SHBA i jep “dritën e gjelbër” eksportit të armatimit për Kosovën në vlerë mbi 14 milionë dollarë

Departamenti amerikan i Shtetit njofton Kongresin për një licencë të propozuar për artikuj dhe shërbime të mbrojtjes drejt Kosovës

 

 

Departamenti amerikan i Shtetit e ka njoftuar Kongresin e Shteteve të Bashkuara për një leje të propozuar për eksportimin e artikujve të mbrojtjes, të dhënave teknike dhe shërbimeve të mbrojtjes drejt Kosovës, në vlerë prej 14 milionë dollarësh apo më shumë, përcjell albinfo.ch.

Njoftimi është dërguar nga Byroja për Çështje Legjislative e Departamentit të Shtetit, në përputhje me nenin 36(c) të Ligjit për Kontrollin e Eksportit të Armëve.

Sipas dokumentit, ky njoftim mban numrin e transmetimit DDTC 26–017, dhe i është përcjellë Komitetit për Marrëdhënie me Jashtë të Senatit amerikan.

Ligji amerikan kërkon që administrata t’i njoftojë institucionet ligjvënëse për disa shitje ose licenca të propozuara që lidhen me eksportin e pajisjeve dhe shërbimeve të mbrojtjes për shtete të huaja.

Në dokumentin e dorëzuar në Kongres nuk janë dhënë hollësi publike lidhur me llojin e pajisjeve apo shërbimeve të mbrojtjes që përfshihen në këtë licencë për Kosovën./rel

---