Qeveritarët kosovarë në trajnime në Angli

Qeveritarët e Kosovës do të trajnohen nga ish këshilltari i kryeministrit britanik, Tony Blair

Shumëkush në Angli beson se fuqia e vërtetë prapa ish-kryeministrit Tony Blair ishte pikërisht drejtori i tij i komunikimeve, Alastair Campbel. Ky i fundit ishte autori i porosive dhe taktikës mediale të laburistëve pas kthimit të tyre në pushtet në Angli, e më vonë edhe njeriu kryesor në mbrojtjen mediale të politikave të Blairit si lufta në Kosovë dhe Irak.

Pas rënies së Tony Blairit nga pushteti, Campbell është tërhequr nga politika derisa vazhdon të mbetet në “treg” me librat e tij të popullarizuar dhe angazhimet si këshilltar për komunikim i kompanive të mëdha botërore.

Campbell pritet që së shpejti në listën e “studentëve” të tij ta përfshijë edhe Qeverinë e Kosovës, shkruan Express. 

Eksperti i famshëm i marrëdhënieve me publik do të mbajë një kurs intensiv për zyrtarë të lartë të Qeverisë rreth çështjeve të komunikimit strategjik.

Sipas Expressit, ardhja e tij është organizuar nga Këshilli Britanik dhe Ministria e Punëve të Jashtme e Republikës së Kosovës. 

Ky trajnim është vetëm një pjesë e programit njëvjeçar të përgatitur nga MPJ-ja dhe Këshilli Britanik nga fondet e përbashkëta të Prishtinës dhe Londrës.