“Transportohet” ndërtesa e lartë 12 metra

Ndërtesa me gjatësi prej 80 metrash dhe e rëndë 6200 tonë, duhet të bartet për 60 metra në drejtim të perëndimit

Një ndërtesë 122 vjeçare në Oerlikon të Cyrihut do të duhet “të shtyhet” pak më tutje për t`i lënë vend ndërtimit të dy peroneve të stacionit të trenit. 11 milionë franga do t`i kushtojë ndërmarrjes Swiss Prime Site bartja fizike e ndërtesës e cila dikur shërbente si drejtori e fabrikës së makinave Oerlikon.

Sot kanë filluar simbolikisht punimet përgatitore për bartjen e kësaj godine, punime që do të zgjasin deri në mars të vitit të ardhshëm. Vetë procesi i bartjes pritet të mos zgjasë më shumë se 10 deri 12 orë.

Ndërtesa me gjatësi prej 80 metrash, e lartë 12 metra dhe e rëndë 6200 tonë, duhet të bartet për 60 metra në drejtim të perëndimit. “Transportimi” i saj do të bëhet përmes gjashtë binarëve të improvizuar.

Ndërtesa ishte nën mbrojtje të shtetit si monument historik që dëshmon për periudhën e hershme të  industrializimit në këtë regjion. Për të zgjeruar stacionin hekurudhor të Oerlikonit atë e kërcënonte mundësia e rrënimit. “Transportimi” i saj ishte shpëtimi në momentin e fundit për të.