Kosova në 24 orët e fundit ka trefishin e të shëruarve në raport me të prekurit

Për tri ditë në Kosovë janë shëruar 105 persona, ndërsa janë prekur 43 me COVD-19

Sheteti i Kosovës në ditët e fundit ka treguar statistika, ku numri i shërimeve prin dukshëm në raport me të prekurit nga Covid-19, shkruan albinfo.ch.

Duke nisur nga e hëna e 27 prillit, numri i të shëruarve ka qenë më i lartë se ai i rasteve të reja pozitive. Përderisa u regjistruan 105 të shëruar, në këto katër ditë numri total i rasteve të reja pozitive ishte 43.

Sipas Institutit të Shëndetësisë Publike, thuhet se vetëm mbrëmë janë shëruar edhe njëzet e dy (22) pacientë, bazuar në rekomandimet e OBSH-së, ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej dyqind e shtatëdhjetë e një (271) raste.

Nga data 08 shkurt deri më 30 prill 2020 në Laboratorin e Mikrobiologjisë Molekulare në IKSHPK me metodën RT-PCR janë testuar gjithsej 7.423 mostra të dyshimta në virusin SARS-CoV-2 dhe prej tyre pozitive rezultojnë gjithsej tetëqind e gjashtë (806) raste, me gjithsej njëzet e dy (22) raste të vdekjes, të cilët kanë pasur sëmundje të tjera shoqëruese.

Në IKSHPK në vazhdimësi përgjatë 24 orëve janë duke u kontaktuar dhe mbikëqyrur të gjitha kontaktet e rasteve, si dhe kontaktet e kontakteve, duke i obliguar për vetizolim dhe të kërkojnë ndihmë mjekësore nëse kanë simptoma.

Në nivel global, nga data 31 dhjetor 2019 deri më 30 prill 2020, sipas Worldometers, janë raportuar gjithsej 3.287.347 raste të COVID-19. /Albinfo.ch

 

 

---