parlamentit të Kosovës është sulmuar të enjten në mbrëmje me një mjet shpërthyes që la pas vetes vetëm dëme materiale.
Ngjarja ka ndodhur rreth orës 23.

Siç raportojnë mediat në Prishtinë, nuk dihen ende hollësitë rreth këtij sulmi dhe as për autorët apo motivet e mundshme të tij dhe janë duke u kryer hetimet në vendin e ngjarjes.

Zyrtarë të policisë thanë se dyshohet që dy persona kanë qëlluar ndërtesën dhe janë larguar nga vendi i ngjarjes me një motoçikletë që më pas është gjetur e djegur në një lagje tjetër të Prishtinës.

Sulmin e kanë dënuar institucionet kosovare dhe partitë politike në Prishtinë.