Archives

Punonte njëkohësisht në Itali dhe Zvicër – zbulohet mashtrimi i një zyrtari komunal

Posted on by BR

Një punonjës komunal nga provinca italiane Varese është zbuluar se punonte në Zvicër gjatë orarit zyrtar të punës në Itali.

Sipas hetimeve, ai paraqitej fillimisht në zyrën komunale në Itali për të regjistruar hyrjen në punë dhe më pas udhëtonte drejt kantonit Ticino, ku kishte një punë tjetër.

Hetuesit italianë arritën të rindërtonin lëvizjet e tij duke krahasuar pamjet e kamerave të sigurisë dhe sistemet e monitorimit. Sipas autoriteteve, punonjësi përdorte një automjet komunal për të shkuar në bashki dhe për të regjistruar prezencën, më pas e parkonte automjetin në depon komunale dhe vazhdonte rrugën drejt Zvicrës me veturën private, transmeton albinfo.ch.

Edhe pse fizikisht ndodhej në Ticino, ai figuroi zyrtarisht si në detyrë në Itali gjatë gjithë kohës.

Autoritetet italiane nuk kanë bërë ende të ditur se çfarë dënimi do të përballet punonjësi, por rasti ka tërhequr vëmendje të madhe në mediat italiane dhe zvicerane për shkak të mënyrës së organizuar të mashtrimit.

Largimet nga vendi, ku renditen Kosova e Shqipëria

Posted on by BR

Flukset e emigracionit po shndërrohen në pengesë kryesore për rritjen ekonomike afatgjatë në gjashtë vendet e Ballkanit Perëndimor (WB6).

Banka Botërore, në raportin e rregullt ekonomik rajonal, që u publikua këto ditë, vuri në dukje se edhe në dy vitet e fundit  2024-2025, rajoni vazhdon të vuajë nga hemorragjia e vazhdueshme e forcës punëtore, duke krijuar vështirësi të mëdha në tregut të punës.

Të dhënat tregojnë së Shqipëria mbetet në qendër të kësaj problematike, duke regjistruar shifrat më të larta të emigracionit neto (largimet minus kthimet), Ndërsa Serbia njeh shifrat më të ulëta në krahasim me popullsinë e saj.

Shqipëria më e prekura e Rajonit për emigrimin

Shqipëria kryeson listën me nivelin më të lartë të emigracionit neto, duke mbajtur një shifër konstante prej -24.2 mijë në të dy vitet 2024-2025.

Vendi po përballet një hemorragji demografike të vazhdueshme që nuk po reflekton përmirësim, përkundrazi është përshpejtuar pas pandemisë.

Arsyet kryesore lidhen me kërkesën për paga më të larta dhe kushte më të mira jetese në vendet e Bashkimit Evropian, veçanërisht nga shtresa e të rinjve dhe profesionistëve.

Të dhënat e Bankës Botërore sugjerojnë se politikat e brendshme për frenimin e këtij fenomeni nuk po japin rezultatet e pritura. Ky trend i lartë mbetet një sfidë kritike për tregun e punës dhe qëndrueshmërinë e skemave shoqërore në vend.

Kosova, rënie pas fluksit të lartë të heqjes së vinave

Banka Botërore shikon për Kosovën përmirësim të dukshëm vitin e kaluar. Shifra e emigracionit neto ulet nga -22,000 persona në 2024 në -18, 500 në 2025, duke treguar një tendencë drejt stabilizimit.

Ky ndryshim me tendence ulje reflekton stabilizim pas valës së parë të liberalizimit të vizave që shpesh sjell një kulm e pastaj rënie. Megjithatë, shifrat mbeten sërish ndër më të lartat në rajon, çka tregon se presioni për emigrim mbetet i lartë për shkak të papunësisë te të rinjtë.

Arsyet e largimit mbeten kryesisht ekonomike, por rënia e ritmit tregon se ka ngadalësim të dëshirës për t’u larguar përgjithmonë. Rënia e largimeve me 2025 është shenjë inkurajuese për stabilitetin demografik të shtetit më të ri të rajonit.

Serbia largimet rriten, por më të ulëtat në Rajon

Serbia shfaq një përkeqësim të ndjeshëm të situatës, ku emigracioni neto rritet nga -8,200 në vitin 2024 në -13,100 në vitin 2025, referoi Banka Botërore. Por në raport me popullsinë prej rreth 6.8 milionë banorësh, Serbia ka shifra më të ulëta të emigracionit neto.

Kjo rritje i atribuohet kryesisht pasigurisë dhe një pakënaqësi në rritje brenda vendit ndaj qeverisjes, pavarësisht investimeve të huaja me vlerë të lartë që hyjnë në territorin serb. Emigracioni në Serbi lidhet kryesisht me kërkesën për liri më të mëdha politike. Rritja e kësaj shifre e vendos Serbinë në një pozicion më delikat sesa parashikimet fillestare për stabilitet demografik në rajon.

Bosnja, emigracion të qëndrueshëm

Bosnja dhe Hercegovina gjithashtu regjistron një rritje të emigracionit neto, duke kaluar nga -4,600 në vitin 2024 në -7,100 në vitin 2025. Ky trend negativ ushqehet kryesisht nga ngërçi i gjatë politik dhe mungesa e perspektivës së qartë për integrim të shpejtë në strukturat euro-atlantike.

Qytetarët po largohen drejt vendeve si Gjermania apo Austria për të gjetur jo vetëm punë, por edhe një ambient më të qëndrueshëm social dhe ligjor. Rritja e trendit tregon se faktorët shtytës po forcohen, ndërkohë që reformat e brendshme nuk po ecin me ritmin e duhur.

Maqedonia e Veriut stabilizon ikjet

Maqedonia e Veriut është i vetmi vend në listë, krahas Kosovës, që tregon një përmirësim të lehtë, duke u zhvendosur nga -5,900 largime në 2024 në -5,700 në 2025. Edhe pse ndryshimi është i vogël, ai reflekton një lloj qëndrueshmërie në krahasim me fqinjët që po përjetojnë rritje të shpejtë të emigrimit.

