Qeveria kundër “çarmatimit” të shërbyesve ushtarakë

Nuk ka nevojë për masa të mëtejshme për reduktimin e mbajtjes së armëve në shtëpi, thotë Qeveria Federale

Pas fillimit të fushatës për referendumin kundër mbajtjes së armëve të shërbimit nëpër shtëpitë e shërbyesve ushtarakë, Qeveria Federale ka dalë me kundëriniciativën e saj.

Sipas paraqitjes publike të bërë nga ministrja e drejtësisë Simoneta Sommaruga, nuk ka nevojë për masa të mëtejshme për reduktimin e mbajtjes së armëve në shtëpi. Masat ekzistuese, si detyrimi për dorëzimin e municionit dhe mundësia për lënien e armës në kazermë, janë të mjaftueshme për këtë, ka thënë ajo.

Po ashtu ajo ka thënë se referendumi mund të ngjallë shpresa të pabaza te popullata për rënien e numrit të krimeve të shkaktuara nga këto armë, njofton nzz.online.

Sommaruga, duke u vënë për nga funksioni që ushtron, në krye të kundëriniciativës, është detyruar të flasë kundër partisë që e ka deleguar në këtë post (SP) dhe, mbase, kundër bindjeve të saj, thuhet në mediet e sotme të Zvicrës.