32 mijë veta hoqën dorë nga shtetësia e Kosovës

Brenda 7 vjetëve të fundit, rreth 32 mijë kosovarë kanë heqë dorë nga nënshtetësia kosovare. Ndërsa vetëm 1200 kanë marrë nënshtetësi të Kosovës

Brenda shtatë viteve të fundit, me shumë se 32 mijë qytetarë të Kosovës kanë hequr dorë vullnetarisht nga nënshtetësia, ndërsa vetëm 1200 shtetas të huaj kanë marrë shtetësinë e Republikës së Kosovës. Kështu raportojnë zyrtarët e Ministrisë së Punëve të Brendshme në Prishtinë.

Sipas të njëjtave statistika që i ka publikuar KTV, nga viti 2009 e deri më tani, rreth 32 mijë persona kanë hequr dorë nga shtetësia. Arsye për këtë sipas Ministrisë së Punëve të Brendshme, është se disa vende të Bashkimit Evropian nuk i lejojnë dy shtetësi për shtetasit që nuk janë pjesë e BE-së.

E numri i atyre që kanë kërkuar shtetësinë e Kosovës është 6 mijë persona, por vetëm 1200 prej tyre e kanë fituar atë. Personat të cilët kanë fituar shtetësinë e Kosovës, sipas MPB-së, janë kryesisht nga vendet fqinje, Serbia, Mali e Zi dhe Maqedonia, të cilat lejon një e më shumë shtetësi.

Të dhënat gjatë periudhës janar-dhjetor 2015, tregojnë se në pikat kufitare janë kthyer 16 mijë 546 persona të riatdhesuar nga shtetet e ndryshme.

Ndryshe, marrja e nënshtetësisë kosovare është shumë e vështirë. Më së lehti e kanë qytetarët që e kanë njërin prind nga Kosova, në të kundërtën duhet të jesh 5 vjet banorë rezident i Kosovës, të kesh një punë të rregullt dhe të kesh letërnjoftimin e përkohshëm, të cilin duhet ta vazhdosh çdo vjet, pesë vjet rresht.

Dhe pas gjithë kësaj kohe MPB kërkon një varg dokumentesh të tjera, që tregojnë se personi që merr shtetësinë kosovare nuk është nën hetime nga vendi ku ka lindur.