BE edhe Kosova në strategjinë e Serbisë në 2011

Tadiq: Qëllimi më i rëndësishëm i politikës së jashtme të Serbisë në këtë vit është BE-ja

Presidenti i Serbisë, Boris Tadiq dhe ministri i Jashtëm, Vuk Jeremiq, kanë prezantuar strategjinë e Beogradit zyrtar para ambasadorëve serbë, duke pohuar se qëndrimi ndaj pavarësisë së Kosovës mbetet i pandryshuar.

Jeremiq ka thënë se para politikës së jashtme serbe në këtë vit janë dy detyra. “E para është të sigurohet që të mos rritet numri i vendeve që e kanë njohur Kosovën. Ndërsa, detyra e dytë e diplomacisë serbe është që të ruhet klima e shëndoshë ndërkombëtare për dialogun ndërmjet Prishtinës dhe Beogradit”.

Kryediplomati serb, gjithashtu, ka shfaqur shpresën se Serbia do ta fitojë deri në fund të vitit statusin e vendit kandidat për anëtarësim në BE. Ngjashëm ka thënë edhe Tadiq.

Sipas tij, qëllimi më i rëndësishëm i politikës së jashtme të Serbisë në këtë vit është BE-ja dhe arritja e statusit të kandidatit për anëtarësim, por në të njëjtën kohë do të vazhdojë mbrojtja e interesave nacionale në Kosovë.