Mali i Zi i gatshëm për rishikimin e kufirit me Kosovën

“Nëse ka dyshime se është bërë ndonjë gabim për kufirin, jemi të gatshëm të marrim parasysh këtë, pasi nuk dëshirojmë mosmarrëveshje me fqinjët”, thuhet në qëndrimin e Podgoricës

Marrëveshja për Demarkacionin e kufirit ndërmjet Kosovës dhe Malin e Zi, që u bë shkas për përplasje politike në Kosovë ndërmjet mazhorancës dhe opozitës, ka shqetësuar edhe Qeverinë e Malit të Zi. Podgorica zyrtare thotë se kufiri me Kosovën është në harmoni me Kushtetutën e ish-Jugosllavisë të vitit 1974.

Megjithatë, Qeveria e kryeministrit Milo Gjykanoviq, shprehet i gatshëm për të rishikuar edhe një herë vijën nëse ka vërejtje.

Sipas një komunikate lëshuar nga Qeveria në Podgoricë, thuhet se qëndrimi i kësaj qeveria vjen pas kërkesave të disa mediave vendore dhe të huaja lidhur me refleksionet politike në Kosovë lidhur me kufirin shtetëror ndërmjet Malit të Zi dhe Kosovës,

“Qeveria e Malit të Zi, Shërbimi për Marrëdhënie me Publikun informon opinionin se, ne mospajtimet në Prishtinë në lidhje me marrëveshjen për përcaktimin e kufirit me Malin e Zi, i konsiderojmë çështje të brendshme të Kosovës”, thuhet në reagim.

Qeveria e malit të Zi thotë se e mbron qëndrimin se Marrëveshja zyrtarisht konfirmon kufijtë administrativë në pajtim me Kushtetutën e ish- Federatës Jugosllave të vitit 1974.

“Nëse ka dyshime se nuk është kështu dhe është bërë ndonjë gabim, ne jemi të gatshëm të marrim parasysh këtë pasi nuk dëshirojmë mosmarrëveshje me fqinjët tanë, duke i pasur parasysh interesat kombëtare dhe shtetërore të Malit të Zi”, thuhet në reagimin e lëshuar nga kryeministri i Malit të Zi, Milo Gjukanoviq, i cili thotë se këtë mesazh ia ka përcjell kryeministrit të Kosovës, Isa Mustafa dhe zyrtarëve të tjerë të Kosovës.

Ndryshe më 26 gusht zëvendëskryeministri dhe njëherësh Ministri i Jashtëm, Hashim Thaçi dhe ai i Punëve të Brendshme, Skënder Hyseni nënshkruan në Vjenë marrëveshjet me Malin e Zi për demarkacionin e kufirit. Kjo marrëveshje e cila akoma nuk është ratifikuar në Kuvend, irritoi opozitën, e cila po vazhdon me bllokim seancash.

Sipas partive opozitare, me këtë marrëveshje Kosova po i humbë rreth 12 mijë hektarë tokë. Tani pasi kjo u bë problem i madh që çoi edhe në arrestimin e shtatë deputetëve opozitarë, Qeveria në Prishtinë pranoi që për këtë çështje të krijohet një komision ndërkombëtar i arbitrazhit.