Kosovë, për një vit, 247 mijë tonë mbeturina

Sipas të dhënave që ka publikuar Agjencia e Statistikave të Kosovës (ASK), një kosovar brenda një dite grumbullon 0.4 kilogram mbeturina

Një qytetar i Kosovës brenda një viti grumbullon rreth 140 kilogram mbeturina, të cilat nga koshi i bartin punëtorët e kompanive komunale të pastrimit. Sipas të dhënave që ka publikuar Agjencia e Statistikave të Kosovës (ASK), një banor brenda një dite grumbullon nga 0.4 kilogram mbeturina.

“Rezultatet e AMK-së 2014 tregojnë se sasia e mbeturinave komunale, të grumbulluara në Kosovë për vitin 2014, ishte 247 004 tonë. Në Kosovë, grumbullimi i mbeturinave derë më derë ishte 82 për qind”, thuhet në raport.

Të dhënat statistikore po ashtu tregojnë se mesatarja e mbeturinave komunale, të grumbulluara ka qenë 140 kilogram për banor në vit. Ndërsa, dallime të theksuara vërehen ndërmjet rajoneve.

“Në rajonet  e tjera të Kosovës, sasia e mbeturinave komunale të grumbulluara ka qenë 119 kg për banor në vit, ndërsa në rajonin e Prishtinës, grumbullimi i mbeturinave komunale ka qenë 0.5 kg për banor në ditë, ose 182.5 kilogram në vit”, thuhet në raportin e ASK-së.

Për pjesën tjetër të Kosovës, sasia e mbeturinave komunale, të gjeneruara për banor, në ditë, ka qenë 0.3 kg, kurse mesatarja e mbeturinave, në Kosovë, të grumbulluara për banor, në ditë, ka qenë 0.4 kg mbeturina.

Por, ndryshe nga vendet tjera evropiane në Kosovë nuk ka fabrika për riciklimin e mbeturinave. E vetmja ka qenë në Mitrovicë e cila nga mbeturinat prodhon energji elektrike.