Presidentja Osmani: Gratë në diplomaci sjellin paqe më të shpejtë dhe më të qëndrueshme

Osmani: Përfshirja e grave në proceset e paqes sjell marrëveshje më të qëndrueshme

Presidentja e Kosovës, Vjosa Osmani Sadriu, në një intervistë për “India Today Global” ka folur për rëndësinë e rolit të grave në udhëheqje, diplomaci dhe proceset e paqes. Ajo theksoi se përfshirja e grave në negociatat ndërkombëtare ndihmon në arritjen e marrëveshjeve më të shpejta dhe më afatgjata, duke sjellë qasje më bashkëpunuese dhe perspektiva të reja në zgjidhjen e konflikteve, përcjell albinfo.ch.

Gjatë intervistës, Osmani foli edhe për rrugëtimin e Kosovës nga lufta drejt pavarësisë dhe për rëndësinë e nismës “Board of Peace”, e cila synon fuqizimin e rolit të grave në proceset globale të vendimmarrjes. Ajo ndau gjithashtu përvojat personale dhe sfidat me të cilat përballen gratë në politikën ndërkombëtare, duke theksuar se rritja e përfaqësimit të tyre është thelbësore për demokraci funksionale dhe institucione më të forta.

Presidentja u ndal edhe te çështjet e diplomacisë ndërkombëtare, si marrëveshja tregtare Indi–Bashkimi Evropian dhe rëndësia e një rendi global të bazuar në rregulla. Ajo theksoi se mbështetja e ndërsjellë mes grave në udhëheqje është jetike për ndërtimin e paqes dhe stabilitetit afatgjatë.

---