Archives

Të huajt investojnë në tregun e pronave në Shqipëri

Posted on by BR

Rritja e vlerës së pronave në Shqipëri po shihet si një biznes fitimprurës, jo vetëm për vendasit, por edhe për të huajt.

Ndonëse prej vitesh po investojnë, në vitin 2024, sipas të dhënave të Bankës së Shqipërisë, 379 milionë euro shkuan në drejtim të këtij tregu nga të huajt.

Ekspertët e tregut thonë se qëllimi për t’i kthyer në biznese me qira ditore është arsyeja që po i nxit më shumë të huajt të investojnë, raporton TCH, transmeton albinfo.ch.

“Kemi kërkesa shumë të mëdha që marrin apartamente, i riparojnë me kushtet që duan të huajt dhe turistët, dhe i japin me Booking për disa net,” tha Gjin Gjoka, ekspert i pasurive të paluajtshme.

“Gjithmonë rritje. Dita-ditës shohim kërkesa të shtuara, ku dhe oferta është po në të njëjtin drejtim. Njerëzit kërkojnë me qira – janë vendasit, por më shumë janë dhe të huajt,” tha Ervin Demirxhiu, ekspert i pasurive të paluajtshme.

Ky zhvillim i tregut ka rritur ndjeshëm çmimet edhe për vendasit, kryesisht ato të qirave.

“Nëse çmimet kanë një stopim, ka te pronat luksoze, por s’ka rënie çmimesh. Në shtëpi do ishte mirë që të gjithë të kishin një shtëpi. Duke llogaritur Unazën e Vjetër, pothuajse 90% e apartamenteve janë të riparuara dhe me Booking. Së dyti, kërkesa e studentëve është e lartë, por edhe rreth 19 mijë banorë shpërngulen, pashaportizohen në Tiranë. Në Astir sot gjejmë një apartament jo poshtë 350 euro dhomë-kuzhinë. 2+1 të kompletuar nuk e gjen nën 500 euro. Kinostudio, Porcelani, Xhamlliku – qiratë janë 550, tek Unaza 650,” theksoi Gjoka.

“Trendi rritës vazhdon, si pasojë e kërkesës së lartë, por edhe ndërtuesit kanë shtuar kostot që përkthehen në fund te klienti,” tha Demirxhiu.

Por deklarata e kryeministrit Edi Rama për një dyfishim të çmimeve të pronave me anëtarësimin në BE, si rrjedhojë edhe të qirave, sipas ekspertëve të tregut, do të vërë në lëvizje qytetarët për të investuar me çmimet aktuale.

“Sipas parashikimeve, mund të kemi rritje. Por i bëj thirrje që nuk ka ulje çmimesh,” tha Gjoka.

“Nuk kemi hyrë në Evropë dhe rritjet e çmimeve janë goxha. E shohin një treg me potencial. Të huajt do jenë goxha në numër dhe sigurisht do rrisin çmimet,” tha Demirxhiu.

Jo vetëm në tregun e pasurive të paluajtshme, investimet e të huajve në 2024 u rritën ndjeshëm, teksa arritën 1.6 miliardë euro, 92 milionë më shumë se në 2023.

Holanda, Italia dhe Turqia janë shtetet që kryesojnë listën për vlerën e investimeve të huaja në Shqipëri.

Ekspertët: Fëmijët nën 3 vjeç të mos lejohen asnjë sekondë pranë ekraneve

Posted on by Alb

Fëmijët nën tre vjeç nuk duhet të ekspozohen ndaj ekraneve, kurse ata deri në gjashtë vjeç mund të kenë akses në ekrane, por në mënyrë të limituar. Këto janë udhëzimet që ka nxjerrë një grup ekspertësh, i caktuar nga presidenti francez, Emmanuel Macron.

Paneli deklaroi po ashtu të martën se fëmijët nën 11 vjeç nuk duhet të lejohen të mbajnë celularë. Po ashtu, sipas tyre, askush deri në 13 vjeç nuk duhet të lejohet të ketë celular me akses në internet, përcjell albinfo.ch.

Ndërkohë, sa i përket mediave sociale, sipas këtyre ekspertëve, ato duhet të ndalohen për fëmijët nën 15 vjeç. Kurse adoleshentët mbi këtë moshë duhet të kenë akses vetëm në platforma etike, si Bluesky.

Sipas grupit të caktuar nga Macron, mediat sociale mund të kthehen në faktorë risku për përjetimin e ankthit dhe depresionit te të rinjtë. Po ashtu, ata zbuluan se fëmijët mund të përballen me një nivel alarmues ekspozimi ndaj përmbajtjes pornografike dhe dhunës.

Në raport thuhet se ka një konsensus shumë të qartë sa i përket efekteve negative, si indirekte ashtu edhe direkte, që sjellin ekranet.

Në të thuhet gjithashtu se koha e kaluar në ekrane ka pasoja si për shëndetin e fëmijëve, ashtu edhe për zhvillimin e tyre, por edhe në të ardhmen e civilizimit dhe shoqërisë sonë.

 

Profesionet më të kërkuara në Kosovë

Posted on by Alb

Mungesa e fuqisë punëtore të kualifikuar po nxit një numër gjithnjë e më të madh të të rinjve në Kosovë të orientohen drejt arsimit profesional. Këtë trend e ka vënë në dukje edhe Al Jazeera Balkans, e cila i ka kushtuar një raport të veçantë aftësimit të të rinjve kosovarë për tregun e punës.

Sipas Al Jazeera, automekanikët janë ndër profesionet më të kërkuara në Kosovë dhe pagat në këtë sektor tejkalojnë mesataren. Në një vizitë në shkollën e mesme profesionale “Shtjefën Gjeçovi” në Prishtinë, mediumi ndërkombëtar ka vërejtur se nxënësit me aftësi profesionale kanë mundësi më të mëdha punësimi sesa ata me diploma akademike, transmeton albinfo.ch.

Ndryshe nga të diplomuarit në fusha akademike, të cilët shpesh përballen me vështirësi për të gjetur një vend pune, të rinjtë me kualifikime profesionale mund të zgjedhin më lehtë ku duan të punojnë.

Shaip Kamberi refuzon të marrë pjesë në konsultimet për qeverinë e re serbe

Posted on by Alb

Deputeti i vetëm shqiptar në Parlamentin e Serbisë, Shaip Kamberi, i ka drejtuar një letër Presidentit serb, Aleksandar Vuçiq, duke e informuar se nuk do të marrë pjesë në konsultimet për formimin e qeverisë së re.

Në letrën e tij, Kamberi ka deklaruar se refuzimi i tij vjen si pasojë e diskriminimit të vazhdueshëm ndaj shqiptarëve në Serbi dhe mungesës së vullnetit politik për të përmirësuar pozitën e tyre, transmeton albinfo.ch.

