Tetovarët, ultimatum qeverisë së Maqedonisë

Përfaqësuesit e sektorit civil dhe Organizatave “Eco Guerilla” dhe “Nëna e Fëmija”, i kanë dhënë ultimatum qeverisë që deri brenda një jave ta mbyllë “Jugohromin”

Shoqëria civile dhe qytetarët e Tetovës i kanë dhënë ultimatum qeverisë së Maqedonisë që deri më 25 dhjetor, të ndalojë punën e kompanisë “Jugohrom”, në të kundërtën do të  bllokohen të gjitha rrugëve dhe institucioneve komunale. Këto kërcënime kanë dalë nga protesta e sotme e banorëve të Tetovës kundër ndotjes së ajrit.

Protestuesit që sot ishin në numrin më të madh se dje, kërkuan qytetet të pastër, pa ndotje.

Përfaqësuesit e sektorit civil dhe Organizatave “Eco Guerilla” dhe “Nëna e Fëmija”, i kanë dhënë ultimatum qeverisë që deri brenda një jave ta mbyllë “Jugohromin”.

“Kërkesa e parë, të ndërpritet menjëherë puna dhe procesi i prodhimit në Jugohrom deri në vendosjen e plotë të filtrave. Mjaft pritëm se do vetëdijesohen, por nuk u vetëdijesuan. Ky është ultimatum. Pika e dytë. Zhvendosja e deponisë nga hyrja e qytetit të bëhet sa më parë dhe pika e tretë ndalimi i qarkullimit të të gjitha automjeteve pa standarde ekologjike në qytet dhe zgjidhjen e kaosit në trafik. Kërkojmë që këto pika të realizohen më së voni deri në natën e ditës së premte data 25 dhjetor 2015”, deklaroi Arianit Xhaferi, Eco-Guerilla.

Edhe Elmedina Abdullai nga organizata ‘Nëna dhe Fëmija: kërkoi nga institucionet që të veprojnë në mbrojtjen ekologjike të qytetit.

“Ju jeni të zgjedhur me votat tona, ju që jeni përgjegjësit kryesor juve ju kërkojmë llogari të gjithëve një nga një. Nënat kanë një mesazh për Ju, nuk na intereson kush është ndotësi nuk na intereson çfarë masash ju do ndërmerrni , Ose ndalni ju helmin ose ne do ju ndalim juve”, tha Abdullai.

Protestës iu bashkuan edhe personalitete të shumta të estradës duke kërkuar prej banorëve që të mos heqin dorë nga protestat deri në zgjidhjen e problemi, ndërsa pas kanë premtuar edhe një koncert i madh në qendër të Tetovës.

“Të jetosh afër malit Sharr dhe të kesh ajrin më të ndotur në botë kjo është katastrofë e madhe. Kërkojmë dhe jam i bindur që do e fitojmë betejën që Tetova të ketë ajër të pastër për të marr frymë dhe dashtë Zoti që kur t`ia arrijmë qëllimit do e festojmë me një koncert të madh të grupit Elita 5”, deklaroi Arif Ziberi, solisti i  grupit “ELITA 5”, raporton AlsatM.

“Nga sot zero tolerancë edhe për Jugokromin edhe për deponinë por edhe për sjelljen e papërgjegjshme të zyrtarëve që na sollën deri në këtë shkallë”, tha Valentin Tasevski, aktivist.

Pas përfundimit të protestave, një grup qytetarësh kanë gjuajtur me gjësende të forta objektin e komunës së Tetovës, ndërsa kanë hedhur edhe dy shishe të ndezura me gaz para objektit të komunës.