Arsyet e këtij stabiliteti mund të lidhen me përpjekjet për reforma strukturore dhe një treg pune që po tenton të thithë forcën e lirë punëtore. Megjithatë, trendi negative tregon se problemet bazë si korrupsioni dhe pagat e ulëta vazhdojnë të nxisin largimin e qytetarëve, por vendi ka arritur të kontrollojë disi flukset e mëdha të papritura të largimeve.

Edhe Mali i Zi i drejtohet emigracionit

Mali i Zi ka pësuar rritjen më të madhe brenda rajonit në vitin e kaluar, nga -1,800 persona të larguar në 2024 në -9,300 në 2025. Arsyet janë komplekse dhe përfshijnë ndryshimet në koston e jetesës dhe paqëndrueshmërinë në sektorin e turizmit që është sektori kryesor I ekonomisë.

Mali i Zi ka popullsinë më të vogël në Rajon me rreth 600 mijë banorë, por njëkohësisht standardin më të lartë të jetesës. Mirëpo trendi në rritje i largimeve tregon zhgënjim të popullatës me qeverisjen brendshme.

A janë zgjedhjet zgjidhje

Posted on by BR

Zgjedhjet e 7 qershorit 2026 do të jenë të dytat e parakohshme radhazi për Kosovën, pas atyre të dhjetorit 2025, të cilat erdhën si pasojë e dështimit të legjislaturës së nëntë për të konsoliduar institucionet.

Edhe legjislatura e dhjetë nuk arriti të përmbushë një nga detyrimet themelore kushtetuese, zgjedhjen e presidentit, duke çuar në shpërndarjen e Kuvendit dhe shpalljen e zgjedhjeve nga ushtruesja e detyrës së presidentes, Albulena Haxhiu, raporton Monitor, transmeton albinfo.ch.

Kriza politike në vend dhe shkuarja në zgjedhje të reja po krijojnë pasiguri serioze për ekonominë e Kosovës, duke rrezikuar stabilitetin e bizneseve dhe zhvillimin ekonomik në përgjithësi.

Drejtori i Dhomës së Tregtisë dhe Industrisë, Kushtrim Ahmeti, theksoi se zgjedhjet e shpeshta po sjellin kosto të drejtpërdrejta për ekonominë. “Çdo proces i ri zgjedhor nënkupton muaj të tërë të humbur për vendimmarrje dhe projekte zhvillimore. Kjo po u kushton bizneseve vonesa, humbje financiare dhe pasiguri të mëdha për të ardhmen dhe investimet.

Ekonomia nuk mund të presë pafundësisht cikle politike – ajo ka nevojë për stabilitet të menjëhershëm”.

Ai thekson rolin e DHTIK-së, duke lobuar për zgjidhje konkrete, duke propozuar politika lehtësuese, si dhe duke ndërmjetësuar komunikimin ndërmjet institucioneve dhe sektorit privat.

Paralajmërime të forta ka bërë edhe Oda Ekonomike Amerikane në Kosovë. Kryetari Arian Zeka rikujtoi se krizat politike në vend kanë një histori të qartë ndikimi negativ në ekonomi.

“Historikisht, sa herë kemi pasur ngërçe politike… kjo gjithmonë ka reflektuar në normën e rritjes ekonomike edhe gjatë vitit 2026 pritshmëritë janë për një normë të ulët, kryekëput për shkak të tejzgjatjes së krizës politike”.

Ai theksoi se pa stabilitet institucional, investimet e huaja mbeten të rrezikuara.

“Investitorët e huaj kanë nevojë për institucione të qëndrueshme, kanë nevojë për mjedise stabile, kanë nevojë për përfaqësues të institucioneve të shtetit me të cilët ata mund të bisedojnë edhe mund të japin zotimet e tyre dhe, në të njëjtën kohë, të ndiejnë që investimet e tyre do të jenë të sigurta dhe nuk do të cenohen nga çfarëdo krize ose pasigurie politike, e cila po e karakterizon vendin tonë.

Uroj që zgjedhjet e ardhshme të bëhen sa më shpejt në mënyrë të rregullt, pas tyre të mos kemi vonesa të mëtejme as në konstituimin e Kuvendit të Republikës e as në themelimin e qeverisë së re dhe zgjedhjen e presidentit ose presidentes së vendit”.

Sipas tij, mungesa e institucioneve funksionale po krijon edhe një boshllëk komunikimi me investitorët potencialë.

“Është e rëndësishme që këta investitorë të kenë me kë të mund të bisedojnë”.

Rrezikohen miliona euro fonde

Në anën tjetër, Oda Ekonomike e Kosovës ka ngritur alarmin për rrezikun e humbjes së fondeve nga Bashkimi Evropian.

Kryetari Lulzim Rafuna paralajmëroi se mungesa e institucioneve mund të kushtojë me qindra miliona euro: “Shuma tjetër e mjeteve nuk mund të merret pa u bërë reforma… ekziston rreziku shumë i madh që të humbim një pjesë shumë të madhe të mjeteve”.

Kosova ka në dispozicion rreth 880 milionë euro nga Plani i Rritjes i BE-së, por deri tani ka përfituar vetëm 63 milionë euro si parafinancim. Pjesa tjetër mbetet e kushtëzuar me reforma që, në mungesë të Kuvendit funksional dhe qeverisë me mandat të plotë, nuk mund të realizohen.

Rafuna theksoi se situata aktuale e bën pothuajse të pamundur përparimin e këtyre proceseve.

Përveç krizës së brendshme, ekonomia e Kosovës po përballet edhe me presione të jashtme. Sipas Rafunës, vendi ka importuar inflacion si pasojë e rritjes së çmimeve të energjisë dhe derivateve.

“Ne jemi një vend që importojmë shumë, bashkë me importin kemi importuar edhe rritjen e çmimeve edhe inflacionin. Çmimi i derivateve është kosto operative për çdo biznes dhe kjo me automatizëm e ka shkaktuar inflacionin”.

