Rikthehet gazi lotsjellës në Kuvendin e Kosovës

Seanca filloi sërish me tensione, ndërsa opozita hodhi sërish gaz lotsjellës duke e quar në shtatë muaj bllokimin e këtij institucioni

Edhe pse ishte pritur që seanca e sotme e Kuvendit të Kosovës të ishte më normale, pasi që sigurimi i Kuvendit solli një skaner që identifikon edhe gazin lotsjellës në ambalazh plastik, kjo nuk ndodhi. Seanca filloi sërish me tensione, ndërsa opozita hodhi sërish gaz lotsjellës duke e quar në shtatë muaj bllokimin e këtij institucioni.

Para se të hedhin gazin lotsjellës deputetët e opozitës me “goditje tavoline”, tentuan të pengojnë mbajtjen e seancës. Opozita po vazhdon të kërkoj zgjedhje të parakohshme parlamentare dhe heqjen e nënshkrimeve nga dy marrëveshjet që ka nënshkruar Qeveria me Serbinë dhe Malin e Zi.

Pas hedhjes së gazit, kryeparlamentari Kadri Veseli u detyra të kërkoj pauzë të detyruar, për të filluar më vonë. Në seancën e sotme plenare, Kuvendi ka parashikuar një seancë të ngjeshur me 18 pika në agjendë,

Deputeti Rexhep Selimi nga Lëvizja Vetëvendosjes tha gjatë pauzës së Kuvendit, se opozita nuk ka hequr dorë nga qëllimi i saj.

“Opozita po vazhdon protestën e saj brenda seancës plenare. Çdo kush që ka pritur më ndryshe e ka pasur gabim. Qëllimet e opozitës së bashkuar e kanë arritur qëllimin. Ne nuk do të tërhiqemi. Ne do të vazhdojmë edhe më tutje me të njëjtat mënyra me të njëjta metoda e mbi të gjitha me të njëjtin qëllim”, ka deklaruar Selimi.

Ndërkaq deputeti i AAK-së, Daut Haradinaj tha se opozita është e bashkuar dhe me të njëjtat qëllime, duke kërkuar largimin e Qeverisë, për çka i ftoi qytetarët që t’i bashkohen opozitës në protestën e 26 marsit.

“Edhe njëherë e vërtetuam që opozita është e bashkuar, e kundërshtojmë këtë institucion që e ka humb legjitimitetin, e ftojmë popullin që me datë 26 të dali në sheh që ta kundërshtojmë këtë qeverisje me dy veprimet e saja antikushtetuese”, tha Haradinaj.