Opozita e vendosur: protesta kundër Ivanovit

Para Kuvendit të Maqedonisë, disa qytetarë kanë vendosur tenda, duke shprehur gatishmëri që të qëndrojnë deri të premten, kur pritet shpallja e zgjedhjeve të reja

Opozita maqedonase duket e vendosur për të kundërshtuar nëpërmjet protestave në rrugë vendimin e presidentit Gjorgje Ivanov, për amnistimin e të gjithë politikanëve maqedonas që janë nën hetime, janë duke u gjykuar apo duke vuajtur dënimin me burg. Para Kuvendit të Maqedonisë, disa qytetarë kanë vendosur tenda, duke deklaruar të vendosur për të qëndruar aty deri të premten, kur pritet shpallja e zgjedhjeve të reja.

Protestuesit, të cilët një dit më parë u përleshen me policinë kërkuan dorëheqja e presidenti, Gjorge Ivanovit, tërheqje e vendimit të tij për falje, si edhe shtyrje e zgjedhjeve.

Sipas njoftimeve nga Shkupi, 12 qytetarë janë arrestuar dhe një gazetar është lënduar në protestat që u mbajtën mbrëmë para dhe në afërsi të Zyrës popullore të presidentit Ivanov, në organizim të iniciativës civile “Protestoj”.

Sipas dëshmitarëve okularë, në parregullsitë që kanë ndodhur ka edhe të lënduar të tjerë, midis të cilëve edhe një fotoreporter.

Demonstruesit mbrëmë e demoluan Zyrën popullore të presidentit Ivanov në qendër të Shkupit. Janë thyer dritare dhe mobilet nga zyra, ndërsa është dëmtuar edhe ndërtesa e Ministrisë së Drejtësisë, citon AlsatM.

Protestuan në shenjë revolte nga vendimi i presidentit për ndërprerje të përgjithshme të të gjitha procedurave kundër politikanëve dhe bashkëpunëtorëve të tyre të përfshirë me përgjimet dhe krizën politike. Paraprakisht demonstruesit ishin para Kuvendit, ndërsa policia i pengoi të drejtohen drejt selisë së VMRO-DPMNE-së, partisë që i përket edhe presidenti.

Pas protestës së djeshme, ka reaguar eurokomisari për zgjerim Johanes Han. Ai u bëri  thirrje të gjitha partive politike dhe qytetarëve që të distancohen nga aktet e dhunshme. “Kriza mund të zgjidhet vetëm me mjete politike. Përgjegjësi e politikanëve është që të kthehen në tryezën e negociatave”, ka deklaruar Han pas protestave të mbrëmshme që rezultuan të dhunshme