Ndërsa ekonomisti Safet Gërxhaliu thotë se këto zgjedhje janë luks dhe komoditet që nuk mund t’i përballojnë as vendet evropiane.

Gërxhaliu përmendi edhe inflacionin dhe rritjen e çmimeve që është goditur Kosova. “Jemi duke jetuar në një kohë krize globale, jemi duke jetuar në një kohë kur inflacioni ka kapluar dhe ka goditur ekonomitë më të mëdha dhe jo vetëm Kosovën. Jemi në një kohë kur çmimet e produkteve thelbësore në Kosovë janë vërtet më të larta dhe po e dëmtojnë standardin e qytetarëve të Kosovës dhe jemi në një kohë kur Kosova ka nevojë për investime të shumta dhe projekte kapitale, nga të cilat do të përfitojnë edhe bizneset e qytetarëve”.

Ai përmendi edhe mungesën e kompromisit politik, ndërsa nuk beson që zgjedhjet do të jenë zgjidhje, për shkak të siç e tha ai, qasjen agresive të pushtetit

“Kosova do të humbë edhe në aspektin e absorbimit të mjeteve nga donatorët, në veçanti nga Bashkimi Evropian. Do të dëmtojë imazhin e saj, sepse askush nga investitorët e huaj nuk do të vijë të investojë në Kosovë, në një shtet ku nuk ka stabilitet politik dhe ku nuk ka një politikë pro-biznes.

Do të rritet importi dhe do të eksportohet paraja e gatshme dhe në këtë drejtim, në aspektin ekonomik, do të kemi pasoja të mëdha”.

Mbi 10 milionë për një palë zgjedhje

Në këtë situatë, edhe buxheti për organizimin e zgjedhjeve reflekton koston e lartë të krizës politike. Komisioni Qendror i Zgjedhjeve ka miratuar një buxhet prej 10,887,186.45 eurosh për procesin zgjedhor të 7 qershorit.

Fushata zgjedhore do të zgjasë vetëm 10 ditë e 7 orë, nga 28 maji deri më 7 qershor në orën 06:59, ndërsa votimi do të mbahet nga ora 07:00 deri në 19:00. Procesi përfshin gjithashtu votimin nga diaspora (25 maj – 6 qershor), votimin në përfaqësi diplomatike më 6 qershor, si dhe një sërë afatesh për regjistrime dhe akreditime gjatë muajit maj.

Në krahasim me vendet evropiane, ku tri cikle zgjedhore zakonisht zhvillohen brenda 7 deri në 10 viteve, Kosova po vendos një rekord të ri, tri zgjedhje brenda një viti e katër muajsh. Në këtë realitet, zgjedhjet nuk po perceptohen më si mekanizëm zgjidhjeje, por si simptomë e një krize të thellë institucionale që po zgjatet dhe po prodhon pasoja të drejtpërdrejta për ekonominë dhe zhvillimin e vendit.

Kosova do të shkojë në zgjedhje të reja më 7 qershor për shkak se politika dështoi ta zgjedhë presidentin e shtetit, deri më 28 prill, siç e kërkonte Kushtetuta. Këto janë votimet e treta nacionale që mbahen në vend, nga shkurti 2025.

I gjithë viti i kaluar u shoqërua me një ngërç politik, për shkak të pamundësisë së politikës që të gjejë një zgjidhje për ndërtimin e institucioneve.

Skandali në spitalin e Cyrihut: Ish-shefi i kirurgjisë kardiake mohon akuzat për vdekje të dyshimta

Posted on by Alb

Një raport hetimor në Spitalin Universitar të Cyrihut ka ngritur shqetësime serioze për trajtimet në departamentin e kirurgjisë së zemrës gjatë viteve 2016–2020. Sipas raportit, gjatë kësaj periudhe është vërejtur rritje e vdekshmërisë së pacientëve dhe përdorim i disa metodave kirurgjikale të diskutueshme.

Në qendër të akuzave është ish-shefi i këtij departamenti, Francesco Maisano, i cili i ka mohuar pretendimet dhe i ka cilësuar të padrejta. Ai thotë se akuzat nuk pasqyrojnë realitetin dhe se vendimet e tij mjekësore kanë qenë profesionale dhe të justifikuara, transmrton albinfo.ch.

Raporti kritikon edhe përdorimin e pajisjes eksperimentale “Cardioband”, e cila dyshohet se është lidhur me disa raste të ndërlikimeve serioze dhe vdekje të dyshimta. Maisano deklaron se kjo metodë është përdorur në një numër shumë të vogël rastesh krahasuar me mijëra operacione të tjera.

Pas publikimit të raportit, spitali ka marrë rreth 90 ankesa nga pacientë ose familjarë që dyshojnë për gabime mjekësore. Ndërkohë, prokuroria e Cyrihut po shqyrton mundësinë e hapjes së një hetimi penal për përgjegjësi të mundshme.

Francesco Maisano aktualisht punon në një spital në Milano. Hetimet në Zvicër po vazhdojnë për të sqaruar rrethanat e rastit.

Pensionistët në Rusi dhe Bjellorusi mbesin pa pensionet zvicerane për shkak të sanksioneve

Posted on by Alb

Dhjetëra përfitues të pensioneve zvicerane të pleqërisë dhe trashëgimisë (AVS), që jetojnë në Rusi dhe Bjellorusi, nuk kanë marrë pagesat e tyre prej muajsh, ndonëse kanë të drejtë ligjore për to. Problemi lidhet me interpretimin e gjerë të sanksioneve të Bashkimit Evropian ndaj këtyre dy vendeve nga ndërmjetësit financiarë dhe bankat.

Zyra Qendrore e Kompensimit në Zvicër (CdC), e cila merret me pagesën e pensioneve për shtetasit që jetojnë jashtë vendit, ka bërë të ditur se që nga fillimi i vitit nuk ka mundur të realizojë pagesat për disa dhjetëra përfitues në Rusi dhe Bjellorusi.

