Zvicër: Fluks i madh i votave me postë

Dy ditë para zgjedhjeve nacionale vendvotimet janë vërshuar nga zarfet me fletëvotime

Në Zvicër, numri më i madh i votuesve votojnë përmes postës. Dhe votuesit postarë zakonisht i presin ditët e fundit për ta kryer obligimin e tyre qytetar. Kështu edhe këtë vit, dy ditë para zgjedhjeve nacionale vendvotimet janë vërshuar nga zarfet me fletëvotime. Ky fluks po ndjehet gjatë gjithë javës, shkruajnë mediet zvicerane.

Por ende nuk mund të bëhet ndonjë konstatim lidhur me numrin, të rritur ose të zvogëluar të votuesve me postë. Kështu, në disa qytete është shënuar një numër më i madh i votuesve të tillë krahasuar me zgjedhjet e para katër viteve, ndërkohë që në qytete tjera ky numër është më i vogël.

Në Winterthur, për shembull, deri në paraditen e të enjtes, 37.7% të qytetarëve me të drejtë vote kishin votuar me postë. Kjo përqindje përbën një rritje prej 8% krahasuar me vitin 2007. Nga ana tjetër, në Lozanë deri të mërkurën, përmes postës kishin votuar 28.5%, ndërsa në zgjedhjet e katër viteve më parë këtë e kishin bërë 39%.