Mustafa e quan të papranueshëm vendimin e Kurtit

Reagon Lidhja Demokratike e Kosovës, pas vendimit të kryeministrit të Kosovës, Albin Kurti për shkarkimin e Ministrit të Punëve të Brendshme, Agim Veliu.

Kryetari i LDK-së, Isa Mustafa e ka cilësuar të papranueshëm vendimin e Kurtit për shkarkimin e Agim Veliu-t nga posti i tij si Ministër i Punëve të Brendshme.

Në një prononcim për mediat kosovare, Mustafa ka thënë se ai nuk është konsultuar para këtij vendimi.

Ndryshe, Kryeministri i Kosovës, Albin Kurti e ka shkarkuar sot ministrin e Punëve të Brendshme, Agim Veliu.Kjo sipas Kurtit, pas deklaratave që ministri Veliu i kishte bërë mbrëmë, për të cilat nga Qeveria thonë se përhapin panik te qytetarët. Në këto momente, kur e gjithë administrata publike po bën përpjekje maksimale për të minimizuar dëmet nga virusi korona, udhëheqësit e institucioneve qendrore, përfshirë këtu anëtarët e kabinetit qeveritar duhet të demonstrojnë maturi si në vendime, ashtu edhe deklarime.

Përmes deklaratave të tij të bëra publikisht, por jo edhe të mbështetura me qëndrime të tij në mbledhje të brendshme, ministri i Punëve të Brendshme dhe Administratës Publike, z. Veliu ka dëshmuar mungesë të theksuar lidershipi dhe ka minuar hapur punën e qeverisë, pjesë e të cilës ai është”, shkruhet në njoftim.

---