“Nuk shoh të arsyeshme të bëhem pjesë e një procesi të rremë të demokracisë, sa për të përmbushur formën, ndërkohë që bashkëkombasit e mi mbeten një pakicë e diskriminuar në sistemin shtetëror gjatë 13 viteve të fundit”, ka shkruar Kamberi, duke publikuar edhe letrën e plotë.

Ai ka theksuar se shqiptarët në Serbi vazhdojnë të përballen me probleme të shumta, përfshirë pasivizimin e adresave, mosnjohjen e diplomave të fituara në Kosovë, mungesën e përfaqësimit në institucionet publike dhe diskriminimin ekonomik, përcjell albinfo.ch.

Kamberi ka rikujtuar se, që nga viti 2014, kërkesat e shqiptarëve janë bazuar në “Planin me shtatë pika”, një dokument i hartuar nga subjektet politike shqiptare dhe i miratuar nga Qeveria serbe në vitin 2013. Sipas tij, pavarësisht premtimeve dhe përpjekjeve institucionale, asnjë qeveri e drejtuar nga Vuçiq nuk ka bërë përpjekje serioze për t’i realizuar këto kërkesa.

Problemet kryesore të komunitetit shqiptar në Serbi

Në letrën e tij, Kamberi ka renditur disa nga problemet kryesore me të cilat përballen shqiptarët në Preshevë, Bujanoc dhe Medvegjë:

  • Pasivizimi i adresave të shqiptarëve vazhdon.

  • Mosnjohja e diplomave të fituara në Kosovë pengon punësimin e të rinjve.

  • Shqiptarët vazhdojnë të përjashtohen nga institucionet publike.

  • Gjuha e urrejtjes ndaj shqiptarëve mbetet e pranishme në diskursin politik.

  • Zonat me shumicë shqiptare janë ndër më të pazhvilluarat në Serbi.

  • Mjekët dhe kuadrot shqiptare të specializuara në polici mbeten të papunë.

Duke përmbyllur letrën e tij, Kamberi ka bërë thirrje për një qasje të re në politikën serbe, e cila do të përfshinte lirinë e plotë të medias, respektimin e të drejtave të njeriut dhe të pakicave kombëtare.

“Jam i hapur për bisedime dhe bashkëpunim me këdo që, në mënyrë serioze dhe të sinqertë, do të angazhohet për realizimin e kërkesave tona legjitime”, ka përfunduar ai.

Ky vendim i Kamberit për të bojkotuar konsultimet vjen në një kohë kur Serbia po përballet me një krizë politike dhe tensione të brendshme lidhur me qeverisjen e ardhshme të vendit.

E përditshmja britanike shkruan për bukuritë në Shqipëri

Posted on by BR

Koha me diell dhe perëndimet nuk ishin e vetmja gjë që më bëri përshtypje në udhëtimin tim në këtë pikë të nxehtë të Ballkanit, shkruan Sydney Evans në një artikull të botuar në të përditshmen britanike “Express”.

Javën e kaluar, “Wizz Air” zbuloi plazhet më të qeta për t’u vizituar në Evropë në muajin prill dhe u befasova kur pashë një të tillë në listë.

Kompania ajrore hungareze zbuloi se plazhi shqiptar i Durrësit ishte një nga plazhet më pak të mbushura me njerëz në prill, me një numër të ulët vizitorësh ditorë gjatë këtij muaji, shkruan ATSh, transmeton albinfo.ch.

Vitet e fundit, Shqipëria është shndërruar në një destinacion popullor për turistët britanikë – e njohur për plazhet e saj bruz dhe peizazhin e thyer – që është perfekt për ata që kërkojnë të eksplorojnë më këmbë.

Në kërkim të pushimeve relaksuese me diell të garantuar, unë dhe disa miq vendosëm të rezervonim një udhëtim në Durrës verën e kaluar. Duke mos qenë kurrë më parë në Shqipëri, mezi prisja të zbuloja vetë pse ky vend i vogël evropian ishte një destinacion kaq popullor për pushuesit e huaj.

Zgjodhëm Durrësin pasi na kishin mbetur vetëm disa ditë, dhe qyteti i bukur bregdetar ndodhet vetëm 45 minuta me makinë nga kryeqyteti Tiranë, ku është aeroporti kryesor ndërkombëtar i vendit.

Fluturimi direkt nga aeroporti “London Stansted” me “RyanAir” – rreth tre orë – ia vlente absolutisht për disa ditë në vendin ballkanik.

Ne qëndruam në një hotel të vogël të bukur, vetëm disa minuta më këmbë nga plazhi, dhe temperaturat shënonin nën 28 gradë Celsius gjatë gjithë kohës që ishim atje.

Sigurisht që nuk do ta përshkruaja plazhin si të qetë, pasi ne e vizituam atë gjatë muajit korrik, i cili konsiderohet kulmi i sezonit turistik në Shqipëri.

Megjithatë, ishte tepër e lehtë për të gjetur hapësirë të mjaftueshme në plazh dhe për të rezervuar shezlonge që ishin të lira, duke kaluar ditën në bregdet derisa dielli të zhdukej në perëndimet më të pabesueshme çdo natë.

Ajo që më la më shumë përshtypje ishte mikpritja dhe cilësia e ushqimit.

Pjata me sardele të sapokapura, spageti dhe rizoto, pica krokante dhe sallata greke të mbushura me perime të freskëta – ishin vaktet më të shijshme që kemi provuar.

E vendosur në Gadishullin Ballkanik, fqinje me Greqinë dhe Malin e Zi, Shqipëria ka lidhje të forta me Italinë dhe kjo ishte padyshim e pranishme në ushqimin dhe mikpritjen miqësore që përjetuam.

Restoranti “Pampas Restaurant Golem”, që ndodhet pikërisht në plazhin e Durrësit, shërben ushqim cilësor dhe me kosto të përballueshme. Për një vakt – një pjatë kryesore dhe pije – pagova 10 paund.

Ndërsa Durrësi është i mrekullueshëm për disa ditë buzë plazhit, me shumë hotele dhe restorante aty pranë dhe me vendndodhje të përshtatshme falë afërsisë me Tiranën, plazhet më në jug janë padyshim më piktoreske – që shpesh u referohen si Rivieria Shqiptare.

Patjetër që do të kthehem në Shqipëri, por herën tjetër do t’i jap vetes më shumë kohë – për të eksploruar këtë rajon të vendit dhe plazhet e tij spektakolare.