Sipas CdC-së, pagesat e pensioneve AVS nuk janë të ndaluara nga ligji zviceran dhe nuk i nënshtrohen sanksioneve të vendosura nga Zvicra. Megjithatë, bankat zvicerane dhe institucionet financiare po zbatojnë masa më të ashpra për shkak të rrezikut që lidhet me sanksionet ndërkombëtare, veçanërisht ato të Bashkimit Evropian dhe Shteteve të Bashkuara.

Rreth 60 persona që jetojnë në Rusi dhe Bjellorusi janë prekur drejtpërdrejt, pasi kanë vetëm llogari bankare në këto vende. Ndërkohë, rreth 100 përfitues të tjerë që posedojnë llogari bankare në Zvicër vazhdojnë t’i marrin pensionet pa probleme.

Një prej të prekurve është pensionisti 76-vjeçar Hans Rudolf Knecht, i cili jeton në Bjellorusi. Ai ka deklaruar për mediumin zviceran Infosperber se që nga 1 shkurti 2026 ka mbetur pa asnjë pagesë pensioni.

Sipas raportimit, banka Postfinance ia kishte mbyllur llogarinë që në vitin 2023, me arsyetimin se profili i tij “nuk përputhej me politikën e kompanisë”. Më pas ai kishte udhëtuar në Zvicër për të hapur një llogari tjetër bankare, por transfertat drejt Bjellorusisë rezultuan të pamundura.

Për të pasur qasje në kursimet e tij, pensionisti detyrohet të udhëtojë drejt Zvicrës, përmes autobusit via Vilnius në Lituani ose me avion përmes Stambollit në Turqi.

Edhe bashkëshortja e tij bjelloruse, e cila përfiton pension zviceran, kishte marrë pagesat deri në fillim të vitit 2026, por më pas edhe asaj iu ndërprenë transfertat. Sipas raportimit, ajo nuk mund të hapë llogari bankare në Zvicër.

Postfinance ka deklaruar për Swissinfo se pagesat drejt Rusisë dhe Bjellorusisë nuk janë të ndaluara në parim, për sa kohë nuk përfshihen persona ose institucione të sanksionuara. Megjithatë, banka thekson se varet nga bankat korrespondente ndërkombëtare, të cilat aktualisht ose nuk lejojnë më transfertat drejt këtyre vendeve, ose aplikojnë tarifa shumë të larta.

“Për momentin kemi shteruar të gjitha mundësitë për të realizuar këto pagesa”, thuhet në deklaratën e Postfinance, duke shtuar se transfertat do të rifillojnë sapo të jetë e mundur në mënyrë ligjore dhe ekonomikisht të arsyeshme.

Nga ana tjetër, Zyra Qendrore e Kompensimit thotë se po bashkëpunon me bankat dhe personat e prekur për të gjetur zgjidhje alternative. Një nga rekomandimet mbetet hapja e një llogarie bankare në Zvicër ose në një shtet që nuk i nënshtrohet sanksioneve.

Provimi i jurisprudencës në gjuhën shqipe: Nesër protestohet në Shkup

Posted on by erezzaademi

Në Shkup nesër studentët shqiptarë do të protesojnë për siç u tha, mbrojtjen e gjuhës shqipe.

Njëri nga organizatorët e protestës, Mevlan Ademi, u ka bërë thirrje sportistëve, artistëve dhe figurave publike ti bashkangjiten protesës së nesërme.

“Të nderuar sportistë, artistë dhe figura publike,ju që me sukseset, talentin dhe punën tuaj keni bërë krenar çdo shqiptar, sot studentët kanë nevojë për zërin dhe mbështetjen tuaj.Kjo protestë nuk është kundër askujt. Është protestë për mbrojtjen e gjuhës shqipe, dinjitetit dhe të drejtave tona si qytetarë të barabartë.Të hënën, më 18 Maj, në ora 16:30, duke filluar nga Ura e Gurit në Shkup, hajdeni të protestojmë bashkë.Në krah të studentëve, në krah të shqiptarëve!”, ka shkruar ai, transmeton albinfo.ch.

Ndryshe, në protestën që është mbajtur herën e kaluar, studentët kërkuan që provimi i jurisprudencës të jepet edhe në gjuhën shqipe, teksa kjo protestë e ditës së nesërme do të përfshijë dhe kërkesën për respektimin e gjuhës shqipe në të gjitha institucionet.

Trafik i ngarkuar në portalin jugor të Gotthard-it

Posted on by erezzaademi

Pas trafikut të dendur të lidhur me “urën” e gjatë të Ngjitjes, ata kthehen në rrjetin rrugor sot, të dielën, me ngadalësime dhe shqetësime për shkak të kthimeve. Ata që udhëtojnë do të duhet të kenë pak durim pas timonit.

Në A2 në portalin jugor të tunelit Gotthard ka një radhë prej 6 km duke filluar nga Quinto, me pritje pasuese prej një ore në drejtim të Lucernës. Përveç kësaj, hyrja e autostradës Airolo është e mbyllur në drejtim të tunelit.

Ka ende kolona midis Altdorf dhe tunelit Seelisberg në drejtim verior në A2, raporton RSI, transmeton albinfo.ch.

Në A13, tuneli San Bernardino është rihapur në të dy drejtimet pas një mbylljeje të përkohshme për shkak të një automjeti të prishur. Megjithatë, kolonat mbeten duke filluar nga Pian San Giacomo në drejtim verior dhe nga Hinterrhein në drejtim jugor.

Së fundmi, sa i përket trenave të transportit, ka një orë pritje në stacionin e ngarkimit Furka në Oberwald.

Presidenti amerikan kërcënon përsëri: Nëse nuk ka marrëveshje, Irani do të kalojë kohë shumë të keqe

Posted on by erezzaademi

Presidenti i Shteteve të Bashkuara të Amerikës, Donald Trump ka deklaruar se Irani ka “interes të arrijë një marrëveshje” për t’i dhënë fund konfliktit, por paralajmëroi pasoja të rënda nëse kjo nuk ndodh.

