Në Ditën e Punëtorëve, Kosova feston

Edhe pse Kosova është vendi me numrin më të madh të papunëve në Evropë, kosovarët ka zgjedhur shëtitjet dhe festimin në natyrë për 1 Maj

Festa e 1 Majit që simbolizon ditën e punëtorëve, në shumë vende të botës protestohet për m shumë të drejta, ndërsa në Kosovë ndodhë e kundërta. Edhe pse vendi me numrin më të madh të papunëve në Evropë, qytetarët e Kosovës sot ka zgjedhur shëtitjet dhe festimin në natyrë. Megjithatë vetëm një grup i vogël qytetarësh kanë protestuar.

Nga mëngjesi, qindra qytetarëve, fëmijë, gra e pleq, kanë mësyrë parkun e Gërmisë, aty ku zakonisht festohet për 1 Majin – Ditën e Punëtorëve. Kjo festë ka zgjatur deri pas ditë, kur filloi reshja e shiut.

Megjithatë në shenjë të kundërshtimit të shkeljes të të drejtave të punëtorëve, me theks të veçantë në sektorin privat, një grup i të rinjve zhvilloi një marsh nga sheshi “Zahit Pajaziti” deri para Qeverisë së Kosovës, ku në rrethojat e saj u vendosën pankarta me mesazhe kundër shkeljes së Ligjit të Punës dhe Kontratës Kolektive.

Endrit Bytyqi nga ky grup i të rinjve, tha se ky aktivitet është organizuar pasi që në Kosovë po vazhdohet të ketë shkelje të të drejtave të punëtorëve, citon “Zëri”. Ai shtoi se Ligji i Punës është vetën ligj në letër, pasi nuk gjen zbatim, dhe për këtë ai fajësoi institucionet e vendit.

Por, ajo që është e veçantë, Bashkimi i Sindikate të të Pavarura të Kosovës, ka disa vite që nuk organizon protesta për 1 maj.

Ndryshe, sipas të dhënave nga Sindikata e Pavarur e Sektorit Privat në Kosovë, brenda vitit 2015, 9 punëtorë kanë vdekur në vendin e punës, ndërsa rreth 45 punëtor janë lënduar si rezultat i kushteve jo të mira të punës. Personat të cilët kanë humbur jetën në vendin e tyre të punës, kanë punuar kryesisht në sektorin e ndërtimtarisë.

Sipas zyrtarëve shtetërorë, rreth 80 për qind e kompanive private nuk i përmbushin kriteret ligjore që kanë të bëjnë me Ligjin e Punës. Sipas statistikave zyrtare, thuhet se në sektorin privat janë të punësuar mbi 220 mijë punëtorë, ndërsa në atë publik 81 mijë punëtorë. Papunësia shkon në 35 për qind.