Prokurorja, merr ryshfet dënohet 3 vjet burg

Ish-prokurorja kosovare, Vahide Badivuku është dënuar me 3 vjet burgim nën akuzën “marrja e ryshfetit” si dhe me një gjobë prej 5 mijë eurosh

E zënë në flagrancë me disa mijë euro në xhep, ish-prokurorja kosovare Vahide Badivuku është dënuar me 3 vjet burgim nën akuzën “marrja e ryshfetit” sipas Kodit Penal të Republikës së Kosovës. Ajo është dënuar edhe një gjobë prej 5 mijë eurosh dhe mos ushtrim i funksionit në administratën publike po ashtu për tri vjet.

Bashkë me Badivukun janë dënuar edhe dy të akuzuar tjerë për shkak të veprës penale “ushtrimi i ndikimit”.

Sipas verdiktit që ka sjellë Gjykata Themelore e Prishtinës gjobën prek 5 mijë eurosh, Badivuku duhet ta paguaj në afat prej 30 (tridhjetë) ditësh, nga dita e plotfuqishmërisë së këtij aktgjykimi.

Gjykata Themelore në njoftimin e saj thotë se kundër këtij aktgjykimi palët e pakënaqura kanë të drejtë të parashtrojnë ankesë në afat prej 15 (pesëmbëdhjetë) dite pas pranimit të aktgjykimit, gjykatës së Apelit në Prishtinë, përmes kësaj gjykate.

E dënuara është arrestuar nën dyshimin se ka marrë ryshfet për t’i liruar disa vetura të sekuestruara, në një lëndë penale, të cilën ajo e ka pasur në hetime. Badiviku ka kërkuar ryshfet në shumën prej 22 mijë eurosh përmes ndërmjetësuesve dhe pas dorëzimit të shumës në fjalë, si prokurore e rastit ka përpiluar kërkesën për lirim të automjeteve.

Gjatë kalimit për në Serbi në pikëkalimin kufitar Merdarë, asaj i janë gjetur 5 mijë euro në çantë që ishin para të ryshfetit. Thuhet se këto mjetet ishin “markuar’ nga Policia e Kosovës para se t’i jepet nga një i akuzuar. Policia e Kosovës besohet e i ka pasur me numër të gjitha monedhat që i janë gjetur Badivukut.

Në njërën nga seancat e procesin gjyqësor ajo qau para gjyqtarit, por lotët e saj dolën të mos jenë masë lehtësues në këtë proces.