Danimarka ashpërson politikat e azilit, synon uljen e aplikimeve

(KEYSTONE/Gaetan Bally)

Danimarka po ndjek prej vitesh një nga politikat më të rrepta të azilit në Evropë, me synimin për të ulur ndjeshëm numrin e aplikimeve dhe për të nxitur kthimet. Në vitin 2025, vendi regjistroi vetëm 1,959 kërkesa për azil.

Gjatë 25 viteve të fundit, qeveritë daneze kanë miratuar rreth 100 masa për shtrëngimin e politikave të migracionit dhe azilit. Ndër masat kryesore janë rishikimi i statusit të refugjatëve pas një ose dy vitesh, kufizimi i përfitimeve sociale dhe kushtet më të rrepta për bashkimin familjar.

Modeli danez po diskutohet edhe në Zvicër, ku disa deputetë kanë kërkuar që pjesë të kësaj politike të zbatohen edhe në sistemin zviceran të azilit.

Megjithatë, ekspertët theksojnë se efektiviteti i politikës daneze mbetet i debatueshëm. Sipas profesorit Thomas Gammeltoft-Hansen, masat kanë ndikuar në uljen e aplikimeve për azil dhe të rasteve të bashkimit familjar, por nuk ka prova të qarta se ato kanë penguar njerëzit të vijnë në Evropë apo kanë rritur ndjeshëm kthimet vullnetare.

Një tjetër problem është mungesa e marrëveshjeve të ripranimit me disa prej vendeve të origjinës, gjë që e vështirëson zbatimin e dëbimeve.

Organizata për refugjatët kritikojnë gjithashtu pasojat administrative të sistemit. Sipas tyre, rishikimet e shpeshta të statusit mund të krijojnë pasiguri për refugjatët, duke ndikuar në punësim dhe integrim.

Danimarka parashikon ndërkohë edhe krijimin e qendrave të dëbimit jashtë Bashkimit Evropian, me synim që ato të funksionojnë nga fundi i vitit 2027.

Ekspertët vlerësojnë se “modeli danez” mund të ketë efekt dekurajues vetëm nëse një vend aplikon politika dukshëm më të rrepta se shtetet e tjera evropiane. Nëse masa të ngjashme zbatohen në disa vende njëkohësisht, efekti i tyre mund të jetë më i kufizuar