Sot, presidentja e Republikës së Kosovës, Vjosa Osmani, gjatë vizitës së saj zyrtare në Finlandë, ka mbajtur një konferencë të përbashkët për media me presidentin finlandez, Alexander Stubb, ku shprehu mirënjohje të thellë për përkrahjen historike dhe të vazhdueshme të këtij vendi ndaj Kosovës, përcjell albinfo.ch.

“Jam posaçërisht e nderuar që të jem në Finlandë, vendlindjen e të ndjerit Ahtisaari që është figurë madhore e paqes, lidershipi i të cilit e ka ndihmuar shtrimin e rrugës për liri e pavarësi të Kosovës. Trashëgimia e tij mbetet gjithsesi e ndërthur në vet indin e Republikës sonë të sotme”, u shpreh presidentja Osmani në fillim të fjalës së saj.

Duke nënvizuar lidhjen e fortë mes dy vendeve, presidentja theksoi se populli i Kosovës do ta ruajë gjithmonë në zemër mirënjohjen për atë që Ahtisaari dhe Finlanda kanë bërë për Kosovën. Ajo veçoi miqësinë si një lidhje që nuk i takon vetëm së kaluarës, por është e gjallë, në rritje dhe e përqendruar në të ardhmen.

“Jemi krenar që t’ju quajmë një prej partnerëve tanë më të afërt dhe gjithsesi përkrahja finlandeze ka qenë afatgjatë edhe përmes kontributit në misionin e KFOR-it. Mbi 7 mijë ushtarë finlandezë, burra e gra kanë ruajtur paqen dhe stabilitetin në rajonin tonë”, shtoi ajo, duke theksuar se do ta ketë nderin t’ia ndajë Medaljen Presidenciale Ushtarake Forcave të Armatosura të Finlandës, si një vlerësim të lartë për të gjithë përkrahjen në misionin e KFOR-it.

Presidentja Osmani bëri të ditur se me homologun e saj finlandez patën një diskutim të frytshëm mbi ndërtimin e marrëdhënieve edhe më të afërta mes popujve dhe shteteve tona. Ajo e lidhi këtë me historitë e ngjashme të të dy vendeve përballë shtypjes dhe luftës për liri.

“Si dy vende që kemi pasur vështirësi historike kundër shtypjes e dimë shumë mirë çmimin e lirisë dhe mu për këtë Kosova dhe Finlanda kanë qëndruar të palëkundura me Ukrainën që nga dita e parë e pushimit rus. Pra, vendet tona duhet të vazhdojnë të ngritin zërin kundër ambicieve territoriale të Rusisë dhe mendësisë imperialiste të saj, duke stabilizuar kështu edhe arritjet tona institucionale”, tha Osmani.

Në vijim, e para e shtetit u ndal te proceset integruese euroatlantike të Kosovës, duke theksuar përkushtimin ndaj vlerave demokratike dhe respektimit të ligjit.

“Kosova sot ka nivelin më të lartë të demokracisë, sundimit të ligjit dhe është midis ekonomive me arritjen më të shpejtë në rajonin tonë”, tha ajo, duke rikujtuar se përkundër përputhshmërisë me politikën e jashtme dhe të sigurisë të BE-së, anëtarësimi në Këshillin e Evropës ende është në shqyrtim.

“Nuk duam ndere, nuk duam shkurtesa, thjesht duam procese meritore, integrim dhe përputhshmëri me vlerat evropiane, për të cilën gjë kemi pasur përkrahje nga Finlanda nga dita e parë,” theksoi Osmani, duke përgëzuar gjithashtu Finlandën për anëtarësimin historik në NATO, që sipas saj e ka bërë Evropën më të sigurt.

Në kuadër të thellimit të bashkëpunimit të sigurisë, presidentja Osmani bëri me dije se sot i ka propozuar homologut të saj finlandez një marrëveshje më gjithëpërfshirëse ushtarake dhe të mbrojtjes mes dy vendeve. “Do të ishte hap i natyrshëm, kur demokracitë tona duhet të qëndrojnë krah për krah dhe do ta pasqyronte bashkëpunimin bilateral”, shtoi ajo.

Duke folur për raportet me Serbinë, presidentja Osmani theksoi se Kosova ka zgjedhur dialogun si mjetin e vetëm për të zgjidhur çështjet e mbetura, duke potencuar rëndësinë e respektimit të marrëveshjeve ndërkombëtare dhe sundimit të ligjit.