Rriten kërkesat për rezervime në Sarandë

Posted on by Alb

Industria e turizmit në Sarandë është optimiste për një sezon të suksesshëm, me rritje të ndjeshme të rezervimeve edhe para hapjes zyrtare.

Sipas kreut të Shoqatës së Operatorëve Turistikë, Arben Çipa, Saranda po bëhet gjithnjë e më e preferuar për grupet turistike nga jashtë. “Një numër i madh turistësh grekë dhe francezë kanë filluar të vizitojnë qytetin që në fillim të vitit, një shenjë pozitive për vazhdimësinë e fluksit të vizitorëve,” shprehet ai për Euronews, transmeton albinfo.ch.

Ndërsa rezervimet rriten, Çipa thekson rëndësinë e menaxhimit të mirë të qytetit, duke përfshirë trafikun dhe pastrimin. “Është thelbësore që autoritetet të menaxhojnë trafikun dhe të sigurojnë pastërtinë për një sezon të suksesshëm,” shton ai.

Operatorët turistikë tashmë po përgatiten për një fluks të madh turistësh, duke synuar një menaxhim efikas për një përvojë të këndshme të vizitorëve dhe një vit të mbarë për industrinë.

 

Fitimet e Zelenskyt për vitin 2024: Sa ka fituar presidenti ukrainas?

Posted on by Alb

Sipas deklaratës tatimore të publikuar nga shërbimi i shtypit presidencial, presidenti i Ukrainës, Volodymyr Zelensky, dhe familja e tij patën të ardhura prej rreth 337,000 euro gjatë vitit 2024.

Pothuajse gjysma e këtyre të ardhurave burojnë nga shitja e bonove të qeverisë, ndërsa pjesa tjetër përfshin pagën e presidentit, interesat bankare dhe qiratë e pronave private, transmeton albinfo.ch.

“Bilanci financiar i familjes së presidentit në fund të vitit 2024 mbetet kryesisht i pandryshuar,” thuhet në deklaratën zyrtare, megjithëse shuma e saktë nuk është specifikuar.

Para se të hynte në politikë, Zelensky ishte një aktor, producent filmi dhe skenarist i njohur. Sa i përket pasurisë së tij totale, vlerësimet ndryshojnë, me disa burime që sugjerojnë se ajo arrin në miliona dollarë, por shifra e saktë mbetet e paqartë.

Zbulimi zviceran: Metanina është më e keqe se nikotina

Posted on by BR

Dega Thurgau e Shoqatës Zvicerane të Mushkërive po jep alarmin: zëvendësuesi sintetik i nikotinës në cigaret elektronike dhe qeset e nikotinës – 6-Methylnicotine (6-MN), ose Metatin – mund të jetë potencialisht më i varur sesa nikotina që rrjedh nga bima e duhanit.

Në këtë kuptim, shoqata shkruan në një njoftim për shtyp, produktet që përmbajnë këtë substancë dhe që shiten me etiketën “NoNic” ose “0% nikotinë” janë mashtruese, sepse ato thjesht përmbajnë një formë të ndryshme, sintetike të nikotinës, e cila mund të jetë edhe më problematike, transmeton albinfo.ch.

Sipas faqes së internetit të Shoqatës Zvicerane për Parandalimin e Duhanit (AT), kjo është një formë e re e nikotinës sintetike që i ngjan strukturës së nikotinës natyrale. Është krijuar për të imituar apo edhe për të intensifikuar efektet psikoaktive të nikotinës. Kjo është arsyeja pse shoqata ka bërë thirrje për një ndalim të menjëhershëm të shitjes së metatinës në javët e fundit.

 

Reagime të forta për dënimin e Marine Le Pen

Posted on by Alb

Një gjykatë franceze ka dënuar lideren e partisë së djathtë “Rally Franceze”, Marine Le Pen, me katër vjet burg për përvetësim të fondeve evropiane. Nga ky dënim, dy vite janë të pezulluara, ndërsa asaj i ndalohet mbajtja e posteve publike për pesë vjet dhe i është caktuar një gjobë prej 100,000 eurosh.

Avokati i Le Pen ka njoftuar se ajo do të apelojë vendimin, ndërsa ky dënim ka shkaktuar reagime të forta nga liderë të ndryshëm politikë në Evropë, transmeton albinfo.ch.

Kryeministri hungarez, Viktor Orban, ka shprehur mbështetjen e tij për Le Pen, duke shkruar në platformën X: “Unë jam Marin”, duke e krahasuar atë me figura të tjera politike të cilat ai i cilëson si të persekutuara, si Donald Trump dhe zëvendëskryeministri italian, Matteo Salvini.

Edhe Salvini, i cili vetë përballet me sfida ligjore në Itali, ka reaguar duke e quajtur këtë vendim një përpjekje për ta përjashtuar Le Pen nga jeta politike: “Në Paris ata dënuan Marine Le Pen dhe duan ta përjashtojnë atë nga skena politike – një skenar i frikshëm që e kemi parë edhe në vende të tjera si Rumania. Ky është një akt lufte nga Brukseli, por ne nuk do të frikësohemi,” tha ai.

Në Spanjë, lideri i partisë së djathtë Vox, Santiago Abascal, deklaroi se ky vendim nuk do të mund ta shuajë zërin e popullit francez. Ai e ftoi Le Pen në Madrid, në një ngjarje të organizuar nga grupi “Patriots for Europe”, në të cilën pritet të marrin pjesë edhe Orban dhe liderë të tjerë evropianë.

Ndërkohë, në Holandë, lideri i ekstremit të djathtë, Geert Wilders, e quajti vendimin “të paimagjinueshëm mizor” dhe tha se beson në fitoren e Le Pen në apel, duke shtuar se ajo ende ka mundësinë të bëhet presidente e Francës.

Dënimi i Marine Le Pen vjen në një kohë kur politika evropiane po përjeton tensione të mëdha mes forcave tradicionale dhe atyre të ekstremit të djathtë. Si do të ndikojë ky vendim në të ardhmen politike të Francës dhe të Evropës, mbetet për t’u parë.

 

Çmimi i arit shënon rekord të ‘zi’

Posted on by Alb

Tregjet e aksioneve kanë përjetuar një javë të vështirë, mes shqetësimeve të investitorëve për ndikimin e tarifave amerikane në ekonomi. Pas rënieve të ndjeshme në Azi, ku Tokio humbi 4% dhe Hong Kongu 1.1%, edhe tregjet evropiane u përballën me sfida, me Milano dhe Frankfurt që shënuan humbje prej 1%, si dhe Parisin dhe Londrën me 0.9%. Ndërkohë, në Nju Jork, kontratat e së ardhmes Nasdaq po bien me 1%, ndërsa ato në S&P 500 me 0.6%.

