Edhe një rrjet studentor për shqiptarët e Suedisë

Në malmë të Suedisë është themeluar Rrjeti i të rinjve dhe studentëve shqiptarë që jetojnë në Suedi. Ky është rrjeti i 5-të që bashkon studentët e diasporës

Sikurse studentët shqiptarë në Austri, Kroaci, Slloveni… edhe studentët dhe të rinjtë shqiptarë që jetojnë Suedi tash e tutje do të kenë rrjetin e tyre studentor. Ky asociacion u themelua me iniciativën e Ministrisë së Diasporës, pas një takimi që u zhvillua në Malmë me Unionit të Shoqatave Shqiptare në Suedi.

Sipas një njoftimi, që transmetoi KP, formimi i këtij rrjet u vendos në një takim me një grup studentësh dhe të rinjsh të sapodiplomuar në fakultete të ndryshme në Suedi. Selia e këtij rrjeti do të jetë në qytetin e Malmës, por degëzimet e tij do të shtrihen edhe në qytetet tjera universitare të Suedisë.

Takimi u mbajt në Malmë, ku ishin të pranishëm edhe përfaqësuesit e Ministrisë kosovare të Diasporës.

“Deri tash janë themeluar 5 lidhje të këtilla në shtetet e Evropës dhe deri në fund të këtij viti planifikojmë që të themelojmë edhe tri lidhje të tilla. Përmes këtyre organizimeve, zëri i të rinjve të diasporës do të dëgjohet më mirë dhe do të jetë më i fortë”, citohet të ketë thënë Lorik Pustina nga Zyra për Informim e MeD.

Ndërkaq, Elis Badalli që udhëheq divizionin për kulturë dhe sport në kuadër të Ministrisë së Diasporës, tha se kjo ministri ka projekte dhe fonde, përmes së cilave konkretisht do të përkrahen veprimtaritë e të rinjve shqiptarë kudo që ata janë në diasporë.

Ndërsa Ramadan Mramori ka informuar pjesëmarrësit lidhur me rrjedhat dhe rëndësinë që ka regjistrimi i bashkëkombëseve tanë që jetojnë dhe veprojnë në diasporë. Rrjeti i studentëve dhe të rinjve shqiptarë në Suedi, në këtë takim, zgjodhën edhe kryesinë prej shtatë anëtarësh.

Kryesia ka këtë përbërje: Arjeta Binaku dhe Renata Qato, do të jenë koordinatore, kurse anëtarë të kryesisë u zgjodhën edhe Argjend Veliu, Pajtim Sylejmani, Agon Reshitaj, Besa Ademi dhe Gazmir Vukaj. Përveç zyrës që u është ofruar këtij rrjeti studentësh, atyre do t’u ofrohet edhe ndihmë në hartimin e projekteve nga MeD.