Kthehet dimri në Zvicër, në shumë vende borë dhe temperatura nën zero

Në mëngjesin e të shtunës, përgjatë ultësirës qendrore dhe lindore të Alpeve janë regjistruar rreth 25 deri në 30 centimetra borë e freskët që ka rënë gjatë natës

Prilli në Zvicër ka filluar me temperatura dimrore dhe me reshje bore. Temperaturat e dimrit do të vazhdojnë me borë dhe ngrica deri të hënën.

Në mëngjesin e të shtunës, përgjatë ultësirës qendrore dhe lindore të Alpeve janë regjistruar rreth 25 deri në 30 centimetra borë e freskët që ka rënë gjatë natës dhe ka vazhduar të bjerë, transmeton albinfo.ch Ekspertët e motit kanë paralajmëruar për ngrica dhe rrugë të rrëshqitshme.

Shumica e sasisë së borës ka rënë në 24 orët e fundit përgjatë ultësirës së Alpeve dhe në lartësi më të mëdha, për shembull në Valais, është bërë e ditur nga Zyra Federale për Meteorologji dhe Klimatologji, shkruan agjencia e lajmeve Keystone-SDA.

Në raste ekstreme, temperatura mund të bie deri në -10 gradë!

Në Escholzmatt LU janë matur 28 centimetra borë të freskët në mëngjesin e sotëm. Por mbulesa e bardhë  prej 2 deri në 8 centimetra është parë edhe në Mittelland.

Me temperaturat pak mbi zero që po mbretërojnë, është jashtëzakonisht ftohtë për këtë kohë të vitit. Sipas parashikimeve, një tjetër rrymë e ftohjes do të pasojë mbrëmjen mes të dielës dhe të hënës, transmeton albinfo.ch. Sipas shërbimit privat të motit, Meteonews, priten temperatura të ulëta nga minus 5 deri në minus 2 gradë në shumë vende në Rrafshnaltën Qendrore dhe në luginat e poshtme të Alpeve.

Në raste ekstreme, temperaturat deri në minus 10 gradë janë të mundshme në vendet e ekspozuara.

Pa mbrojtje nga ngrica të dielën mbrëma, ekziston rrezik rajonal për dëme masive nga ngricat, shkruan Meteonews.

---