Për shkak të pasigurisë së tregjeve, investitorët po i drejtohen aktiveve të sigurta si ari, i cili ka arritur nivele rekord me një rritje prej 1.6%, duke kapur vlerën e 3,125 dollarëve. Po ashtu, jeni japonez ka fituar 0.5% kundrejt dollarit, dhe obligacionet po tregojnë yield-e në rënie, pasi investitorët shpresojnë në politika më lehtësuese nga bankat qendrore, përcjell albinfo.ch.

Ndikim të konsiderueshëm ka pasur edhe tregu i naftës, që u rrit me 0.5%, duke arritur në 69.71 dollarë për fuçi (WTI), si pasojë e kërcënimeve të presidentit Trump për tarifa ndaj naftës së papërpunuar ruse, nëse nuk arrihet një armëpushim me Ukrainën.

Ndërkohë, ari vijon të shënojë rekorde të reja: çmimi i metalit të çmuar për dërgesë të menjëhershme (Gold Spot) ka arritur në 3,120.74 dollarë, me një rritje prej 1.15%, ndërsa ari për dorëzim në qershor (Comex) tregtohet me 3,152.40 dollarë, duke avancuar me 1.22%.

Italia në krizë demografike, lindjet në nivelin më të ulët historik

Posted on by Alb

Instituti Kombëtar i Statistikave i Italisë (ISTAT) raportoi se lindjet në vend ranë në nivelin më të ulët historik në 2024, me vetëm 370 mijë foshnja, duke thelluar krizën demografike.

Popullsia italiane u tkurr me 37 mijë persona, duke arritur në 58.91 milionë, ndërsa vdekjet tejkaluan lindjet me 281 mijë. Përpjekjet e qeverisë Meloni për të frenuar këtë rënie nuk kanë dhënë rezultat, transmeton albinfo.ch.

Gjithashtu, 191 mijë italianë u shpërngulën jashtë, niveli më i lartë i këtij shekulli, ndikuar edhe nga ndryshime rregullatore. Të huajt përbënin 9.2% të popullsisë, ose 5.4 milionë njerëz.

Forcohet frangu zviceran

Posted on by BR

Shqetësimi kryesor është se tarifat e shpallura nga presidenti amerikan Donald Trump për 2 prill do të kenë një ndikim negativ në rritjen ekonomike dhe do të nxisin sërish inflacionin. Ekziston gjithashtu një mungesë e qartësisë se cilat detyra do të vendosen saktësisht. “Fjala që dëgjoj vazhdimisht është pasiguri,” thotë një ekspert i monedhës.

Kështu, euro ka rënë paksa kundrejt frangut sot, në krahasim me mbrëmjen e së premtes, duke u tregtuar me 0,9528 CHF. Dollari, nga ana e tij, po tregtohet me 0,8790 CHF, duke rrëshqitur sërish nën 88 cent.

Përveç frangut, tregtarët besojnë se jeni po ashtu kërkohet gjithnjë e më shumë në mjedisin aktual, shkruan Swissinfo.ch, transmeton albinfo.ch.

“Disponimi i tregut ishte tashmë mjaft i brishtë përpara shpalljes së vendosjes së tarifave të SHBA-së të mërkurën, por presidenti Trump e përkeqësoi më tej atë kur u tha gazetarëve se detyrimet do të zbatoheshin për të gjitha vendet dhe jo vetëm për disa të zgjedhur,” thuhet në një koment nga një specialist.

Pasiguria e situatës ilustrohet mirë edhe nga çmimi i arit, i cili mëngjesin e sotëm arriti një rekord të ri: metali i çmuar me shpërndarje të menjëhershme (gold spot) tregtohet me 3115,10 dollarë për ons, me rritje 0,97%, ndërsa ari me shpërndarje në qershor (Comex) ndryshon duart me 3146,20 dollarë, deri 1%.

Kurti në panairin e teknologjisë e industrisë në Gjermani, flet për mundësitë e investimeve

Posted on by Alb

Kryeministri në detyrë i Kosovës, Albin Kurti, ka marrë pjesë në Panairin Ndërkombëtar të Industrisë dhe Teknologjisë, “Hannover Messe 2025”. Gjatë vizitës së tij, ai ka inspektuar stendat dhe pavijonet e disa prej kompanive më të njohura në botë, si Bosch Rexroth, Festo, Siemens, Aleph Alpha, SAP dhe Schneider Electric.

Siç bën të ditur Zyra e Kryeministrit, Albin Kurti ka pasur mundësinë të takohet me përfaqësuesit e këtyre kompanive dhe të njihet nga afër me punën e tyre në fushën e teknologjisë inteligjente të prodhimit, automatizimin industrial dhe ekosistemet digjitale, transmeton albinfo.ch.

Një nga momentet kryesore të vizitës ishte takimi me drejtorin ekzekutiv të Bosch Rexroth, Steffen Haack. Në margjina të panairit, kryeministri Kurti u mirëprit gjithashtu nga drejtori ekzekutiv i Deutsche Messe, Jochen Köckler, organizator i ngjarjes.

“Ata diskutuan mbi realizimin e një projekti të përbashkët vitin e ardhshëm dhe mundësitë për thellimin e bashkëpunimit me Panairin e Hannover Messe,” thuhet në komunikatën zyrtare.

Kryeministri u shoqërua gjatë vizitës së tij nga ministrja e Industrisë, Ndërmarrësisë dhe Tregtisë, Rozeta Hajdari, ambasadori i Kosovës në Gjermani, Faruk Ajeti, shefi i Stafit të Kryeministrit, Luan Dalipi, dhe këshilltarja politike, Fëllanza Podrimja.

Panairi “Hannover Messe 2025” zhvillohet nga data 31 mars deri më 4 prill, nën moton “Shaping the Future with Technology”. Për të dytin vit radhazi, Kosova është e pranishme me biznese të ndryshme, të mbështetura nga Ministria e Industrisë, Ndërmarrësisë dhe Tregtisë dhe agjencia KIESA. Qëllimi kryesor i pjesëmarrjes është promovimi i kompanive vendore dhe krijimi i mundësive të reja për eksport në tregjet ndërkombëtare.

Qeveria Federale paralajmëron: Shoferët duhet të tregojnë shumë durim gjatë Pashkëve

Posted on by Alb

Këtë vit, Pashkët do të jenë sërish një provë durimi për shumë drejtues automjetesh. Ndikimi më i rëndë pritet në aksin veri-jug

Ashtu si çdo vit për Pashkë edhe këtë vit do të ketë radhë të gjata në trafik, sidomos në aksin veri-jug.

Për shumë shoferë, durimi do të vihet në provë.

Për çfarë bëhet fjalë?