Trump tha se nuk ishte i sigurt nëse një marrëveshje mund të arrihet së shpejti.

“Nuk kam asnjë ide. Nëse nuk e bëjnë, do të kalojnë një kohë shumë të keqe”, ka deklaruar ai për transmetuesin francez BFMTV, transmeton albinfo.ch.

Ndryshe, ai kishte publikuar edhe një imazh të gjeneruar me inteligjencë artificiale në platformën Truth Social, ku paralajmëronte “qetësinë para stuhisë”.

Kievi akuzon: Komponentët zviceranë në dronët rusë

Posted on by erezzaademi

Komponentët zviceranë të mikroelektronikës gjenden rregullisht në dronët rusë të përdorur për të bombarduar Ukrainën.

“90% e dronëve rusë përmbajnë komponentë nga kompanitë zvicerane”, ka deklaruar për NZZ am Sonntag Vladislav Vlasyuk, këshilltar i Presidentit ukrainas Volodymyr Zelensky, duke shtuar se edhe pas 4 vitesh konflikti me Moskën situata nuk po ndryshon.

Ndërsa vendet e tjera kanë marrë masa për eksportet në Rusi, Zvicra, thotë ai, nuk duket se i kupton “rreziqet”, transmeton albinfo.ch.

Të dhënat e doganave ruse tregojnë se, që nga fillimi i luftës, 30,000 dërgesa me produkte thelbësore për përpjekjet e luftës janë dërguar në Rusi, përmes ndërmjetësve, nga 5 kompani zvicerane.

Nga ana e tij, Sekretariati Shtetëror i Ekonomisë (SECO) pretendon se është në dijeni të problemit dhe se është në kontakt me kompanitë në fjalë, si dhe me vendet partnere.

Zvicër: Turizmi rikuperohet pas tronditjes nga lufta në Iran

Posted on by BR

Industria e udhëtimeve në Zvicër po shënon rikuperim gradual pas rënies së rezervimeve që u shkaktua nga lufta në Iran dhe tensionet në Lindjen e Mesme.

Sipas operatorit turistik Dertour Suisse, konflikti në Iran shkaktoi një valë anulimesh dhe ndryshimesh rezervimesh gjatë marsit dhe prillit, por situata ka filluar të stabilizohet që nga maji, transmeton albinfo.ch.

Drejtoresha e kompanisë, Stephanie Schulze zur Wiesch, deklaroi se dëshira për të udhëtuar “mbetet e fortë”, ndërsa rezervimet për sezonin e vjeshtës tashmë po tejkalojnë nivelet e vitit të kaluar.

Destinacionet që janë prekur më shumë nga kriza janë vendet e Gjirit Persik dhe zonat që varen nga lidhjet përmes Dubai-t, si:

Maldive

Seychelles

dhe disa destinacione në Lindjen e Mesme.

Në të kundërt, kërkesa është rritur për destinacionet perëndimore si:

Ishujt Kanarie

Portugalia

Italia

si dhe për vendet nordike dhe Islandën.

Sipas Dertour Suisse, edhe Tunizia dhe Maroku po tërheqin më shumë turistë, ndërsa udhëtimet drejt SHBA-ve vazhdojnë të jenë më të dobëta për shkak të klimës politike dhe pasigurisë ndërkombëtare.

Ndodh edhe kjo: Pasagjeri kafshon stjuardesën, aeroplani bën ulje të detyruar

Posted on by BR

Një fluturim i kompanisë ajrore Qantas nga Melbourne i Australisë drejt Dallasit në SHBA u detyrua të devijonte itinerarin pas një incidenti të pazakontë në bord.

Sipas mediave australiane, menjëherë pas ngritjes, një pasagjer kafshoi një asistente fluturimi, duke shkaktuar alarm te ekuipazhi dhe pasagjerët.

Aeroplani bëri një ulje të paplanifikuar në Papeete, kryeqyteti i Polinezisë Franceze.

Sipas raportimeve të ABC Australia dhe mediave të tjera lokale, pasagjeri u neutralizua nga disa udhëtarë në bord deri në mbërritjen e avionit, transmeton albinfo.ch.

Pas uljes, ai u arrestua nga autoritetet lokale dhe u mor në paraburgim për t’u marrë në pyetje.

Ndërkohë, avioni u furnizua me karburant dhe vijoi udhëtimin drejt Shteteve të Bashkuara pa probleme të tjera.

Motivet e sulmit ndaj asistentes së fluturimit mbeten ende të paqarta dhe po hetohen nga autoritetet.

Kompania ajrore reagoi menjëherë pas incidentit, duke theksuar se pasagjeri është futur në listën e zezë dhe nuk do të lejohet më të udhëtojë me fluturimet e saj.

“Siguria e pasagjerëve dhe stafit tonë është prioritet absolut dhe ne kemi tolerancë zero për sjellje kërcënuese ose agresive në bord”, tha një zëdhënës i Qantas.

Injoroi ndalimin – mbetet i bllokuar në kthesën malore në Zvicër

Posted on by BR

Një shofer 73-vjeçar ka shkaktuar bllokim të trafikut në kantonin Solothurn pasi injoroi ndalimin për automjetet mbi 3.5 tonë dhe mbeti i bllokuar në një kthesë të ngushtë malore.

Incidenti ndodhi të premten pasdite në rrugën Balmbergstrasse, pranë zonës Welschenrohr, kur shoferi vazhdoi rrugën drejt Balmbergut pavarësisht sinjalizimit të qartë të ndalimit.

Sipas policisë kantonale, autohoma mbeti e bllokuar në një kthesë të ngushtë djathtas dhe nuk mund të lëvizte më. Për nxjerrjen e saj u desh ndërhyrja e një kompanie të specializuar për tërheqje automjetesh, transmeton albinfo.ch.