“Fqinji ynë nuk beson në këto parime, por i kemi zgjatur dorën tonë të bashkëpunimit, pasi duam të sigurohemi që fëmijët tanë, gjenerata e parë që ka njohur vetëm paqe e jo luftë, të mos kalojë më asnjëherë ato që i kemi kaluar ne”, nënvizoi Osmani.

Në përmbyllje të adresimit të saj presidentja Osmani falënderoi Finlandën për mikpritjen dhe për përfshirjen e suksesshme të diasporës së Kosovës, duke rikonfirmuar përkushtimin e Republikës së Kosovës si një shtet i pavarur, krenar për identitetin, historinë dhe potencialin e vet – rininë brilante për të ofruar mundësi të reja bashkëpunimi.

Së fundmi, Policia e Kosovës, me kërkesë të kryetarit të Komunës së Leposaviqit, ka ndërmarrë të mërkurën aksion për lirimin e hapësirave publike të uzurpuara në këtë komunë, përcjell albinfo.ch.

Referuar njoftimit të Policisë, këto hapësira ishin në pronësi të Komunës së Leposaviqit dhe ishin zënë në mënyrë të jashtëligjshme nga institucione paralele të Serbisë, të cilat vepronin në kundërshtim me rendin juridik të Republikës së Kosovës.

Thuhet se janë mbyllur disa zyra të institucioneve paralele, përfshirë të ashtuquajturat “Zyra për Punësim”, “Zyra e Pensioneve” dhe “Ndërmarrja hoteliere Kopaonik”, ku operonin disa njësi të tjera brenda këtyre objekteve.

Autoritetet thanë se ky veprim përfaqëson një hap të rëndësishëm drejt sundimit të ligjit dhe integrimit të plotë institucional në gjithë territorin e vendit.

“Policia e Kosovës, në bashkëpunim dhe koordinim me autoritetet përkatëse, do të ndërmarrë të gjitha veprimet e nevojshme sipas legjislacionit në fuqi”, thuhet në njoftim.

Më herët gjatë ditës së sotme, autoritetet kanë ndërmarrë veprime për mbylljen e një kompanie paralele të Serbisë që vepronte në komunën e Shtërpcës.

Të kesh gradën “nëntogerë” në ushtrinë suedeze është përgjegjësi e lartë. Duhet etikë pune dhe angazhim individual për t’ia dalë mbanë. Këto janë disa nga cilësitë kryesore të Shkipës që i shërbyen për të qenë sot një veterane e respektuar në shtetin suedez.

Ajo, mes shumë mundësive, kishte zgjedhur të ushtrojë profesionin si ushtare—profesion i bukur, por i vështirë. Megjithatë, nga vullneti dhe motivi që ajo zotëron, ishte një bekim që i ishte dhënë.

Jeta në Suedi me një shoqëri dhe kulturë tjetër

Shkipja ka një biografi interesante. Është me origjinë nga Kaçaniku; babai i saj kishte jetuar në Shkup për disa vite, pastaj në Stamboll, për t’u vendosur përfundimisht në Suedi në vitin 1968.

Edhe pse ka lindur në Stokholm, Shkipja ka ruajtur gjuhën shqipe, traditat dhe kulturën shqiptare. Në moshën 12-vjeçare, ajo dhe familja u vendosën në Malmö, ku kishte edhe më shumë shqiptarë. Pikërisht në Malmö, Shkipja kreu mësimet e para, më pas edhe shkollën e mesme.

Sa i përket jetës dhe shoqërisë suedeze, ajo thotë se ambientimi nuk ishte aspak i lehtë dhe nuk ndjehej e barabartë, edhe pse fliste e shkruante rrjedhshëm suedishten:

“Pavarësisht se dija suedishten rrjedhshëm, unë dhe fëmijët e tjerë shqiptarë përjetuam padrejtësi dhe dallime, nisur nga emri im, i pazakontë në Suedi. Kam qenë e detyruar të luftoj më shumë, në përditshmërinë time dhe në shkollë, duke balancuar kulturën shqiptare që më mësonin prindërit dhe atë suedeze,” tregon ajo për revistën Albinfo.ch.