Pashkët janë periudha e trafikut të rënduar: Qeveria Federale paralajmëron për radhë të gjata në rrugët kryesore.

Planifikimi është thelbësor – por nëse ngecni në trafik, nuk duhet të largoheni nga autostrada.

SBB gjithashtu pret një numër të madh pasagjerësh dhe do të ofrojë trena shtesë.

Zyra Federale e Rrugëve (Astra) parashikon trafik të rënduar dhe ndërprerje të mëdha gjatë festave të Pashkëve, duke filluar nga e mërkura, 16 prill. Sipas njoftimit për shtyp, trafiku më i madh pritet në aksin A2 përmes Gotthard-it dhe A13 përmes San Bernardino-s. Gjithashtu, priten flukse të larta trafiku në rrugët drejt destinacioneve turistike dhe në autostradat e Fushës së Zvicrës.

Rrugët që pritet të kenë trafik të rënduar

Autostrada

A1 Gjenevë (përfshirë kalimin kufitar Bardonnex)

A1/A3 Cyrih

A1 Härkingen – Wangen aA

A1 Kirchberg – Schönbühl

A2/A3 Bazel (përfshirë kalimet kufitare me Francën dhe Gjermaninë)

A2 Tuneli Belchen – Härkingen

A2/A14 Rajoni i Lucernës (nga Stans-Nord/kthimi

A2 Erstfeld – Biasca (Tuneli i rrugës Gotthard)

A3 Walenstadt – Reichenburg

A4 Axenstrasse

A8 Interlaken – Spiez

A8 Sarnen – Nyja e Lopper

A1/A9 Lozanë

A9 La Veyre/Vevey – Bex-Nord

A12 Châtel-St-Denis – La Veyre/Vevey

A13 Sarganserland – Rothenbrunnen

A13 Andeer – Kufiri Mesocco

A9 Vallorbe (VD)

A2 Chiasso-Brogeda (TI) dhe A24 Gaggiolo (TI)

Rrugët kryesore

Spiez – Kandersteg (shkuarja)

Gampel – Goppenstein (kthimi)

Brunnen – Flüelen (Axenstrasse)

Göschenen – Andermatt

Raron – Brig

Bellinzona – Locarno

H338 Sihlbrugg – Hanegg (Rruga Hirzel)

Rrugë të ndryshme në Oberlandin Bernës, Graubünden dhe luginat anësore të Valais

Valët e kthimit pritet të fillojnë të dielën e Pashkëve, me trafik të dendur edhe të hënën e Pashkëve./albinfo.ch

 

Ka shtyrë të moshuarin mbi shina: Gjykohet shqiptari për tentativë vrasje

Posted on by albinfo.ch

Një qytetar i moshuar shtyhet në shina në një stacion metroje. Kalimtarët mundën të shpëtojnë personin e plagosur rëndë, i cili ka mbetur i paralizuar që nga krimi. Ishte një tentativë vrasjeje?

Pothuajse një vit më parë, shtetasi shqiptar ka sulmuar papritur nga prapa, sipas akuzës, një person 72-vjeçar në stacionin e metrosë Rosa-Luxemburg-Platz, transmeton albinfo.ch. I moshuari ka pësuar lëndime të rënda në zonën e kokës dhe qafës dhe më pas ka mbetur i paralizuar, sipas prokurorisë.

Avokati i shqiptarit njoftoi në fillim të gjykimit se klienti i tij do të komentonte në një datë të mëvonshme.
Zyra e Prokurorit Publik fillimisht kishte ngritur akuza për lëndim të rëndë trupor. Megjithatë, në vendimin e hapjes së procesit, gjykata vuri në dukje një dënim të mundshëm për tentativë vrasjeje, shkruan dpa.de.

I moshuari priste trenin e radhës më 20 prill 2024, rreth orës 20:20, kur është shtyrë papritur, sipas aktakuzës. Pamjet nga kamerat e vëzhgimit dhe deklaratat e dëshmitarëve thuhet se vërtetojnë një sulm nga pas. Kalimtarët mundën ta tërhiqnin të moshuarin përsëri në platformë, përcjell albinfo.ch. Ai ka pësuar, ndër të tjera, edhe disa fraktura të vertebrave të qafës.

“Pensionisti shumë aktiv dhe i pasionuar për udhëtimet” i atëhershëm, që nga goditja që pësoi, tashmë është i kufizuar në një karrige me rrota, tha avokati i tij. Aktualisht, ai jeton në një institucion infermieror.

Për autorin e dyshuar, i cili vjen nga Shqipëria, kjo është akuza e dytë për sulm ndaj një kalimtari. Më 6 prill 2024, ai i ka dalë në rrugë një gruaje, e ka goditur me grushte dhe shkelma. Në atë kohë, i pandehuri ishte i dehur dhe i tha policisë për sulmin e tij të supozuar, ndër të tjera, se ai në këtë mënyrë “qe argëtuar”, është shprehur një polic, si dëshmitar i parë.

37-vjeçari, i cili tha se punonte si punëtor ndërtimi, u arrestua në Berlin-Neukölln në tetor. Që atëherë ai është në paraburgim.

Për procesin gjyqësor ndaj tij, i cili ka filluar, është caktuar të zgjasë edhe katër ditë të tjera dhe të përfundojë deri më 12 maj.

Rreziku i padukshëm në pluhurin e imët po nënvlerësohet, tregon një studim i universitetit të Bazelit

Posted on by Alb

Sipas një studimi nga Universiteti i Bazelit, matjet aktuale nënvlerësojnë ndjeshëm sasinë e substancave të dëmshme për shëndetin që përmban pluhuri i imët.

Njerëzit që thithin ajër të ndotur për vite të tëra janë në rrezik më të lartë për t’u prekur nga shumë sëmundje serioze. Organizata Botërore e Shëndetësisë (OBSH) vlerëson se rreth 6.7 milionë vdekje ndodhin çdo vit si pasojë e ekspozimit të rritur ndaj pluhurit të imët.

Përshkallëzimi i rrezikut

Disa komponime jashtëzakonisht reaktive dyshohen si shkaktarë të kësaj problematike, shkruan Universiteti i Bazelit. Këto substanca mund të reagojnë në rrugët e frymëmarrjes me biomolekula, duke shkaktuar dëmtime që mund të çojnë në reaksione inflamatore dhe pasoja serioze në të gjithë trupin, transmeton albinfo.ch.

Matjet janë të ngadalta

Studimi tregon se komponentët e dëmshëm avullojnë brenda disa minutave ose orëve, por matjet aktuale analizojnë grimcat pas disa ditësh apo javësh. Këtë problem e ka adresuar një metodë e re e zhvilluar nga ekipi i studiuesve, e cila mat pluhurin e imët brenda disa sekondash.

