Qytetarët e kantonit të Aargaut në Zvicër do të votojnë më 29 nëntor për uljen e tatimeve mbi të ardhurat. Reforma pritet t’u sjellë lehtësime rreth 68 për qind të tatimpaguesve, por ka nxitur debat për shkak të përfitimeve më të mëdha për personat me të ardhura të larta dhe humbjeve të mundshme për buxhetin publik.
Sipas propozimit, ulja e tatimeve do të përfshijë edhe personat me të ardhura të ulëta dhe të mesme, ndërsa përfitimet më të mëdha pritet t’i kenë tatimpaguesit me të ardhura më të larta.
Reforma parashikon rreth 78 milionë franga zvicerane më pak të hyra në vit, prej të cilave 41 milionë për kantonin dhe 37 milionë për komunat.
Mbështetësit e reformës, përfshirë partitë SVP, FDP, Die Mitte dhe GLP, argumentojnë se ulja e tatimeve do ta bëjë Aargau-n më konkurrues dhe do të ndihmojë në mbajtjen e profesionistëve të kualifikuar në kanton. Qeveria kantonale thekson se ekzistojnë rezerva të mjaftueshme financiare për ta përballuar reformën.
Ndërkaq, partitë SP, të Gjelbrit dhe EVP kundërshtojnë propozimin, duke paralajmëruar se përfitimet më të mëdha do t’u shkojnë qytetarëve me të ardhura të larta, ndërsa komunat mund të përballen me vështirësi në financimin e shkollave, shërbimeve të përkujdesjes dhe infrastrukturës.
Sipas të dhënave të publikuara nga SRF, rreth 68 për qind e tatimpaguesve do të përfitojnë nga ndryshimet, 30 për qind nuk do të preken ndjeshëm, ndërsa 2 për qind mund të paguajnë deri në 140 franga më shumë në vit.
Vendimi përfundimtar u takon qytetarëve të Aargaut, të cilët më 29 nëntor do të përcaktojnë nëse reforma e re tatimore do të hyjë në fuqi.
