Bëhet interesante gara për Dhomën e Kantoneve

Më 6 mars SVP e ka vështirë të bëjë vend në dhomën e kantoneve me kandidatin e saj Amstutz kundër kandidates së SP Ursula Wyss

Më 6 mars mbahen votimet për vendin e mbetur të zbrazët në dhomën e kantoneve të Parlamentit të Zvicrës, pas zgjedhjes së Simonetta Sommaruga-s në postin e ministres. Për këtë vend, që i takon kantonit të Bernës, bëjnë gara Adrian Amstutz nga SVP dhe Ursula Wyss nga SP.

Në zgjedhjen që u bë javën e kaluar, në mesin e më shumë kandidatëve të partive të ndryshme, Amstutz fitoi më shumë vota se sa Wyss. Mirëpo duket se më 6 mars, në garën “kokë më kokë” me kandidaten nga SP ai do ta ketë të vështirë të sigurojë vendin në dhomën e përmendur.

Partitë tjera të djathta ia kanë mohuar atij mbështetjen në garë me socialdemokraten Wyss.

Kështu BDP, parti që është krijuar nga ndarja e SVP-së pak vite më parë, nuk u ka rekomanduar zgjedhësve të saj ta votojnë kandidatin e SVP-së.

Po ashtu edhe partitë tjera të djathta dhe të qendrës nga kantoni i Bernës FDP dhe EVP kanë kundërshtuar që tu rekomandojnë përkrahësve të tyre votimin e kandidatit Adrian Amstutz.