Me këtë metodë, grimcat e ajrit përthyhen në një lëng, ku vihen në kontakt me substanca kimike të ndryshme. Këto reagime prodhojnë sinjale fluoreshente, të cilat mund të maten. Rezultatet tregojnë se 60% deri në 99% e radikalëve të oksigjenit zhduken brenda pak minutave ose orëve.

Grimcat mikroskopike dhe ndikimi në shëndet

Përbërja kimike e këtyre grimcave është shumë e ndërlikuar, pasi ato burojnë nga burime të ndryshme antropogjene dhe natyrore. Studimet vazhdojnë për të kuptuar se cilat grimca shkaktojnë reagime dhe sëmundje afatgjata në trup.

Nga problemet kronike të frymëmarrjes deri te sëmundjet kardiovaskulare, diabeti dhe dementia, ndikimi i ndotjes së ajrit është i madh dhe serioz.

Neuchâtel: Goditje me thikë në Bar, vetëdorëzohet kosovari

Posted on by albinfo.ch

Të premten në mbrëmje ka ndodhur një zëkë që u përshkallëzuar në goditje me thikë mes dy personave brenda një lokali në  Neuchâtel. Viktima shtë dërguar në spital dhe ndodhet jashtë rrezikut për jetën.

Të premten, më 28 mars, rreth orës 23:09, qendra e thirrjeve emergjente e Kantonit të Neuchâtelit (CNU) u njoftua për një sulm me thikë në një lokal në lagjen La Rosière, transmeton albinfo.ch. Patrulla e policisë që mbërriti pas alarmit, gjeti një burrë të shtrirë në tokë para restorantit me një dëmtim të rëndë në pjesën e sipërme të trupit.

Të pranishëm të tjerë në bar kanë dhënë ndihmën e parë përpara se këtë ta merrte përsipër një mjek i urgjencës nga SMUR dhe një ambulancë nga SPS Neuchâtel, shkruan poizeinews.ch. Viktima u dërgua në spitalin RHNe Pourtalès dprej nga është liruar të nesërmen. I plagosuri është një shtetas eritrean 41 vjeç, me banim në Bergen, Neuchâtel.

Një kërkim i gjerë është nisur për gjetjen e autorit të arratisur.

Ai u dorëzua vetë në stacionin e policisë Poudrières në Neuchâtel të shtunën, më 29 mars 2025, rreth orës 08:00 dhe u arrestua atje. Bëhet fjalë për një shtetas kosovar 45-vjeçar pa adresë të përhershme në Zvicër, transmeton albinfo.ch. Prokuroria publike ka kërkuar paraburgim në Gjykatën e Masave të Detyrueshme. Prezumimi i pafajësisë vlen për personin e dorëzuar.

Prokurori publik në detyrë ka hapur procedurë penale për rastin. Vijojnë hetimet për zbardhjen e plotë të rrethanave të ngjarjes.

Ndryshime në trenat që kalojnë nëpër Renens (VD)

Posted on by Alb

Duke filluar nga kjo e shtunë, udhëtarët që kalojnë nga Gjeneva drejt qyteteve në ultësirën e Jurës do të mund të ndërronin trenat në të njëjtin platformë në fundjavë. Gjatë ditëve të javës, ky shërbim do të jetë i pjesshëm, duke u ofruar vetëm një herë në orë për pasagjerët që vijnë nga Gjeneva.

Sipas një njoftimi nga SBB (Hekurudhat Federale Zvicerane), testimet e zhvilluara në fillim të marsit treguan se ky rregullim nuk do të ndikonte ndjeshëm në përpikërinë e trenave në rrjetin hekurudhor.

Ndryshimet në fundjavë dhe gjatë javës

Në fundjavë, lidhjet në të njëjtin platformë janë të mundshme, pasi ka më pak trena mallrash dhe asnjë tren shtesë për udhëtarët e përditshëm. Ndërsa gjatë javës, një lidhje çdo orë do të bëhet në të njëjtin platformë, por vetëm në drejtimin Gjenevë-Jura. Kjo përfshin trenin IR 90, që mbërrin në Renens çdo orë në minutën e 37-të, dhe trenin IC5, që niset katër minuta më vonë, transmeton albinfo.ch.

SBB po vijon studimet për të ofruar një ndërrim trenash në të njëjtin platformë edhe në drejtimin e kundërt duke filluar nga dhjetori i ardhshëm. Sipas tyre, një ndryshim i tillë mund të shkaktojë konflikte në rrugët e ndryshme të trenave dhe të ndikojë në mbarëvajtjen e rrjetit.

Punime të mëdha në horizont

Me ndryshimin e orareve të trenave dhjetorin e kaluar, lidhja e drejtpërdrejtë një herë në orë mes Gjenevës dhe qyteteve të ultësirës së Jurës u eliminua gjatë orëve jashtë pikut. Pasagjerët duhet të ndërronin trenat në Renens, gjë që ka shkaktuar pakënaqësi të madhe te udhëtarët dhe politikanët lokalë, veçanërisht pasi lidhjet nuk ishin të organizuara në të njëjtin platformë.

SBB theksoi se fillimisht ishte e nevojshme të testoheshin ndryshimet e reja në orar dhe më pas të gjendeshin zgjidhje për lidhjet e platformës. Tani që këto testime janë realizuar, megjithëse lidhjet platformë me platformë nuk janë ende të garantuara për çdo orë, planet për përmirësime të mëdha janë tashmë në zhvillim.

Në të ardhmen, pritet të realizohen punime të gjera për rikonfigurimin e shtratit të hekurudhës në perëndim të stacionit Renens. Këto punime përfshijnë zëvendësimin e 11 ndërruesve të shinave, modifikimin e disa qindra metrave platformë hekurudhore, instalimin e mbi 100 shtyllave të reja të linjës së kontaktit dhe ndryshimin e sistemit të sinjalizimit në Renens.

Një projekt ndërtimi do të paraqitet në Zyrën Federale të Transportit në vitin 2026. Nëse miratohet, punimet mund të zgjasin rreth 600 netë dhe të përfundojnë deri në fund të vitit 2029, duke u kushtëzuar nga procesi ligjor.

 

Austria mbishpenzon me miliarda ndërsa rriten kostot e pensioneve, pagave dhe mirëqenies

Posted on by erezzaademi

Qeveria e Austrisë shpenzoi më shumë se sa fitoi në 2024 – dhe kjo tregon. Deficiti publik i vendit arriti në 4.7 përqind të PBB-së së tij, shumë mbi pragun prej 3 për qind të Mastrihtit të BE-së.