Shkipja u frymëzua që e vogël nga babai i saj, se me kulturë dhe shkollim arrihet gjithçka. Sakrificat e babait ia shpërbleu me sukses akademik dhe arritje profesionale.

Shkollimi dhe jeta profesionale

Pas shkollës së mesme, Shkipja ndoqi studimet në Shenandoah University në Washington, D.C., ku kreu dy drejtime paralele: “International Journalism” dhe “International Relations, Diplomacy”.

“Pas studimeve në Amerikë, vazhdova në Universitetin e Stokholmit, Departamenti i Drejtësisë, pasi synimi im ishte të bëhesha avokate e popullit, nisur nga padrejtësitë që kam përjetuar,” shpjegon ajo.

Rrugëtimi si ushtare në Suedi

Gjatë studimeve dhe përmes kurseve, loboi për Kosovën në organizata e takime me politikanë e gjeneralë suedezë. Kjo i shtoi dëshirën për t’u bërë ushtare.

“Kursi mbi historinë nordike dhe Bashkimin Evropian më bëri të interesohesha për Suedinë në BE; më pas u inkuadrova në çështjet e Ballkanit, duke parë rrezikun nga regjimi jugosllav. Organizova një “Riksdag” për të rinj, me Kofi Annan në hapje, që më frymëzoi.”

Punë me OKB-në dhe NATO-n

Pasi loboi në OKB-në në Gjenevë dhe në selitë e BE-së e NATO-s, u njoh me gjeneralin suedez Carl Bildt, negociator i Daytonit. Ai e pyeti pse nuk bashkohej në ushtri:

“Kjo frazë më vlerësoi dhe më motivoi. Aplikoja si pilote ushtarake, por mosha (24 vjeç) më pengoi. U zgjodha ushtare; pas testimeve zyrtare, në kohën e luftës në Kosovë, mora ftesën për misionin KFOR (1999–2001).”

“Që nga Kosova e shkrumbtë e luftës, te Parlamenti i parë në Prishtinë, unë isha aty! Ndihem me fat dhe krenare. Kur sot shoh ngritjen e Ushtrisë së Kosovës, ndihem pjesë e krijimit.”

Për fund, Shkipja thotë:
“Edhe pse kam lindur në Stokholm dhe jam ushtare e Mbretit Suedez, zemra më mbetet shqiptare—bijë e Kaçanikut dhe e Stokholmit njëkohësisht.”

Kryetari i PDK-së, Memli Krasniqi, pas ndërprerjes së punimeve të seancës konstituive, është shprehur se: “Është për keqardhje dhe ne po rrëshqasim në një fazë që asnjëherë nuk e ka pasur Kosova. Kanë kaluar 47 ditë që kur janë certifikuar zgjedhjet, dhe ne ende nuk kemi institucione të themeluara, sepse LVV të cilës i takon ta propozojë kryetarin e Kuvendit, ka vendosur ta mbajë peng shtetin për shkak të tekeve të tyre për një emër të përveçëm”.

“Nëse LVV i ka votat, atëherë mund ta zgjedhin kënd të dëshirojnë, por nuk mund ta imponojnë emrin siç po kërkojnë. Mentaliteti për marrjen e votës me zor”.

Nga ana tjetër, Kryetari i Lidhjes Demokratike të Kosovës (LDK), Lumir Abdixhiku, ka thënë se partia e tij nuk do ta mbështesë kandidaten e Lëvizjes Vetëvendosje për kryetare të Kuvendit.

“Jemi të qartë, bindjet tona janë se partia e parë duhet ta ofrojë një kandidat që përfaqëson Kuvendin, jo një kandidat që lexon skriptet e partisë. Ne jemi në opozitë dhe synojmë të jemi në opozitë”, tha Abdixhiku.

Ndërkohë, kryetari i Aleancës për Ardhmërinë e Kosovës (AAK), Ramush Haradinaj, ka kritikuar qasjen e Lëvizjes Vetëvendosje ndaj procesit të zgjedhjes së kryeparlamentarit, duke e cilësuar atë si jo serioze dhe të vonuar.

Haradinaj u shpreh se AAK-ja ka ofruar qëndrimin e saj për të ndihmuar në gjetjen e një zgjidhjeje, duke propozuar edhe dy emra si opsion për një kandidat unifikues, si Saranda Bogujevcin apo Shqipe Selimin.

