Bahtiri, shumë premtime për bashkatdhetarë

Kryetari i Mitrovicës, Agim Bahtiri iu premtoi mërgimtarëve lehtësira për investime, ndërsa administrata do të punojë me orar shtesë për ta

Vetëm një numër i vogël i bashkatdhetarëve iu kanë përgjigjur ftesës së Agim Bahtirit, kryetarit të Mitrovicës për takim me mërgatën. Megjithatë, ai iu premtoi mërgimtarëve se komuna e tij do të bëj lehtësira për investime, ndërsa administrata do të punojë me orar  shtesë për diasporën.

“Gjatë periudhës 18 mujore të qeverisjes time në komunën e Mitrovicës janë arritur rezultate inkurajuese në punë. Administrata komunale është shumë më efikase dhe e kompletuar se përpara, prandaj edhe në disa raste jemi vlerësuar si komunë model për punën në gjendjen civile, ku kemi zgjatur orarin e punës me qëllim që qytetarët të mund të pajisjen me dokumente pas orarit të punës në kohë sa më të shkurtër”,  tha kryetari Bahtiri.

Në aspektin e zhvillimit ekonomik, ai tha se po punohet në funksionalizimin e Zonës së lirë ekonomike e cila gjeneron zhvillim dhe vende pune, ndërkohë që në zonën industriale është duke u punuar në infrastrukturën e saj dhe vendosjen e bizneseve, ku deri tash, sipas tij, janë ndarë hapësira për disa biznese siç është kompania  amerikano-suedeze “Green Power 3”, për riciklimin e mbeturinave dhe prodhimin e 12 megavateve rrymë elektrike.

Mërgimtari Fetah Ismajli, të cilin kryetari Bahtiri e kishte shoqëruar deri në shërbimin e ofiqarisë për të rregulluar një dokument, tha se ishte mahnitur me një gjest të tillë të tij, andaj edhe në shenj falënderimi dhe respekti, i dhuroi atij një hartë të trojeve etnike të punuar me minerale të Minierës Trepça.