Reagime të ndryshme rreth “aferës së municionit”

Për SP-në dhe të gjelbrit, deklarimi se Seco nuk do të lejojë përkohësisht eksporte municioni në Katar është i pamjaftueshëm

Sekretariati Shtetëror për Ekonomi (Seco) ka sqaruar për opinionin se si ka ndodhur që municioni i prodhuar në Zvicër të përdoret në luftimet në mes të rebelëve dhe diktatorit libian, Gadafi. Sipas Seco-s municioni i është shitur katarit nga kompania zvicerane Ruag Ammotec e Thunit.

Kjo kompani ka eksportuar municionin vetëm pasi ka marrë zotimin e Katarit se nuk do ta përcjellë atë në shtetet tjera. Mirëpo autoritetet e katarit nuk i janë përmbajtur premtimit dhe e kanë stërshitur municionin zviceran.

Pas një zhvillimi të tillë, Seco ka vendosur të mos ndajë më leje për eksportim të municionit në Katar, ka thënë një zëdhënëse për televizionin zviceran sf1.

Ndërkohë kanë qenë të ashpra reagimet e partive politike të Zvicrës, në veçanti të socialdemokratëve dhe të gjelbërve rreth kësaj çështjeje. Për ta, deklarimi se Seco nuk do të lejojë përkohësisht eksporte municioni në Katar është i pamjaftueshëm. Sipas deputetit nacional të gjelbër Joe Lang,duhet ndërprerë tërësisht këtë lloj eksporti.

Ngjashëm kërkon, pra ndërprerjen e eksportit të municionit në shtetet në konflikte, edhe Evi Allemann nga Partia Socialdemokrate. Nga ana tjetër politikani i CVP-së Jakob Büchler e ka quajtur “rast të veçuar e të pahijshëm” skandalin e municionit.