Detaje tjera nga vrasja e katërfishtë, familja nesër do të kthehej në Zvicër

Familja jetonte në Zvicër ndërsa ndodhej në Kosovë për pushime

Prokuroria Themelore në Gjilan, Departamenti për Krime të Rënda, ka njoftuar se rreth orës 18:00, në fshatin Pozhoran, komuna e Vitisë, dyshohet të ketë ndodhur një vrasje e katërfishtë, motivet e së cilës për momentin ende nuk dihen.

Sipas informatave fillestare, dyshohet se personi me inicialet F.Z., me armë zjarri ka privuar nga jeta bashkëshorten e tij, të ndjerën M.Z. dhe dy fëmijët e tij, të ndjerët H.Z. dhe A.Z., ndërsa në fund ka kryer vetëvrasje.

Në vendin e ngjarjes menjëherë kanë dalë policia, prokurori i rastit dhe ekipa mjekësore, të cilët edhe kanë konstatuar vdekjen e tyre, ndërsa me urdhër të prokurorit trupat e të njëjtëve do të dërgohen për obduksion, në Institutin e Mjekësisë Ligjore, në Prishtinë, shkruajnë mediat kosovare, përcjell albinfo.ch.

Familja jetonte në Zvicër ndërsa ndodhej në Kosovë për pushime.

Nga informacionet e mediave vendore mësohet, që të katër këta persona kanë ardhur nga Zvicra për t’i kaluar pushimet në vendlindje dhe që nesër kanë pasur ditën e fundit të tyre për ta kaluar në Kosovë.

Lajmin e ka konfirmuar zëdhënësi i Policisë së Kosovës për rajonin e Gjilanit, Ismet Hashani.

“Fatkeqësisht është e vërtetë. Kemi katër viktima të një familjes. Për momentin nuk i dimë detajet se si ka ardhur deri te kjo vrasje. Unë jam në vendngjarje por nuk po mundem ende me vërejtur. Është këtu edhe ekipi i Mjekësisë Ligjore. Rasti ka ndodhur në ora 18:10. Fatkeqësisht është vrasje familjare”, ka deklaruar Hashani.

---