Ylfete Fanaj, deputete në Parlamentin e Kantonit të Lucernit

Fanaj bëhet shqiptarja e parë e zgjedhur drejtpërdrejtë si përfaqësuese e popullit në nivel kantoni, në Zvicër

Shqiptaro-zvicerania Ylfete Fanaj, e lindur në Kosovë, e cila prej kohësh merr pjesë në jetën politike të Zvicrës, është zgjedhur sot deputete e Partisë Socialdemokrate, në Parlamentin e Kantonit të Lucernit.

Duke u zgjedhur në këtë pozicion, Fanaj bëhet shqiptarja e parë e zgjedhur drejtpërdrejtë si përfaqësuese e popullit në nivel kantoni, në Zvicër. Deri më tash ajo ka qenë deputete në Parlamentin e Qytetit të Lucernit.

Ylfete Fanaj ka pas vetes një aktivitet të bujshëm jo vetëm në sferën e politikës. Ajo është kryetare, në nivel të Zvicrës, e organizatës Second@s që bën bashkë të huajt e gjeneratës së dytë dhe si e tillë gëzon një njohje të konsiderueshme në opinion, jo vetëm në kantonin ku jeton por dhe në gjithë Zvicrën.

Para Ylfete Fanajt, deputetë (këshilltarë) kantonalë shqiptarë në Zvicër ka qenë Osman Osmani (Schaffhausen) dhe aktualisht është Zari Xhaferi (Zug).

Ndryshe nga dy të përmendurit, të cilët kanë fituar vendin në parlamentet përkatëse pas tërheqjes së kandidatëve me më shumë vota në listë, Ylfetja është zgjedhur në mënyrë të drejtpërdrejtë.