“Shpresoj ta votojnë kryeparlamentarin. Kemi dhënë opsionin tonë, por nuk kemi informata të tjera. Kemi thënë se nëse ka kandidat unifikues, do ja japim votën”, deklaroi ai para nisjes së seancës së sotme.

Ai theksoi se posti i kryeparlamentarit nuk duhet të trajtohet si çështje politike dhe nuk do të duhej të ishte pengesë për konstituimin e Kuvendit. /Albinfo.ch

Mësohet se, për të tretën herë radhazi, Lëvizja Vetëvendosje ka hedhur në propozim emrin e deputetes Albulena Haxhiu për kryetare të Kuvendit, përcjell albinfo.ch.

Edhe sot, për të tretën herë radhazi, ka dështuar votimi i Haxhiut për të drejtuar Kuvendin e Kosovës.

Njësoj si herët e kaluara, Haxhiu mori vetëm 57 vota “për”.

Ani pse Glauk Konjufca nga Vetëvendosje luti deputetët të mbështesin Haxhiun, deputetja dështoi sërish të mbledhë numrin e nevojshëm të votave.

Rezultati i votimit ishte: 57 vota për, 46 kundër dhe 3 abstenime.

Pas dështimit të votimit, kryesuesi i seancës, Avni Dehari, njoftoi se seanca e sotme ndërpritet:

“Seanca ndërpritet; vazhdojmë të premten në orën 10:00.”

Ka dështuar edhe përpjekja e pestë për konstituimin e legjislaturës së nëntë. Albulena Haxhiu e Lëvizjes Vetëvendosje ka marrë sërish vetëm 57 vota në kandidaturën për kryeparlamentare. Seanca do të shkojë në përpjekjen e gjashtë për të konstituar Kuvendin. Ajo do të mbahet të premten. Gjithçka që ndodh rreth kësaj seance, mund ta përcillni këtu.

Albulena Haxhiu e Lëvizjes Vetëvendosje nuk ka marrë shumicën e votave as në votimin e tretë për kryeparlamentare.

Ajo ka marrë 57 vota për, 46 kundër dhe 3 abstenime.

Seanca është shtyrë për të premten, me fillim prej orës 10:00.

Lëvizja Vetëvendosje nuk ka hequr dorë nga emri i Albulena Haxhiut si propozim për postin e kryeparlamentares. Këtë e ka konfirmuar vetë Haxhiu, por edhe deputetë të tjerë të LVV-së që kanë folur para përpjekjes së pestë të Kuvendit për konstituim, përcjell albinfo.ch.

“Ne vazhdojmë ta mbajmë qëndrimin e njëjtë”, ka thënë Haxhiu para hyrjes në Kuvend të martën.

Ajo ka paralajmëruar takim konsultativ me partitë tjera, por ka përsëritur se e mbajnë qëndrimin e njëjtë.

E deputetja Saranda Bogujevci, për të cilën AAK-ja ka thënë se do ta votonte po të propozohej për kryeparlamentare, ka thënë se “nuk mundet një grup individësh nga subjekte të tjera të caktojë personin që VV-ja e ka si propozim”.

“Haxhiu është ndër gratë jo më të votuara në vendin tonë, por të njëjtën kohë ka përvojë të gjatë jo vetëm si ministre por edhe si deputete. Nëse dikush me të vërtetë e meriton dhe ka mbështetjen e gjithësecilit prej nesh në këtë rrugëtim është Albulena Haxhiu. S’mundet grup individësh nga subjektet tjera politike me determinu atë ose personin që ne e kemi si propozim. Pse duhet të propozohen emra të tjerë? A më ka pyetur mua dikush? Pse e marrin atë të drejtë të bëjnë propozime të tilla. Pse duhet të jem unë e pse jo Albulena Haxhiu”, ka thënë ajo.

Në dy herë që u votua për propozimin e VV-së që Albulena Haxhiu të jetë kryeparlamentare, ajo mori 57 vota pro. Në seancën pasuese, VV-ja kërkoi “kohë shtesë”.

E ministri në detyrë i Financave, Hekuran Murati, tha se shpreson që opozita ka reflektuar. 

“Konstituimi i Kuvendit nuk është vetëm detyrë e partisë fituese por e të gjithë deputetëve”, tha Murati.