Ministrat zviceranë në “ekskursion shkollor”

Për "ekskursionin shkollor" ata tradicional kanë zgjedhur Gjenevën, gjegjësisht qendrën evropiane për studime Nukleare, Cern

Qeveria e Zvicrës, respektivisht të shtatë ministret dhe ministrat e saj, është bartur sot në Gjenevë. Për “ekskursionin shkollor” tradicional që ministrat e realizojnë në prag të pushimeve verore, kësaj radhe kanë zgjedhur Gjenevën, gjegjësisht qendrën evropiane për studime Nukleare me nam botëror, Cern. Mikpritëse kësaj radhe ka qenë presidentja dhe anëtarja e qeverisë, Micheline Calmy-Rey, e cila vjen nga Gjeneva.

Në qendrën Cern ku kohëve të fundit janë zhvilluar eksperimente interesante për gjetjen e zanafillës së jetës në botë, qeveritarët i ka pritur drejtori gjeneral Rolf Heuer. Ai u ka shpjeguar në hollësi ministrave se çfarë nënkuptohet me antimaterien dhe me LHC-në.

Pas Cern-it, të shtatë qeveritarët janë ndalur në një drekë të përbashkët me qeverinë e Gjenevës.