Dy raporte kërkojnë reformë të thellë në Policinë e Lozanës për shkak të diskriminimit

(KEYSTONE/Christian Beutler)

Dy raporte të publikuara nga Qyteti i Lozanës konfirmojnë nevojën për një reformë të thellë të Policisë Bashkiake, pas zbulimit të praktikave dhe qëndrimeve diskriminuese brenda trupës. Dokumentet evidentojnë prani të racizmit, seksizmit dhe mangësi serioze në mënyrën se si identifikohen dhe trajtohen këto probleme.
Sipas kryetarit të bashkisë, Grégoire Junod, organizimi aktual i policisë nuk mundëson zbulimin efektiv të diskriminimit. Reforma pritet të jetë afatgjatë dhe të zgjasë katër deri në pesë vjet.

Kriza u thellua pas zbulimit të dy grupeve në WhatsApp, ku ish- dhe punonjës aktualë të policisë shpërndanin mesazhe raciste, seksiste dhe antisemite. Tetë policë u pezulluan, ndërsa prokuroria e Vaud-it vazhdon hetimet për shkelje të mundshme penale.

Në kuadër të hetimit, komuna mblodhi 25 dëshmi anonime nga policë aktivë dhe ish-policë, të cilat tregojnë normalizim të diskriminimit, sjellje seksiste të përsëritura, mungesë transparence në promovime dhe vështirësi në raportimin e shkeljeve.

Raporti i dytë, i përgatitur nga eksperti André Duvillard, thekson nevojën për modernizimin e policisë dhe forcimin e kulturës institucionale, menaxhimit dhe etikës profesionale. Ai propozon rishikimin e misioneve, ndryshimin e sjelljeve dhe përmirësimin e klimës së punës.
Autoritetet komunale kanë njoftuar krijimin e grupeve të brendshme të punës dhe emërimin e një delegateje për sigurinë urbane dhe klimën e punës, në mbështetje të reformës së ardhshme.