Gjermani: Mijëra nxënës protestojnë kundër shërbimit të detyrueshëm ushtarak

@unsplash

Mijëra nxënës në qytete të ndryshme të Gjermanisë kanë dalë në protesta kundër mundësisë së rikthimit të shërbimit të detyrueshëm ushtarak. Demonstratat u organizuan nën sloganin “Grevë shkollore kundër shërbimit ushtarak”, në përvjetorin e përfundimit të Luftës së Dytë Botërore.

Në Berlin, protestuesit marshuan nga Porta e Brandenburgut drejt selisë së partisë së kancelarit Friedrich Merz, duke mbajtur pankarta me mesazhe si “Arsim, jo bomba”. Sipas policisë, në protestë morën pjesë rreth 1 200 persona, ndërsa organizatorët pretendojnë se numri ishte shumë më i lartë.

Edhe në Hamburg u zhvilluan protesta të mëdha, ku organizatorët raportuan rreth 6 000 pjesëmarrës.

Këto protesta vijnë pasi Gjermania ka rikthyer programin vullnetar ushtarak për të rritur numrin e trupave, për shkak të situatës së sigurisë në Evropë dhe luftës në Ukrainë. Nëse numri i vullnetarëve nuk mjafton, parlamenti mund të shqyrtojë rikthimin e shërbimit të detyrueshëm ushtarak.