Kandidatët shqiptarë humbin por “nuk koriten”

SVP-UDC, partia që kishte 51 nga 130 vendeve në parlament, do të ketë sipas të gjitha gjasave së paku 10 vende më pak

Zgjedhjet për Parlamentin kantonal që u mbajtën sot në Thurgau ridëshmuan trendin e rënies së fuqisë së SVP-UDC-së, të konstatuar edhe në disa zgjedhje të tjera nivelesh të ndryshme të kohëve të fundit.

Ndërkaq, nga katër kandidatët shqiptarë që morën pjesë në gara nuk ka fituar asnjëri. Tre prej tyre: Alban Imeri, Besim Kauz dhe Agim Imeri kanë kandiduar për BDP-PBD ndërsa Arian Bilali për SP-Juso.

Më së shumti vota prej tyre ka fituar Alban Imeri, 851, pas tij vjen Besim Kauz me 791 vota ndërsa Arian Bilali ka fituar vetëm 158 vota.

Përkundër faktit se asnjëri nuk ka numrin e nevojshëm për të fituar vendin e deputetit kantonal, ata janë të kënaqur që kanë mundur të fitojnë një numër të konsiderueshëm votash, thotë me këtë rast për albinfo.ch Besim Kauz, njëri ndër kandidatët. Këtë thënie ai e mbështet në faktin se ka pasur shumë kandidatë zviceranë dhe me përvojë politike që kanë marrë më pak vota se kandidatët shqiptarë, të cilët po e matnin peshën e tyre politike për herë të parë.

Rezultatet e arritura nga pothuaj të gjitha komunat e Thurgaut dëshmojnë për një ndryshim të forcës së partive në Parlamentin e këtij kantoni, edhe pse nuk ka ndryshim në radhitjen sipas forcave.

SVP-UDC, partia që kishte 51 nga 130 vendeve në parlament, do të ketë sipas të gjitha gjasave së paku 10 vende më pak. Nga ana tjetër BDP-PBD e cila merr pjesë për herë të parë në zgjedhjet kantonale, ka fituar së paku 5 vende deputetësh. Po kështu ndër fituesit e mëdhenj llogariten e edhe të gjelbrit liberalë, që kanë fituar 4  vende më shumë se në zgjedhjet e kaluara. Partia e vogël konsertvative EDU ka dyfishuar fprcën e saj nga 3 në 6 deputetë.

FDP-PLR ka mbajtur stabil numrin e mandateve, 18 sish sa i kishte ehde më parë, ndërsa CVP-PDC ka humbur një mandat.