Turnir futsalli në Berlin për 28-vjetorin e Epopesë së UÇK-së

Komuniteti shqiptar në Berlin mblidhet për të nderuar kontributin historik të Ushtrisë Çlirimtare të Kosovës

Në bashkëorganizim me FC Liria, në Berlin u zhvillua një turnir futsalli në shënim të 28-vjetorit të Epopesë së Ushtrisë Çlirimtare të Kosovës. Aktiviteti solli së bashku komunitetin shqiptar dhe u zhvillua në një atmosferë sportive dhe festive, duke kombinuar kujtimin historik me pasionin për sportin, transmeton albinfo.ch.

Në këtë organizim, Ambasadori Ajeti falënderoi pjesëmarrësit dhe FC Liria për përkushtimin dhe angazhimin në realizimin e turnirit. Ai vuri në dukje rëndësinë e Epopesë së UÇK-së si simbol të sakrificës, guximit dhe përkushtimit për lirinë e Kosovës, duke theksuar se aktiviteti u zhvillua në nder të kontributit historik të Ushtrisë Çlirimtare të Kosovës.

Turniri u shndërrua në një mundësi për të forcuar lidhjet mes bashkatdhetarëve dhe për të kujtuar një nga ngjarjet më të rëndësishme të historisë së re të Kosovës./Albinfo.ch

---