Për shkak të operacionit të shpëtimit, rruga Balmbergstrasse qëndroi e mbyllur për rreth tre orë. Autoritetet nuk raportuan të lënduar, por incidenti shkaktoi probleme në qarkullim në zonën malore.

Zvicra mund t’i mbajë centralet bërthamore aktive deri në 80 vjet

Posted on by BR

Qeveria zvicerane konsideron se dy centralet kryesore bërthamore të vendit mund të vazhdojnë të funksionojnë deri në 80 vjet, shumë më gjatë sesa ishte parashikuar më herët, transmeton albinfo.ch.

Sipas një raporti të porositur nga Këshilli Federal, centralet bërthamore Gösgen Nuclear Power Plant dhe Leibstadt Nuclear Power Plant mund të operojnë në mënyrë teknike dhe ekonomike deri në 80 vjet, nëse realizohen investimet e nevojshme për modernizim dhe siguri.

Deri tani konsiderohej realist operimi i tyre deri në rreth 60 vjet. Reaktori i Gösgen ka hyrë në funksion në vitin 1979, ndërsa Leibstadt në vitin 1984.

Raporti vlerëson se investimet për përmirësimet teknike do të kushtonin mes 700 milionë dhe 1.2 miliard franga zvicerane, por shumica e skenarëve tregojnë se ato mund të jenë financiarisht të leverdishme pa pasur nevojë për subvencione shtetërore.

Autoritetet federale argumentojnë se vazhdimi i operimit të centraleve mund të ndihmojë Zvicrën të shmangë mungesat e energjisë, sidomos gjatë dimrit, kur vendi varet më shumë nga importet. Aktualisht energjia bërthamore prodhon rreth një të tretën e energjisë elektrike të Zvicrës.

Megjithatë, raporti paralajmëron se sfidat kryesore nuk janë vetëm teknike, por edhe politike dhe rregullatore. Ndryshimet ligjore, kërkesat më të ashpra të sigurisë ose vendime për mbyllje të parakohshme mund të ndikojnë në planet afatgjata të operatorëve.

Debati për energjinë bërthamore është rikthyer fuqishëm në Zvicër vitet e fundit, pas krizës energjetike në Evropë dhe frikës për mungesa të energjisë elektrike gjatë dimrit. Pas aksidentit në Fukushima në vitin 2011, Zvicra kishte vendosur të largohej gradualisht nga energjia bërthamore dhe të mos ndërtonte centrale të reja.

Xhekpoti i Swiss Lotto: 8.437 milionë franga

Posted on by albinfo.ch

Xhekpoti prej 8.437 milionë frangash zvicerane u fitua në shortin e Lotos Zvicerane (Swiss Lotto) të së shtunës.

Gjashtë numrat fitues ishin 3, 10, 22, 27, 35 dhe 42, me numrin bonus 2. Numri i Ripërsëritjes ishte 4, dhe numri i Xhokerit ishte 369586.

Swisslos njoftoi se xhekpoti për shortin e ardhshëm të mërkurën do të jetë 1.5 milionë franga zvicerane.

Turneu i mundjes së duarve “Gjergji i Pamposhtur”

Posted on by albinfo.ch

Në nder të 621-vjetorit të lindjes së Gjergj Kastriotit – Skënderbeut Shoqata “Gjergj Kastrioti” Zvicër ka kënaqësinë të ftojë të gjithë shqiptarët, artdashësit dhe miqtë e kulturës të marrin pjesë në turneun amator të mundjes së duarve “Gjergji i Pamposhtur”, kushtuar figurës madhështore dhe trashëgimisë së pavdekshme të Heroit tonë Kombëtar, Gjergj Kastrioti – Skënderbeu.

Detajet e aktivitetit

Data: 31 Maj 2026 • Vendndodhja: Grampenweg 5, 8180 Bülach ZH, Zvicër • Pritja: nga ora 11:30 • Fillimi i programit: ora 12:00 • Fillimi i turneut: ora 13:00 💰

Pjesëmarrja dhe çmimet: • Hyrja: Sipas dëshirës

• Regjistrimi: në vend, nga ora 11:00 – 13:00

• Pjesëmarrja në turne (femra & meshkuj): 10 CHF 🏆

Çmimet: • Vendi i parë: 100 CHF • Vendi i dytë: 70 CHF • Vendi i tretë: 50 CHF

Ky manifestim dhe turne amator synon të simbolizojë forcën, qëndrueshmërinë dhe shpirtin luftarak të të Pamposhturit tonë, Skënderbeut, një figurë që vazhdon të na frymëzojë në çdo kohë. Ky është një organizim familjar, ku të gjithë, të rinj e të moshuar, janë të mirëpritur të kalojnë një ditë të bukur së bashku në frymë kombëtare.

🎨 Për fëmijët do të organizohet edhe një punëtori arti, ku ata do të kenë mundësi të shprehin kreativitetin e tyre dhe të lidhen me figurën e Heroit tonë në mënyrë edukative dhe argëtuese.

Ju ftojmë të merrni pjesë në programin artistik dhe natyrisht të bëheni pjesë e këtij turneu unik, ku forca fizike bashkohet me krenarinë kombëtare. Kjo është një mundësi e veçantë për të përkujtuar historinë tonë, për të shijuar artin dhe për t’u bashkuar në një aktivitet me vlera të larta kombëtare. 👉 Të gjithë janë të mirëpritur!

Për më shumë informacione, ju lutemi na kontaktoni.

Me respekt dhe dashuri për të Pamposhturin tonë Gjergj Kastrioti – Skënderbeu Shoqata GJERGJ KASTRIOTI Zvicër

KQZ: Qytetarët e Kosovës që më 7 qershor janë jashtë vendit do të mund të votojnë

Posted on by erezzaademi

Zëdhënësi i Komisionit Qendror të Zgjedhjeve në Kosovë, Valmir Elezi, ka njoftuar se qytetarët e Kosovës, që ditën e zgjedhjeve të 7 qershorit ndodhen jashtë vendit, do ta kenë mundësinë të votojnë.

