EKIPI NEGOCIATOR I KOSOVËS SHPALLET ANTIKUSHTETUES

Gjykata Kushtetuese ka vendosur se Ligji për Dialogun dhe Ekipi negociator, në krye me Fatmir Limajn dhe Shpend Ahmetin, janë antikushtetues.

Sipas vendimit të Kushtetueses, delegacioni shtetëror, i cili është themeluar me Ligjin e kontestuar, nuk është i paraparë me Kushtetutë dhe nuk është i paraparë brenda formës së qeverisjes dhe ndarjes së pushtetit.

Si i tillë, ai nuk mund të përfshihet në ndërveprimin e ndarjes, kontrollit dhe balancimit të pushteteve, gjegjësisht strukturën e ndarjes së pushtetit, sikurse është e përcaktuar me nenin 4 të Kushtetutës, transmeton albinfo.ch.

Gjithashtu, Gjykata ka konstatuar se bartja e kompetencave të institucioneve kushtetuese te “mekanizmi i posaçëm” i krijuar me ligjin e kontestuar, është ndërhyrje në ushtrimin e kompetencave të institucioneve të përcaktuara me Kushtetutë.

Gjykata ka konstatuar se me normat kushtetuese, shprehimisht, është paraparë obligimi përkitazi me ushtrimin e kompetencave kushtetuese në sferën e politikës së jashtme për institucionet kompetente dhe se kompetenca për të dialoguar me një shtet të tretë, nuk mund të bartet te delegacioni shtetëror si “mekanizëm i posaçëm” përmes një akti më të ulët juridik, siç është ligji i kontestuar.

Ligji për dialogun ishte dërguar në Kushtetuese nga Albulena Haxhiu, Driton Selmanaj dhe tridhjetë deputetë të tjerë të Kuvendit.