Arrestohen dy deputetë opozitarë, Topalli e Haxhiu

Policia e Kosovës ka arrestuar deputetin Faton Topallin i cili ka nënshtetësi zvicerane dhe Albulena Haxhiun, nën dyshimin se kanë hedhur gaz lotsjellës brenda Kuvendit

Policia e Kosovës ka arrestuar sot dy deputetët e fundit që ishin në arrati, Faton Topallin, i cili ka edhe nënshtetësi zvicerane dhe Albulena Haxhiun, të cilët akuzohen për hedhjen e gazit lotsjellës brenda ambientit të Kuvendit të Kosovës. Derisa Topalli u arrestua brenda objektit të Kuvendit, Haxhiu është arrestuar rrugës për Gjilan.

Arrestimi i këtyre dy deputetëve, që i përkasin grupit më të madh opozitar, Lëvizjes Vetëvendosje, ka shqetësuar partitë opozitare të cilat arrestimin e deputetëve e quajnë “burgosje politike”.

Sipas Vetëvendosjes, Faton Topalli është arrestuar brenda Kuvendit, derisa po kryente detyrat e veta legjislative. Sipas LVV, ky është vazhdim i represionit të pushtetit, kundër subjekteve opozitare. “Edhe ky veprim është i pa pranueshëm, dhe si i tillë vetëm sa do të rritë gatishmërinë e opozitës për të vazhduar rrugën e kundërshtimit të marrëveshjeve të dëmshme për Kosovën”, konsideron Vetëvendosje.

Vetë Topalli ka shkruar në rrjetin facebook, se ai është ndaluar në Kuvend nga Policia, e cila “nuk po më lë t’i kryej detyrat që më takojnë si deputet”.

“Tani policia nuk më lë të dal nga Kuvendi. Nuk më thanë asnjë arsye pse nuk mund të dal. Momentalisht jam i arrestuar brenda Kuvendit. Kryeministri Isa Mustafa po feston një vjetorin e pushtetit të tij përmes arrestimit të deputetëve të opozitës. Po në rrugën tonë për Republikën e Kosovës nuk mund të na ndal askush”, ka shkruar Topalli.

Ndërkaq, deputetja Albulena Haxhiu është arrestuar rrugës për Gjilan dhe është dërguar në Prokurorinë Themelore të Prishtinës. Këtë e ka konfirmuar Nazlie Balaj e cila ishte e shoqëruar me Haxhiun në momente e arrestimit.

Me arrestimin e këtyre dy deputetëve, ka shkuar në shtatë numri i deputetëve të opozitës që janë paraburgosur apo janë dënuar më arrest shtëpiak, nën dyshimin se kanë hedhur gaz lotsjellës apo janë munduar ta kontrabandojnë gazin brenda Kuvendit. Rebelimi i opozitarëve ka ardhur pas nënshkrimit të marrëveshje të fundit nga Qeveria, njërën me Serbinë për Asociacionin e komunave serbe dhe tjetrën për Demarkacionin e kufirit me Malin e Zi. Opozita po kërkon tërheqjen e nënshkrimit nga këto dy marrëveshje.