Ai ka deklaruar se qytetarët duhet ta bëjnë regjistrimin gjatë periudhës për regjistrimin e votuesve jashtë Kosovës, e cila ka filluar më 6 maj dhe do të përfundojë më 17 maj 2026.

“Komisioni Qendror i Zgjedhjeve, përveç që mundëson regjistrimin e shtetasve që jetojnë jashtë vendit për të votuar përmes postës ose në përfaqësi diplomatike, një mundësi të tillë e kanë edhe qytetarët e Kosovës të cilët në ditën e zgjedhjeve nuk janë në Kosovë, pra që përkohësisht gjenden jashtë vendit”, ka deklaruar ai, transmeton albinfo.ch.

Tutje, ai ka shtuar se procedura e regjistrimit është e njëjtë me atë për regjistrimin e votuesve jashtë Kosovës.

“Procedura e regjistrimit të tyre është e njëjtë, si ajo e shtetasve të Kosoës që jetojnë jashtë vendit. Vetëm në rubrikën ku kërkohen dokumentet e nevojshme për regjistrim, aplikuesi duhet të bashkangjes dokumentin që dëshmon adresën e personit tek i cili qëndron përkohësisht, ose dëshmi tjetër banimi për rastet specifike, si rezervim hoteli, konvikti, etj”, tha tutje ai.

Mijëra njerëz protestojnë në Vjenë kundër pjesëmarrjes së Izraelit në Eurovision

Posted on by erezzaademi

Në Vjenë sot u protestua kundër pjesëmarrrjes së Izraelit në Festivalin e Këngës në Eurovision.

Mijëra njerëz u mblodhën në Christian-Broda-Platz pranë Westbahnhof të Vjenës dhe protesta mblodhi së bashku grupe të ndryshme aktivistësh dhe individë që shprehnin kundërshtimin ndaj përfshirjes së Izraelit në konkurs, shkruan theinternational, transmeton albinfo.at.

Qindra oficerë policie u vendosën në vend për të siguruar perimetrin por megjithatë, protesta ishte paqësore dhe nuk u raportuan incidente.

Raporti: Zvicra nën presion nga lufta hibride dhe spiunazhi rus

Posted on by Drin Reçica

Situata e sigurisë në Switzerland është përkeqësuar ndjeshëm vitet e fundit, me një përshpejtim të dukshëm gjatë vitit 2025, sipas raportit vjetor të gjendjes së kërcënimit të miratuar nga Swiss Federal Council, përcjell albinfo.ch.

Dokumenti përshkruan një mjedis ndërkombëtar gjithnjë e më të paqëndrueshëm, ku Zvicra është e ekspozuar ndaj luftës hibride, sulmeve kibernetike, spiunazhit dhe kërcënimeve ndaj infrastrukturës kritike.

Në qendër të vlerësimit mbetet Russia, e cila cilësohet si kërcënimi kryesor për sigurinë dhe stabilitetin në Evropë. Sipas raportit, Moska përdor metoda hibride si sabotimi, dezinformimi, sulmet kibernetike dhe operacionet e ndikimit.

Raporti thekson gjithashtu se United States paraqitet si faktor pasigurie strategjike për Evropën, për shkak të ndryshimeve në prioritetet e politikës së saj të jashtme dhe të mbrojtjes.

Në dokument përmendet edhe roli në rritje i China, e cila shihet si një aktor kyç në rivalitetin global me SHBA-në dhe si mbështetëse e Rusisë në disa fusha ekonomike dhe politike.

Sipas raportit, konkurrenca mes fuqive të mëdha po ndikon drejtpërdrejt edhe në aftësitë inovative dhe teknologjike të Zvicrës, veçanërisht në sektorë si inteligjenca artificiale, gjysmëpërçuesit dhe teknologjitë kritike.

Po ashtu, kërcënimi i spiunazhit vlerësohet si “shumë i lartë”, ndërsa infrastruktura zvicerane mbetet objekt i sulmeve kibernetike nga aktorë shtetërorë të ndryshëm.

Raporti përmend edhe rrezikun nga ekstremizmi i dhunshëm, si dhe kërcënimin e vazhdueshëm të terrorizmit xhihadist, veçanërisht nga individë të radikalizuar online.

Në Lindjen e Mesme, situata me Iran përshkruhet si faktor destabilizues me potencial për përshkallëzim të mëtejshëm.

Në përfundim, dokumenti thekson se Zvicra ndodhet përballë pesë sfidave kryesore gjeopolitike globale dhe se forcimi i aftësive mbrojtëse kombëtare po shihet si domosdoshmëri në rritje, përfshirë edhe diskutimet për rritjen e financimit të sektorit të sigurisë./Albinfo.ch

Aksident në autostradën pranë Bernës, pesë persona të lënduar

Posted on by Drin Reçica

Një seri aksidentesh trafiku kanë shkaktuar kaos të madh në autostradat pranë Bern dhe në kantonin Fribourg të premten në mbrëmje, duke lënë të paktën pesë persona të lënduar, transmeton albinfo.ch.

Sipas Bern Cantonal Police, brenda një kohe të shkurtër ndodhën rreth dhjetë aksidente me të lënduar në autostradat A1 motorway dhe A12 motorway. Si pasojë, autostrada A12 në drejtim të Flamattit u mbyll plotësisht për disa orë.

Sipas raportimeve, një karambol i madh ndodhi në segmentin mes Thörishaus dhe Niederwangen, ku u përfshinë më shumë se gjashtë automjete. Disa prej tyre pësuan dëme të konsiderueshme dhe përfunduan të ndaluara në mënyrë të çrregullt në rrugën e lagur.

Në vendin e ngjarjes intervenuan disa ambulanca, zjarrfikës dhe forca të tjera emergjente për të menaxhuar situatën dhe për të ndihmuar të lënduarit.

Autoritetet bëjnë të ditur se pesë persona janë plagosur, por fatmirësisht asnjëri prej tyre nuk ka marrë lëndime të rënda. Të lënduarit janë transportuar me ambulancë në spitale të ndryshme për trajtim mjekësor.