Pavarësisht përpjekjeve për të frenuar shpenzimet pas viteve të shpenzimeve të lidhura me pandeminë dhe inflacionin, financat publike të Austrisë morën një tjetër goditje në vitin 2024. Shifrat e reja nga Statistik Austria tregojnë se deficiti i vendit u rrit në 22.5 miliardë euro – ose 4.7 për qind e PBB-së – nxitur nga rritja e pagave të shërbimit publik, pensioneve dhe përfitimeve sociale, transmeton albinfo.at.

Borxhi publik gjithashtu u hodh me 22.6 miliardë euro, duke arritur në një total prej 394.1 miliardë euro në fund të vitit. Kjo përkthehet në afërsisht 42,849 euro borxh për person që jeton në Austri.

Çfarë fshihet pas hendekut në rritje?

Arsyeja kryesore për deficitin në rritje të Austrisë nuk është e vështirë të dallohet: shpenzimet u rritën shumë më shpejt se të ardhurat. Të ardhurat e qeverisë u rritën me 4,9 për qind krahasuar me vitin 2023, ndërsa shpenzimet u rritën me 8,8 për qind.

Nga ana e të ardhurave, të ardhurat totale arritën në 248.8 miliardë euro në 2024. Taksat dhe kontributet sociale përbënin pjesën më të madhe – 215.9 miliardë euro – me taksat mbi të ardhurat dhe taksat mbi fitimet kapitale në rritje për shkak të pagave dhe fitimeve më të larta, shkruan thelocal.

Shpenzimet, nga ana tjetër, u rritën në 271.3 miliardë euro. Një pjesë e konsiderueshme e rritjes së shpenzimeve shkoi për kostot e personelit dhe pensionet, të cilat të dyja u rritën ndjeshëm në përgjigje të inflacionit. Përfitimet sociale në para, duke përfshirë pagesat e rregulluara të mirëqenies, u rritën me 10.9 për qind, ndërsa pagat e sektorit publik u rritën me 10 për qind.

Shpenzimet shtesë të njëhershme gjithashtu luajtën një rol, duke përfshirë pagesat e prapambetura për kohën e shërbimit të nëpunësve civilë dhe rikuperimin nga përmbytjet pas stuhive të shtatorit 2024. Këto kosto u regjistruan si transferta kapitale dhe shtuan 1.1 miliardë euro në daljet e qeverisë.

Pagesat e interesit për borxhin në rritje të Austrisë shtuan presion të mëtejshëm. Në vitin 2024, vendi pagoi 7.3 miliardë euro në interes – 1.6 miliardë euro më shumë se një vit më parë – me shumicën e kësaj rritjeje në nivel federal.

Subvencionet janë ulur, por nuk janë zhdukur

Ndërsa shumë mbështetje të epokës së pandemisë janë hequr gradualisht, disa subvencione mbeten. “Frenimi i kostos së energjisë elektrike” dhe masat e tjera për të zbutur çmimet e larta të energjisë vazhduan në vitin 2024, megjithëse subvencionet totale në fakt ranë me 1.2 miliardë euro krahasuar me vitin 2023.

Nuk ishte vetëm qeveria federale që kishte një deficit. Landet (shtetet) dhe bashkitë e Austrisë shpenzuan gjithashtu më shumë se sa fituan. Deficiti në nivel shtetëror u rrit në 2 miliardë euro, ndërsa bashkitë shënuan deficit 2.6 miliardë euro.

Nivelet e borxhit vazhdojnë të rriten

Në fund të vitit 2024, borxhi i përgjithshëm publik i Austrisë ishte 394.1 miliardë euro – nga 371.5 miliardë euro një vit më parë. Kjo e shtyu raportin e borxhit ndaj PBB-së së vendit nga 78.5 përqind në 81.8 përqind.

Pjesa më e madhe e këtij borxhi – 349.2 miliardë euro – ishte në formën e obligacioneve, ndërsa 42.9 miliardë euro erdhi nga kreditë dhe 2 miliardë euro nga depozitat. Rritja më e madhe ndodhi në sektorin federal, i cili shtoi 17.6 miliardë euro borxh të ri, kryesisht për financimin e deficitit.

Investimet në infrastrukturën hekurudhore dhe subjekte të tjera jashtë buxhetit kontribuan gjithashtu në rritjen e barrës së borxhit.

Si krahasohet kjo me rregullat e BE-së?

Sipas kritereve të Mastrihtit, vendet e eurozonës supozohet të mbajnë deficitin e tyre vjetor nën 3 përqind të PBB-së dhe borxhin publik total nën 60 përqind. Austria tani i kalon të dy kufijtë – një realitet i përbashkët nga shumë vende të BE-së pas COVID-19, inflacionit dhe goditjeve energjetike të lidhura me luftën.

Cilat pjesë të Zvicrës ndalohen të ndërtojnë shtëpi të dyta?

Posted on by erezzaademi

Duke qenë se Zvicra është një vend i vogël me furnizim të kufizuar toke (dhe si rrjedhojë me mungesë banesash), përparësia e ndërtimit i jepet banesave kryesore. Ndërtimi i shtëpive dytësore është i rregulluar rreptësisht dhe në disa pjesë është i ndaluar fare.

Çfarë nënkuptohet saktësisht me “shtëpinë e dytë” në Zvicër?

Ekzistojnë dy kategori që i përkasin këtij përshkrimi: shtëpitë e dyta dhe vendbanimet e dyta.

Vendi i dytë i banimit, siç sugjeron edhe emri, është vendi ku një person jeton ndërsa punon ose studion në vend, por nuk është vendbanimi i tij kryesor, transmeton albinfo.ch.

Këto janë të zakonshme, për shembull, me punëtorët ndërkufitarë, vendbanimi kryesor i të cilëve mund të jetë në një vend fqinj, por që kanë një vendbanim afër punës së tyre në Zvicër.

Një shtëpi e dytë, për qëllimet e ligjit, është pra një vendbanim i dytë që nuk përdoret për punë ose studim.

Përkufizimi zyrtar i qeverisë është si më poshtë:

“Në Zvicër, një shtëpi e dytë është një shtëpi ose apartament që nuk përdoret nga një person që banon në komunën në fjalë dhe nuk përdoret për qëllime pune ose arsimimi. Shtëpitë e dyta shpesh përdoren ose si shtëpi pushimi ose jepen me qira për qiramarrësit privatë.”

Cilat janë rregullat për ndërtimin e këtyre shtëpive të dyta?

Në një referendum të vitit 2012, votuesit zviceranë miratuan një masë që kufizon ndërtimin e këtyre rezidencave, shkruan The Local.

Rrjedhimisht, Akti Federal mbi Shtëpitë e Dyta (LRS), i cili hyri në fuqi më 1 janar 2016, përcakton që banesat e dyta nuk mund të kalojnë 20 për qind të stokut të përgjithshëm të banesave të çdo komuniteti.

