Fluturim i suksesshëm i aeroplanit diellor zviceran

“Solar Impulse” ka aterruar mbrëmë në aeroportin ndërkombëtar „John Kennedy” të Nju- Jorkut tri orë para kohës për shkak të një dëmtimi të krahut të majtë

Aeroplani zviceran i quajtur “Solar Impulse” që është i pari që fluturon pa karburante të zakonshme, ngase energjinë e absorbon nga bateritë që mbushen nga rrezet e diellit, ka përfunduar me sukses fluturimin historik mbi Shtetet e Bashkuara të Amerikës. 

“Solar Impulse”, i cili është quajtur edhe ambasadori i së ardhmes, ka aterruar mbrëmë në aeroportin ndërkombëtar „John Kennedy” të Nju- Jorkut tri orë para kohës për shkak të një dëmtimi të krahut të majtë.

Udhëtimi nëpër kontinente filloi më 3 maj, pranë San Franciskos, Kaliforni. 

Avioni diellor aterroi në Phoenix (Arizona), Dallas (Texas), St Louis (Missouri), Sinsinati (Ohio) dhe në  Washington.

Ky fluturim është i fundit në një seri të fluturimeve revolucionare të largëta mbi pjesë të ndryshme të botës, duke përfshirë Evropën dhe Afrikën.

Me këtë fluturim eksperimental është konfirmuar se aeroplanët mund të fluturojnë pa karburante në lartësi maksimale prej 6.400 metrash.