Zvicra, vetëm një hap deri në gjysmëfinale

Për golin e parë, të cilin e shënoi Frei që në sekondën e 53-të, ka merita të mëdha edhe Shaqiri, i cili ia përgatiti atij topin për portë

Edhe një fitore e kombëtares U21 të Zvicrës në Kampionatin Evropian të kësaj kategorie që po mbahet në Danimarkë. 2 me 0 ka qenë rezultati i lojës në të cilën për Zvicrën kanë luajtur edhe shqiptarët Shaqiri, Xhaka dhe Abrashi, ndërsa ka munguar Mehmedi.

Për golin e parë, të cilin e shënoi Frei që në sekondën e 53-të, ka merita të mëdha edhe Shaqiri, i cili ia përgatiti atij topin për të shënuar. Pas 40 minutave erdhi edhe goli i dytë për Zvicrën. Kësaj here ishte Emeghara ai që tundi rrjetën kundërshtare dhe ndryshoi rezultatin në 2 me 0.

Loja e kombëtares zvicerane ka qenë përgjithësisht ofensive. Madje, në krahasim me ndeshjen kundër Danimarjës e cila mund të quhej “Shaqiri-Show”, kjo kundër Islandës ishte më shumë ndeshje me ekip komplet efikas në sektorin e sulmit, ka thënë trajneri Tammi.

Pas fitores së dytë radhazi, Zvicra qëndron me një këmbë në gjysmëfinale. Asaj i mjafton një pikë në ndeshjen kundër Bjellorusisë për ta arritur këtë. Ndërkaq Danimarka e mundur nga Zvicra, ka fituar me rezultat 2:1 kundër Bjellorusisë.