Ky legjislacion kërkon gjithashtu që të gjitha bashkitë zvicerane të bëjnë një inventar të banesave një herë në vit, në mënyrë që gjendja e tregut të tyre primar dhe të dytë të banesave të jetë e qartë.

Cila është situata tani?

Bazuar në pragun prej 20 për qind, këto shtatë komuna tani janë jashtë kufijve për ndërtimet e reja të shtëpive të dyta, sipas një njoftimi për shtyp të publikuar nga Zyra Federale për Zhvillim Hapësinor (ARE) më 31 mars 2025:

  • Reichenbach im Kandertal (BE)

  • Basse-Allaine (JU)

  • Heiligenschwendi (BE)

  • Langenbruck (BL)

  • Mauraz (VD)

  • Rebévelier (BE)

  • Scharans (GR)

Këto komunitete po i bashkohen 337 të tjerëve, ku pjesa e shtëpive të dyta gjithashtu kalon 20 për qind dhe, për rrjedhojë, nuk mund të bëhet një ndërtim i ri, jo parësor.

Siç është, shumica e rezidencave të dyta janë të vendosura në zonat tradicionale turistike të Valais, Ticino, Graubünden, si dhe në Oberland Bernese.

A do të thotë kjo se nuk mund të zotëroni më një shtëpi të dytë në këto komunitete?

Kjo nuk do të thotë aspak.

Ju mund të blini prona ekzistuese, por nuk mund të ndërtoni të reja.

Nëse aplikoni për leje ndërtimi, do t’ju refuzohet.

Përjashtimet e vetme të mundshme nga këto rregulla janë shtesat në akomodimet tashmë ekzistuese turistike, si hotelet.

Gjithashtu, nëse ndodh që të zotëroni një banesë kryesore në këto qytete, nuk mund të vendosni papritur ta shndërroni atë në një shtëpi pushimi.

Ky, në fakt, është dëshmuar të jetë problem në disa qytete, përfshirë Gjenevën, ku banesat kryesore janë shndërruar në shtëpi pushimi dhe nuk mund t’u jepen më me qira qiramarrësve të përhershëm.

Një transformim i tillë përkeqëson më tej mungesën e banesave.

Pse primet zvicerane të sigurimit shëndetësor në Zug janë vendosur të bien ndjeshëm?

Posted on by erezzaademi

Banorët e Zug-ut mund të jenë njerëzit më me fat në Zvicër: sigurimi i tyre shëndetësor jo vetëm që NUK do të rritet, por në fakt do të bjerë. Si është e mundur kjo?

Ndërsa shumë banorë të 25 kantoneve të tjera zvicerane luftojnë për të vazhduar me normat në rritje të vazhdueshme të sigurimeve shëndetësore – 6 përqind mesatarisht në 2025, pas rritjeve të konsiderueshme në vitet e mëparshme gjithashtu – popullsia e Zug-ut do të shohë që primet e tyre… të bien me 18 për qind.

Si është e mundur kjo?

Kantoni i pasur mund të përballojë të jetë bujar: arkat e tij mbushen me para.

Ka kapital prej 2.6 miliardë frangash dhe gjeneron rregullisht bonuse vjetore prej më shumë se 300 milionë

Jo vetëm që taksat e tyre janë më të ulëta në vend, por edhe primet e tyre të sigurimit shëndetësor do të jenë gjithashtu, transmeton albinfo.ch.

Kjo për shkak se gjatë dy viteve të ardhshme, kantoni do të përdorë tepricat e tij për të mbuluar 99 për qind të kostove spitalore për rreth 130,000 banorët e tij.

Ky është një gjest vërtet bujar, sepse në kantonet e tjera ky mbulim arrin në 55 për qind të kostove, ndërsa transportuesit e sigurimeve – pra publiku – paguajnë 45 për qind të mbetur.

Duke qenë se kompanitë e sigurimeve shëndetësore të Zug nuk do të duhet të mbulojnë shpenzimet spitalore, ato do të kenë më pak shpenzime nga xhepi, që do të thotë se primet do të bien me 18 për qind – rreth 700 franga për person në 2026 dhe 2027, shkruan thelocal.

Banorët e Zugut jo vetëm që do të përfitojnë nga kostot më të ulëta të sigurimeve shëndetësore, por tashmë po përfitojnë nga taksa më e ulët në vend.

Sipas Tribune de Genève, “një çift i martuar me dy fëmijë dhe një të ardhur bruto vjetore prej 125,000 frangash do të paguajë 15,447 franga në vit në taksa në Neuchâtel, 14,406 franga në Lozanë, 10,376 franga në Gjenevë, por vetëm…2,18 franga Zug”.

Sigurimet shëndetësore, taksat…a nuk ka asnjë dobësi për të jetuar në Zug?

Vetëm një: mungesa e banesave të përballueshme.

Në këtë kuptim, Zug është viktimë e suksesit të tij: për shkak të taksave të ulëta, ai është bërë një vend i kërkuar për të jetuar për individët dhe një vend tërheqës gjithashtu për selitë e kompanisë.

Ndërsa potenciali për ndërtimin e apartamenteve të reja në dhe rreth 11 komunave të kantonit po shterret, është bërë gjithnjë e më e vështirë gjetja e banesave me qira me çmime të arsyeshme.

Zgjedhjet në Shqipëri: Fletëvotimet e diasporës do të transportohen në 85 vende të botës

Posted on by erezzaademi

Zgjedhjet parlamentare në Shqipëri do të mbahen më 11 maj, teksa vota e emigrantëve shqiptarë do të shpërndahet në 85 shtete të botës ku ata jetojnë dhe punojnë, sipas grafikut të paracaktuar edhe nga KQZ për të gjithë aplikantët (kërkuesit) e aprovuar.

Një kompani private ndërkombëtare është ngarkuar për transportimin e votave, dhe ky shërbim ka një kosto që ka arritur deri në 40 euro për çdo votë. Qeveria në Shqipëri ka aprovuar një fond prej 10 milionë eurosh për të mbuluar shpenzimet e transportit të 245,808 zarfeve, transmeton albinfo.ch.

Për më tepër, votat nuk do të dërgohen thjesht në kutinë postare të votuesve. Postieri do të tentojë të dorëzojë votën personalisht, duke kërkuar një mjet identifikimi nga votuesi, teksa do të përdoret një procedurë që mund të përfshijë deri në 3 përpjekje për të arritur votuesit në adresat që ata kanë deklaruar.

Ky proces ka filluar dhe do të shqyrtohet më tej në Komisionin Qendror të Zgjedhjeve për miratim përfundimtar.