Publikohet fotografia e re zyrtare e Qeverisë Federale

Në fotografinë grupore prej tetë personave, gratë janë në shumicë: katër ministre plus kancelarja federale kundrejt 3 meshkujve ministra

Qeveria e Zvicrës, e kompletuar muaj më parë me dy ministra të rinj, ka publikuar sot fotografinë e saj të re, zyrtare për këtë vit. Fotografia dallon nga ato të mëparshmet për nga numri më i madh i qeveritareve femra në krahasim me kolegët e tyre meshkuj.

Në fotografinë grupore prej tetë personave janë katër gratë ministre plus kancelarja federale (post administrativ në Zvicër), Corina Casanova. Ndërsa burrat, tre sish, mbeten në pakicë.

Kjo përbërje gjinore tregon edhe ndryshimin e bërë brenda njëzet viteve të fundit. Kështu, përderisa në vitin 1993 e vetmja grua në qeverinë federale ishte Ruth Dreifuss, sot, 17 vjet më vonë, gratë përbëjnë shumicën bindëse të kësaj qeverie.

Fotografia grupore, ndryshe nga ato të bëra viteve të kaluara, duket e thjeshtë dhe klasike, pa ndonjë efekt dekori. Atë e ka realizuar fotografja nga Berna Monika Flückiger, sipas idesë së presidentes së re, Micheline Calmy-Rey.