Zvicra dhe shqiptarët trimërojnë heronjtë e Evropianit 2011

Përbërja multikulturore e skuadrës i ka dhënë kombëtares zvicerane pasionin, ambicien. Kanë lënë anash modestinë tipike zvicerane

Me humbjen e mbrëmshme të përfaqësueses szvicerane U21 janë marrë shumica e medieve të këtushme. Por pothuaj të gjitha kanë lavdëruar djelmoshat e kombëtares për angazhimin e treguar gjatë gjithë kampionatit (4 fitore radhaz) dhe i kanë trimëruar ata.

Kështu gazeta NZZ am Sonntag duke konstatuar se „humbja erdhi vetëm në hapin e fundit, pas një turneu të madh shkruan se “lojtarët tanë kanë bërë reklamën më të mirë për futbollin e këtushëm dhe ia dolën që për herë të parë pas vitit 1928 të kualifikohen për Lojërat Olimpike”.

Gazeta „Zentralschweiz am Sonntag” duke iu referuar humbjes në finale që erdhi pas serisë së fitoreve e quan atë „Fund i hidhur pas javës festive”. Ndërsa „Sonntags-Blick”, duke ngushëlluar lojtarët e U21-shit, ju drejtohet atyre në mënyrë patetike: „Ju humbët por fituat zemrat e zviceranëve. Kokën lart! Ne megjithatë jemi krenarë me ju”.

Në editorialin e blick.ch vlerësohet lartë përbërja multikulturore e skuadrës, ajo që i ka dhënë kombëtares zvicerane pasionin, ambicien dhe pse jo, edhe dëshirën për të qenë në qendër të vëmendjes. Sipas autorit të editorialit, “ata kanë lënë mbrapa modestinë tipike zvicerane dhe kanë bërë mirë që kanë vepruar kështu”.

Ndërsa portali i të përditshmes 20minuten.ch shkruan: „Pas javëve festive me lojëra të mira kombëtarja U21 në përplasjen me juniorët e kampiones evropiane dhe botërore, Spanjës preku në limitet e veta”.

Gazeta shkruan se të gjithë ishin të pikëlluar por kjo më shumë dukej te Shaqiri, i cili dy herë qe zgjedhur lojtar i ndeshjes. Atë e ngushëllonin trajneri Tami dhe bashkëlojtarët e tij Xhaka e Kasami duke ia rrahur krahët.

I pikëlluar ishte edhe Mehmedi, i cili ka merituar titullin e „këpucës së argjendtë” për tre golat e shënuar gjatë kampionatit evropian U21. „Në kampionatin e Zvicrës i dyti me FC Zürich pas FC Basel, në Kampionatin Evropian i dyti pas Spanjës, dhe në vlerësimin për golashënuesin më të mirë po ashtu i dyti… Tash duhet të shikoj si të bëj njëshin nga dyshi”, ka thënë Mehmedi për 20 minuten.