Maqedoni: Të rinjtë po e braktisin vendin

Sipas të dhënave të organizatës për bashkëpunim ekonomik dhe zhvillim, për vetëm një vit, Maqedoninë e kanë braktisur 20.563 qytetarë

Shumica të rinjve në Maqedoni vazhdojnë të ëndërrojnë imigrimin jashtë vendit, pasi që shteti i tyre, siç thonë ata, nuk iu krijon prosperitet. Të lodhur nga sistemi i korruptuar dhe papunësia, shumica e të rinjve po shpresojnë të filluar një jetë të re në shtetet e Bashkimit Evropian.

Sipas një hulumtimi nga fondacioni Fridrih Ebert, më shumë se gjysma e të rinjve në Maqedoni duan të largohen në vendet evropiane, për të mos u kthyer kurrë më në vatrat e tyre, njofton agjencia e lajmeve INA.

Fatkeqësisht, në mesin e tyre, ka edhe mjekë, ekonomistë dhe të profesioneve tjera, të cilët janë ngulfatur nga politizimi i të gjitha sferave të jetës.

Numri i tyre nuk është i vogël. Sipas të dhënave të organizatës për bashkëpunim ekonomik dhe zhvillim, për vetëm një vit, Maqedoninë e kanë braktisur 20.563 qytetarë. Sipas këtij raporti të rinjtë janë vendosur në Gjermani, Austri, Zvicër dhe në Shtetet e Bashkuara të Amerikës.

Ajo që po i shtyjnë të rinjtë të ikin apo të ëndërrojnë imigrimin, thuhet se është kriminaliteti dhe amoraliteti i politikës që u shfaqën nga materialet e përgjuara, arsimi, shëndetësia, dhe shumë sfera tjera që dëshmuan se shoqëria maqedonase po shkon drejtë degradimit.