Në momentin e aksidenteve, mbi zonën në perëndim të Bernës kishte kaluar një front i fuqishëm stuhie me reshje intensive. Për shkak të kushteve të vështira të vozitjes dhe rrezikut nga ngricat, në rajon ishte lëshuar edhe një paralajmërim për akull në rrugë.

Pas disa orësh ndërprerjeje dhe punimeve për pastrimin e rrugëve, autostradat A1 West dhe A12 u rihapën për qarkullim rreth orës 21:30. Ndërkohë, autoritetet kanë nisur hetimet për të sqaruar shkaqet e sakta të aksidenteve. /Albinfo.ch

Kosova dhe Italia forcojnë bashkëpunimin kulturor

Posted on by Drin Reçica

Është nënshkruar marrëveshje bashkëpunimi ndërmjet Bibliotekës Kombëtare të Kosovës “Pjetër Bogdani” dhe Bibliotekës Nazionale Marciana në Venecia, duke shënuar një hap të rëndësishëm në forcimin e lidhjeve kulturore dhe akademike ndërmjet Kosovës dhe Italisë, transmeton albinfo.ch.

Marrëveshja u nënshkrua në kuadër të projektit bilateral Kosovë–Shqipëri “Modalitete Kërkimore në Arkivat e Venecias”, ku u realizua bashkëpunimi i parë zyrtar mes këtyre dy institucioneve të rëndësishme bibliotekare.

Gjatë vizitës zyrtare në Itali, delegacioni nga Kosova mori pjesë në një trajnim intensiv me ekspertë të bibliotekave dhe arkivave të Marcianas, ku u diskutua shkëmbimi i përvojave profesionale, metodologjitë kërkimore dhe mundësitë për avancimin e bashkëpunimit në fushën e bibliotekarisë dhe trashëgimisë kulturore.

Ky partneritet pritet të hapë rrugë për projekte të përbashkëta, kërkime në dokumente historike dhe promovimin e mëtejmë të trashëgimisë kulturore shqiptare në arenën ndërkombëtare./Albinfo.ch

Në Gjermani u mbajt ekspozita “Helmimet në Kosovë 1990–1992”, u rikujtuan krimet ndaj shqiptarëve

Posted on by Drin Reçica

Nga 11 deri më 15 maj, në Universitetin Duisburg-Essen në Gjermani u mbajt ekspozita “Helmimet në Kosovë 1990–1992”, e cila solli para publikut një nga kapitujt më të errët të historisë së Kosovës, transmeton albinfo.ch.

Ekspozita u organizua nga Konsullata e Përgjithshme e Republikës së Kosovës në Dyseldorf, në bashkëpunim me Institutin e Krimeve të Kryera Gjatë Luftës në Kosovë (IKKL) dhe Shoqatën e Studentëve Shqiptarë në NRW, në kuadër të iniciativës “Westbalkantage2026”.

Përmes dokumenteve, dëshmive dhe materialeve arkivore, ekspozita rikujtoi rastet e helmimeve masive të mijëra nxënësve, studentëve dhe qytetarëve shqiptarë në Kosovë gjatë viteve 1990–1992, të cilat ndodhën nën regjimin serb. Organizatorët theksuan se qëllimi i ekspozitës ishte ruajtja e kujtesës historike dhe dokumentimi i së vërtetës për këto ngjarje.

Hapja zyrtare e ekspozitës u bë nga Konsulli Valdrin Ukshini dhe Drejtori i IKKL-së Atdhe Hetemi, të cilët vlerësuan rëndësinë e dokumentimit institucional dhe të kujtesës kolektive për krimet e kryera ndaj popullit të Kosovës.

Ekspozita u vlerësua si një aktivitet me rëndësi të veçantë historike dhe shoqërore, duke ofruar një hapësirë reflektimi për një periudhë të dhimbshme dhe duke riafirmuar nevojën për drejtësi dhe kujtesë kolektive./Albinfo.ch

Lushtaku lirohet në procedurë të rregullt

Posted on by albinfo.ch

Në lidhje me sulmin fizik mbi Hysni Mehanin sot është paraqitur në polici kryetari i Skenderajt, Sami Lushtaku. Pas intervistimiti  është liruar në procedurë të rregullt. Përderisa Mehani u lirua nga Spitali dhe e akuzoi Lushtakun për sulmin, në Skenderaj tensionet u përcollën me grumbullime qytetarësh e akuza politike

Kryetari i Skenderajt, Sami Lushtaku, është paraqitur në polici pasi dyshohet se, bashkë me persona të tjerë, sulmoi fizikisht zëvendësministrin e Financave, Hysni Mehani, i cili drejton Qendrën e Lëvizjes Vetëvendosje në këtë komunë dhe është kandidat për deputet.

Ai është paraqitur për intervistim në Stacionin e Policisë në Skenderaj pasditen e së premtes, dhe pas më pak se një ore është liruar në procedurë të rregullt, raporton koha.net. E, qindra qytetarë u mblodhën te Stacioni i Policisë, përfshirë edhe me mjete motorike si traktorë të vendosur në rrugë, me arsyetimin se do të pengojnë arrestimin apo transferimin e mundshëm të Lushtakut diku tjetër.

Një ditë më parë Prokuroria njoftoi se kryetari i Skenderajt nuk i është përgjigjur ftesës për intervistim. E, në orët e vona të së enjtes, në Skenderaj u panë edhe mjete të njësisë elite të policisë, që nga eksponentë të Partisë Demokratike (PDK), së cilës i përket Lushtaku, u pa si mësymje për ta arrestuar atë. Pas kësaj, qindra qytetarë dolën në rrugët e qytetit, tek objekti i Komunës dhe te stacioni i Policisë.

Pas intervistimit, Lushtaku tha se ngjarja ka ngjyrim politik dhe se kryeministri në detyrë, Albin Kurti, do që të viktimizohet në prag të fushatës për zgjedhjet e 7 qershorit.