Kosovaret me padurim presin vendimin e UEFA-s

Në Budapest tashmë ka filluar punimet Kongresi i UEFA-s, ndërsa çështja e Kosovës është në pikën 10 të rendit të ditës

Qytetarët e Kosovës e në veçanti lojtarët dhe futbolldashësit, po e presin me padurim vendimin që do të sjellë sot Kongresi i UEFA-s që po mbahet në Hungari për pranimin e Republikës së Kosovës si shteti i 55 i saj. Në Budapest tashmë ka filluar punimet kongresi, ndërsa çështja e Kosovës është në pikën 10 të rendit të ditës.

Në Hungari tashmë po qëndron një delegacion i Kosovës i prirë nga kryeministri Isa Mustafa dhe gati gjithë strukturat drejtuese e Federatës së Futbollit kosovarë. Ndërsa dy ditë më parë me një autobus kanë udhëtuar gazetarët dhe kameramanët e të gjitha medieve kosovare.

Siç raportojnë mediet nga Budapesti, disa tifozë nga Kosova e kanë shpalosur një baner para objektit ku po mbahet Kongresi i UEFA-s në Budapest ku shkruhet se: “Kosova do të jetë edhe anëtari i 210-të i FIFA-s”, ndërkohë që e kanë edhe një porosi tjetër “Faleminderit UEFA”, kanë shkruar ata po ashtu në gjuhën angleze.

Por, para se të hidhet në votim pranimi i Kosovë, UEFA duhet të ndryshojë pikën ku kërkohet që një shtet për t’u anëtarësuar duhet të jetë pjesë e OKB-së. Ndryshimi parashikon që në UEFA të pranohen të gjitha shtete që janë njohur nga gjysma e shteteve evropiane. Me këtë ndryshim, Kosova duket se e ka të sigurt pranimin.

Për të marrë dritën jeshile nga UEFA, Kosovës i duhen më shumë se sa 28 vota, pasi që të drejtën e votës e kanë 54 shtet. Vetëm nga lista e BE-së Kosovën e kanë njohur 22 shtet, nga 28 sa ka gjithsej. Por të drejt vote kanë edhe shtete fqinje, Turqia..etj.

Nënkryetari i Federatës së Futbollit të Kosovës, Agim Ademi, tha se Fadil Vokrri do të ngritë flamurin e Kosovës në UEFA dhe se do të marrin më shumë se sa 28 vota të nevojshme. “Jam optimist se Fadil Vokrri do ta ngritë flamurin e Kosovës në Kongresin e UEFA-s. Besoj se Kosova do të marrë më shumë se sa 28 vota”, tha Ademi.

Albinfo.Ch do të raportoj me kohë për çdo risi që vjen nga Budapesti. Ndërsa pranimi i Kosovës do t’i vë para dilemës shumicën e lojtarëve kosovarë që luajnë për shtetet e huaja. Nëse vlen praktika e mëhershme, pas pranimit të shteti amë, të gjithë lojtarët kanë të drejt të luajnë për kombëtaret e vet.