BE, 76 % rënie në shitjet e makinave

Shkak, koronavirusi.

Si shak i vendosjes së kufizimeve në muajin prill, për parandalimin e përhapjes së COVID 19, shitja e makinave në Bashkimin Evropian ka rënë për 76.3 për qind.

Shoqata Europiane e Prodhuesve të Automjeteve pohoi se rreth 270,000 makina të reja janë regjistruar muajin e kaluar, krahasuar me 1.14 milion në prill të vitit 2019. “Muaji i parë i plotë me kufizime për shkak të pandemisë së koronavirusit ka rezultuar me rënien më të madhe mujore të kërkesave, që nga nisja e regjistrimeve”, thanë drejtues të saj, shkruan tch, përcjell albinfo.ch.

Në mars shitjet shënuan një rënie me 55.1 për qind krahasuar me periudhën e njëjtë të vitit të kaluar. Por me kalimin e javëve, ky fenomen është theksuar akoma më shumë. Sektori i makinave ka qenë një nga më të prekurit nga pandemia e koronavirusit, pasi izolimi ka zvogëluar kërkesën e konsumatorit dhe ka detyruar mbylljen e dyqaneve dhe fabrikave të automjeteve në gjithë Europën. Në Itali dhe Spanjë – dy vendet që kanë ndërmarrë disa nga masat më të rrepta për kontrollimin e koronavirusit – shitjet kanë rënë pothuajse në zero.

---