Duartrokitet shfaqja e filmit “Shame and Money” të Visar Morinës në Amerikë

Filmi i Visar Morinës “Shame and Money” pritet me duartrokitje të pandërprera në Sundance Film Festival

Filmi më i ri i regjisorit kosovar Visar Morina, “Shame and Money (Shaban dhe Hatixhe)”, ka pasur premierën e tij botërore në kuadër të Sundance Film Festival, në Park City, Utah, transmeton albinfo.ch.

Shfaqja u prit me duartrokitje të gjata dhe të njëpasnjëshme nga publiku, ndërsa kritika ndërkombëtare ka reaguar pozitivisht ndaj filmit. Sipas Qendrës Kinematografike të Kosovës, vepra e Morinës ka ngjallur interes të madh për realizmin e saj emocional dhe qasjen autentike ndaj temave shoqërore.

Media prestigjioze The Film Verdict e ka cilësuar “Shame and Money” si “një dramë të fuqishme dhe vëzhguese, që reflekton mbi dinjitetin njerëzor nën presionet e kapitalizmit të egër”, duke vlerësuar veçanërisht thellësinë emocionale dhe ndërtimin realist të personazheve.

“Shame and Money” përforcon më tej profilin ndërkombëtar të Visar Morinës, duke e pozicionuar kinemanë kosovare në një nga platformat më të rëndësishme të filmit në botë./Albinfo.ch

---