Sindikata e Arsimit sfidon Ministrinë, “arsimtarët nuk mund t’i testoni”

Sindikata e Arsimit sugjeron që mësimdhënësit të monitorohen gjatë procesit mësimor nga inspektorët profesionalë dhe jo të ngritën teste për të vlerësuar njohuritë e tyre. Ministria kërkon vlerësim të përgjithshëm

Ministria e Arsimit, Shkencës dhe Teknologjisë ka paralajmëruar një vlerësim për të gjithë mësimdhënësit në Kosovë, për të identifikuar nëse ka nevoja shtesë për trajnimin e tyre apo jo. Por, Sindikata e Bashkuar e Arsimit, kundërshton testimin e mësimdhënësve, duke e cilësuar si nënçmues për ta.

Sindikata sugjeron që mësimdhënësit të monitorohen gjatë procesit mësimor nga inspektorët profesional dhe jo të ngritën teste për të vlerësuar njohuritë.

Kryetari i Sindikatës së Bashkuar e Arsimit, Shkencës dhe të Kulturës në Kosovë (SBASHK), Rrahman Jasharaj, tha për Radio Kosovën, se testimi i mësimdhënësve është hedhur poshtë, që kur ishte ide e ish-ministrit Arsim Bajrami. Ai tha se testimi i njohurive të mësimdhënësve është degradues edhe për personalitetin e mësimdhënësit, por edhe për diplomat e tyre.

Sindikata e Arsimit, propozon që puna e mësimdhënësve të vlerësohet duke u monitoruar nga inspektorët profesionalë.

“Atëherë dhe tani do të jemi kundër testeve të tilla. Qeveria jonë të angazhohet në mënyrë që të monitorohen orët. Inspektorët profesionalë të shkojnë nëpër orë, të shikojnë nga afër punën e mësimdhënëse nëpër klasë me nxënësit, të shohim se cilat janë të metat, në mënyrë që bashkërisht të tejkalojmë këto dobësi. Nuk jemi kundër që të monitorohet puna e mësimdhënësve nëpër klasa përmes inspektorëve, por jemi kundër testimeve sepse janë nënçmuese”, tha Jasharaj.

Ndërkohë, mësimdhënësit nuk pranojnë të flasin për këtë çështje.

Udhëheqësi i Inspektoratit për rajonin e Prishtinës, Nebi Behluli tha se Ministria e Arsimit në fund të vitit 2017, ka miratuar politikat programore për vlerësimin e jashtëm të performancës së mësimdhënësve, ku janë kryer edhe fazat e pilotimit në disa shkolla.

“Si projekt është mirëpritur edhe nga shkollat dhe realisht i kemi qëndrimet e përafërta. E njëjta fazë e pilotimit ka vazhduar edhe në disa rajone në Kosovë. Është një pako e instrumenteve të Inspektoratit, që është bërë përmes monitorimit, vlerësimit dhe vëzhgimit në orë mësimore në klasë. Rezultatet kanë qenë të pritshme dhe janë pranuar politikat programore të Ministrisë dhe Inspektoratit”, tha Behluli

Ndryshe, ideja e MASHT-it për t’i vlerësuar mësimdhënësit ka ardhur pas vlerësimit të PISA-s, ku Kosova radhitet e fundit për përgatitje në arsim.